ନୂଆଦିଲ୍ଲୀ,୧୧-୧୦: ରେଲଓ୍ବେ ପକ୍ଷରୁ ୧୫୦ ଟ୍ରେନର ଘରୋଇକରଣ ନେଇ ଯୋଜନା ରଖାଯାଇଛି। ଏହାବାଦ ଦେଶର ୫୦ ରେଳ ଷ୍ଟେଶନକୁ ବିଶ୍ୱ ସ୍ତରୀୟ କରି ଗଢି ତୋଳିବା ଲାଗି ରେଳ ମନ୍ତ୍ରଣାଳୟ ଲକ୍ଷ୍ୟ ରଖିଛି। ଏହି ଧାରାକୁ ଆଗେଇ ନେବା ପାଇଁ ଏକ ଟାସ୍କ ଫୋର୍ସ ଗଠନ ହୋଇଥିବା ଜଣାପଡିଛି। ରେଳ ଷ୍ଟେଶନ ଆଧିନିକୀକରଣ ଏବଂ ୧୫୦ ଟ୍ରେନ ପରିଚାଳନା ଲାଗି ଘରୋଇ ଯାତ୍ରୀବାହୀ ଟ୍ରେନ ଅପରେଟରଙ୍କୁ ଅନୁମତି ଦେବା ଲାଗି ବ୍ଲୁପ୍ରିଣ୍ଟ ପ୍ରସ୍ତୁତ କରିବା ଦିଗରେ ଏହି ଟାସ୍କ ଫୋର୍ସ କାର୍ଯ୍ୟ କରିବ। ଏହି କାର୍ଯ୍ୟକୁ ଆଗେଇ ନେବା ଲାଗି ଏକ ଏମ୍ପାଓ୍ବାର୍ଡ ଗ୍ରୁପ ଗଠନ ନେଇ ରେଳ ବୋର୍ଡ ଅଧ୍ୟକ୍ଷ ଭି.କେ. ଯାଦବଙ୍କୁ ନୀତି ଆୟୋଗ ସିଇଓ ଅମିତାଭ କାନ୍ତ ଚିଠି ଲେଖିଛନ୍ତି। ଏହି ଗ୍ରୁପରେ ଯାଦବଙ୍କ ବ୍ୟତୀତ ନୀତି ଆୟୋଗ ସିଇଓ, ଅର୍ଥନୈତିକ ବ୍ୟାପାର ବିଭାଗ ସଚିବ, ବାସଗୃହ ଏବଂ ସହର ବ୍ୟାପାର ସଚିବ ଏବଂ ରେଲଓ୍ବେର ଫାଇନାସିଆଲ କମିଶନର ରହିବେ।
ଏହାବାଦ ରେଳ ବୋର୍ଡର ଇଞ୍ଜିନୟରିଂ ସଦସ୍ୟ, ଟ୍ରାଫିକ ସଦସ୍ୟ ମଧ୍ୟ ଉକ୍ତ ଗ୍ରୁପରେ ସାମିଲ ରହିବେ। ବିଡିଂ ଧାରାକୁ ଏହି ଗ୍ରୁପ ମଞ୍ଜୁରୀ ପ୍ରଦାନ କରିବ। ଏହା ମଧ୍ୟରେ ଆର୍ଏଫ୍ପି, ଆର୍ଏଫ୍କ୍ୟୁ ଏବଂ କନସେସନ ଚୁକ୍ତି ଭଳି ବିଡ୍ ହସ୍ତାବିଜ ରହିବ। ବିଡିଂ ଧାରାକୁ ଦେଖା ଶୁଣା, ଠିକ୍ ସମୟରେ ପ୍ରକଳ୍ପ ପ୍ରଦାନ କରାଗଲା କି ନାହିଁ ସେ ନେଇ ଗ୍ରୁପ ନିଶ୍ଚିତ କରିବ। ପ୍ରାଥମିକତା ଭିତ୍ତିରେ ୧୫୦ ଟ୍ରେନର ଘରୋଇକରଣ ହେବାର ଆବଶ୍ୟକତା ରହିଥିବା ଚିଠିରେ ଉଲ୍ଲେଖ କରାଯାଇଛି। ଦିଲ୍ଲୀ-ଲକ୍ଷ୍ନୌ ମଧ୍ୟରେ ଚଳିତ ମାସ ୪ରୁ ଚାଲୁଥିବା ତେଜସ ଏକ୍ସପ୍ରେସ ଅଣରେଳ ଅପରେଟରଙ୍କ ଦ୍ୱାରା ପରିଚାଳିତ ପ୍ରଥମ ଟ୍ରେନ। ଏହା ରେଲଓ୍ବେର ନିଜସ୍ବ ସହଯୋଗୀ କମ୍ପାନୀ ଆଇଆର୍ସିଟିସି ଦ୍ୱାରା ପରିଚାଳନା କରାଯାଉଛି।
