ଗ୍ଲୋବାଲ ଓ୍ବାର୍ମିଂ ବଢ଼ିଚାଲିଥିବାରୁ ଏହା ପୃଥିବୀ ପ୍ରତି ଭୟଙ୍କର ବିପଦ ସୃଷ୍ଟି କରୁଛି। ୧୦ ବର୍ଷ ମଧ୍ୟରେ ପୃଥିବୀ ପ୍ରତି ଏକ ଭୟଙ୍କର ବିପଦ ଅର୍ଥାତ ଜଳପ୍ରଳୟ ହେବ ବୋଲି ବୈଜ୍ଞାନିକମାନେ ଚେତାବନୀ ଦେଇଛନ୍ତି। ପ୍ରତିବର୍ଷ ପ୍ରାୟ ୧.୩୦ ଫୁଟ ଉଚ୍ଚର ବରଫ ଦ୍ରୁତବେଗରେ ତରଳିବାରେ ଲାଗିଛି। ଆଜିପର୍ଯ୍ୟନ୍ତ ୫ ଫୁଟ ଉଚ୍ଚର ବରଫ ତରଳି ସାରିଲାଣି। ୨୦୩୦ ପର୍ଯ୍ୟନ୍ତ ଏକ ଭୟଙ୍କର ବିପଦ ପୃଥିବୀ ଆଡ଼କୁ ମାଡ଼ିଆସୁଛି ବୋଲି ବୈଜ୍ଞାନିକମାନେ ଅନୁମାନ କରିଛନ୍ତି।
୧୧ ହଜାର ବୈଜ୍ଞାନିକ ଦେଇଛନ୍ତି ଏହି ଚେତାବନୀ:
ଆଣ୍ଟାର୍କଟିକାରେ ମହଜୁଦ୍ ଥିବା ସବୁଠୁ ପୁରୁଣା ଏବଂ ସ୍ଥିର ବରଫଖଣ୍ଡ ଖୁବ୍ ତୀବ୍ର ଗତିରେ ତରଳିବାରେ ଲାଗିଛି। ଏହି ଭୟାବହ ବିପଦ ୧୩୦ ଦେଶରେ ଦେଖିବାକୁ ମିଳିବ। ପ୍ରାୟ ୧୧ ହଜାର ବୈଜ୍ଞାନିକ ଏହି ଚେତାବନୀ ଦେଇଛନ୍ତି। ବୈଜ୍ଞାନିକଙ୍କ ଅନୁଯାୟୀ, ଆଣ୍ଟାର୍କଟିକାରେ ମହଜୁଦ୍ ଥିବା ବରଫ ଖଣ୍ଡକୁ ‘ଦ ଲାଷ୍ଟ ଆଇସ୍ ଏରିଆ’ କୁହାଯାଏ। ଏହି ବରଫ ଦ୍ୱିଗୁଣିତ ଗତିରେ ତରଳୁଅଛି। ୨୦୧୬ରେ ୪୧ ଲକ୍ଷ ୪୩ ହଜାର ୯୮୦ ବର୍ଗ କିମି ପର୍ଯ୍ୟନ୍ତ ବହିଥିଲା। ଯାହା ଏବେ ୯.୯୯ ଲକ୍ଷ ବର୍ଗ କିମି ବାକି ଅଛି। ୨୦୩୦ ସୁଦ୍ଧା ଏହି ବରଫ ପୃଥିବୀ ପ୍ରତି ଭୟଙ୍କର ବିପଦ ସୃଷ୍ଟି କରିବ ବୋଲି ଆଶଙ୍କା କରାଯାଉଛି।
ୟୁନିଭରସିଟି ଅଫ୍ ଟରୋଣ୍ଟୋ ବୈଜ୍ଞାନିକ କ୍ୟାଣ୍ଟ ମୁର୍ଙ୍କ ଅନୁସାରେ, ୧୯୭୦ମସିହା ପରଠାରୁ ଆଜିପର୍ଯ୍ୟନ୍ତ ଆଣ୍ଟାର୍କଟିକାରେ ପ୍ରାୟ ୫ ଫୁଟ ଉଚ୍ଚର ବରଫ ତରଳୁଛି। ପ୍ରତିବର୍ଷ ୧.୩୦ ଫୁଟ ଉଚ୍ଚ ବରଫ ତରଳୁଛି। ଏଥିଯୋଗୁ ସମୁଦ୍ର ଜଳସ୍ତର ବଢ଼ିବାରେ ଲାଗିଛି। ଆଣ୍ଟାର୍କଟିକାର ବରଫ ତରଳିବାରୁ ଗ୍ରୀନ୍ଲାଣ୍ଡ୍ ଏବଂ କାନାଡା ଆଖପାଖ ଅଞ୍ଚଳରେ ଋତୁ ପରିବର୍ତ୍ତନ ହେଉଛି। ଏଠାରେ ବି ଗରମ ବଢ଼ିବାରେ ଲାଗିଛି। ଏହାର ପ୍ରଭାବ ସମଗ୍ର ବିଶ୍ୱ ଉପରେ ପଡ଼ିବ। କିଛି ଦେଶ ମଧ୍ୟ ଜଳମଗ୍ନ ହୋଇଯିବ ବୋଲି ବୈଜ୍ଞାନିକମାନେ କହିଛନ୍ତି।
