ନୂଆଦିଲ୍ଲୀ,୧।୬: ସରକାରଙ୍କୁ ବର୍ତ୍ତମାନ ଟିକସ ସଂଗ୍ରହ କ୍ଷେତ୍ରରେ ଚାପର ସମ୍ମୁଖୀନ ହେବାକୁ ପଡୁଛି। ଏହି ପରିପ୍ରେକ୍ଷୀରେ ସାମଗ୍ରୀ ଓ ସେବା ଟିକସ(ଜିଏସ୍ଟି) ଲାଗି ସର୍ବୋଚ୍ଚ ସଂସ୍ଥା କୁହାଯାଉଥିବା ଜିଏସ୍ଟି ପରିଷଦ ବୈଠକ ଜୁନ ୍ମାସ ୧୪ରେ ବସିପାରେ। କୋଭିଡ୍-୧୯ ପରେ ଏହା ପ୍ରଥମ ବୈଠକ ହେବ। ମାର୍ଚ୍ଚ ୨୫ ପରଠାରୁ ସାରା ଦେଶରେ ଲକ୍ଡାଉନ ଘୋଷଣା ହେବା ଯୋଗୁ ଟିକସ ସଂଗ୍ରହ ବାଧାପ୍ରାପ୍ତ ହୋଇଛି। ଜିଏସ୍ଟି ପରିଷଦରେ କେନ୍ଦ୍ର ଅର୍ଥମନ୍ତ୍ରୀ ଅଧ୍ୟକ୍ଷ ରହିଥିବା ବେଳେ ସବୁ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳରୁ ପ୍ରତିନିଧି ଏଠାରେ ରହିଛି। ପରିଷଦର ବୈଠକ ଜୁନ୍ ୧୪ରେ ହେବା ନେଇ ଯୋଜନା ରହିଥିବା ପ୍ରକ୍ରିୟା ସହ ଜଡ଼ିତ ଜଣେ ଅଧିକାରୀ ସୂଚନା ଦେଇଛନ୍ତି। ମାର୍ଚ୍ଚରେ ବସିଥିବା ବୈଠକରେ କରୋନା ଭାଇରସ୍ର ପ୍ରଭାବ ଅର୍ଥ ବ୍ୟବସ୍ଥା ଉପରେ କ’ଣ ରହିବ ସେ ନେଇ କୌଣସି ଆଲୋଚନା ହୋଇ ନ ଥିଲା। ସେହି ସମୟରେ କରୋନା ମାମଲା କମ୍ ରହିଥିଲା। ଲକ୍ଡାଉନ ମଧ୍ୟ ଘୋଷଣା କରାଯାଇ ନ ଥିଲା। ବର୍ତ୍ତମାନ ଟିକସ ସଂଗ୍ରହରେ ବାଧା ରହୁଥିଲେ ମଧ୍ୟ ଟିକସ ହାର ବୃଦ୍ଧି ସପକ୍ଷରେ ସରକାର ନାହାନ୍ତି ବୋଲି କୁହାଯାଉଛି। କାରଣ ଅଣଅତ୍ୟାବଶ୍ୟକ ସାମଗ୍ରୀ ଉପରେ ଟିକସ ବୃଦ୍ଧି ହେଲେ ଏହା ଚାହିଦାକୁ ଫେରାଇ ଆଣିବା ଦିଗରେ ବାଧା ଉପୁଜାଇବ। ଅର୍ଥ ବ୍ୟବସ୍ଥା ପ୍ରଭାବିତ ସ୍ଥିତିରେ ଥିବାରୁ ଏହାକୁ ଟ୍ରାକ୍କୁ ଫେରାଇ ଆଣିବା ଦିଗରେ ଏହା ଅସୁବିଧା ସୃଷ୍ଟି କରିବ। ଏ ସଂକ୍ରାନ୍ତରେ ଚୂଡ଼ାନ୍ତ ନିଷ୍ପତ୍ତି ପରିଷଦ ଗ୍ରହଣ କରିବେ ବୋଲି ଜଣାପଡ଼ିଛି।
