ଗଣ୍ଡତୁରୁମ, ୨୩।୩ (ଡି.ଏନ୍.ଏ.)- ବରଗଡ଼ ଜିଲା ଭେଡ଼େନ ବ୍ଲକ ମହୁଲପାଲି ଗାଁର ଘନ ଦେହେରୀ(୯୦) ଆର ତାକର ମାଏକିନା ସାଲିଣି(୮୫)। ଦମ୍ପତି ଭତାର ଲାଗି ପାଖାପାଖି ୧୦ ଥର ଆବେଦନ କରି ନିରାଶ ହେଇଥିଲେ। ଇ ବାବ୍ଦେ ଗଲା ୨୦୧୯ ଡିସେମ୍ବର ୫ ତାରିଖଥି ଧରିତ୍ରୀ ସମ୍ବଲପୁର ସଂସ୍କରଣରେ ‘୧୦ଥର ଆବେଦନ କରି ନିରାଶ, ଭତାରୁ ବଁଚିତ୍ ବୁରୁଧ୍ ଦମ୍ପତି’ ଶୀରଷକ୍ରେ ଟିକିନିଖିନୁ ଖବର ବାହାରିଥିଲା। ଖବର ବାହାରଲା ଉତାରୁ ବରଗଡ଼ ଜିଲାପାଳ ଜ୍ୟୋତିରଞ୍ଜନ ପଧାନ ବୁରୁଧ୍ ଦମ୍ପତିକୁଁ ଭତା ଯୁଗେଇ ଦେବାର ଦିଗେ ପଦକ୍ଷେପ ନେବାକେ ଜିଲା ସାମାଜିକ ସୁରକ୍ଷା ଅଧ୍କାରୀ ନବକୃଷ୍ଣ ଦାଶକୁଁ ନିରଦେଶ ଦେଇଥିଲେ। ଜିଲାପାଳକଁର ନିରଦେଶ ଅନ୍ସାରେ ଡିଏସ୍ଏସ୍ଓ ଆର ଉନିଅଁା କରମଚାରୀମାନେ ମହୁଲପାଲି ଗଁାରେ ପୁହୁଁଚି ଘନକୁଁ ଭେଟି ସବୁକଥା ପଚାରି ବୁଝିଥିଲେ। ସରକାରୀ ଅଧ୍କାରୀମାନେ ତାକରନୁ ଦରକାରୀ କାଗଜପତର, ଫଟୋ ନେଇଥିଲେ। ଶେଷେ ପରଶାସନ ବୁରୁଧ୍ ଦମ୍ପତିକଁର ଭତା ମଂଜୁର କରିଥିଲେ। ଥାନୀଅ ସରପଁଚ୍ ପିଙ୍କି ବଢ଼େଇ, ପଁଚେତ୍ ନିର୍ବାହୀ ଅଧ୍କାରୀ ବୁରୁଧ୍ ଦମ୍ପତିକୁଁ ପଚେତ୍କେ ଡକେଇ ଦୁଇ ମାସର ଲେଖେଁ ଭତା ଟଁକା ଦେଇଛନ୍। ଦମ୍ପତି ଭତା ପାଏଲା ଉତାରୁ ଖୁସିରେ ଗଦ୍ ଗଦ୍ ହେଇ ଧରିତ୍ରୀ ଖବର କାଗଜକେ ଗୁର୍ଦୁ ପରଶଁସା କରବାର ସଂଗେ ଧରିତ୍ରୀ ପରିବାରକେ ଧଏନ୍ବାଦ ଦେଇଛନ୍। ପୂରବର ସୂଚନା ହିସାବେ ମହୁଲପାଲି ଗାଁର ଘନ ଦେହେରୀକଁର ପରିବାର କହେଲେ ମାଏକିନା ସାଲିଣି, ୩ ପୁଓ ଆର ଗୁଟେ ଝି’କେ ନେଇ ସଁସାର। ଘନ ଝନେ ନିହାତି ଗରିବ୍ ଆର ଭୂମିହୀନ ଲୋକ ଆଏ। ୧୯୬୯ ସାଲେ ହେଇଥିବାର ବଡ଼ଭାରି ମର୍ଡିରେ ପେଟ୍ପାଟନାର ଲାଗି କୁଟୁମବସିଆ ନିଜର ମୂଲ ଗାଁ ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ କୁଞ୍ଜାମହୁଲରୁ ବରଗଡ଼ ଜିଲା ମହୁଲପାଲିକେ ପଲେଇ ଆସିଥିଲେ। ମହୁଲପାଲିରେ କୁଲିମଜୁରି କରି ଘନ ନିଜର ଛୁଆପିଲା ବଡ଼ କରି ବିହାଚୁରା କରି ସାରିଛନ୍। ଏହେଦେ ପିଲାଛୁଆ ଭିନେ ହେଇ ରହୁଥିଲାବେଲେ ବୁରୁଧ୍ ଦମ୍ପତି ବଡ଼ାଦୁଖେ ଚଲୁଛନ୍। ଅନ୍ତ୍ୟୋଦୟ ଯୋଜନାରେ ମାସିକ ୩୫ କେ.ଜି. ଚାଉଲ ପାଉଥିଲାବେଲେ ତେଲ୍ନୁନ୍, କପଡ଼ାଲତା, ଉଷୋକଷା କରବାକେ ସେମାନେ ବହୁତ୍ ହଇରାନ ହେଉଥିଲେ। ଏହେଦେ ଭତା ପାଏଲା ଉତାରୁ ଆମେ ଆରାମରେ ଚଲିପାରମୁ ବଲି ବୁରୁଧ୍ ଦମ୍ପତି କହିଛନ୍।
