ଢେଙ୍କାନାଳ ଅଫିସ, ୧୨।୪ – ଢେଙ୍କାନାଳ ସହରର ଜଣେ ମହିଳାଙ୍କ ସ୍ବାବ୍ରୁ କରୋନା ଭୂତାଣୁ ଚିହ୍ନଟ ହେବା ପରେ ପୌରାଞ୍ଚଳରେ ଘର ଘର ବୁଲି ସ୍ବାସ୍ଥ୍ୟ ସର୍ଭେ କରାଯାଉଛି। ଶୁକ୍ରବାରଠାରୁ ଆରମ୍ଭ ହୋଇଥିବା ଏହି ସର୍ଭେ ରବିବାର ସୁଦ୍ଧା ଶେଷ ହେବ ବୋଲି ପୌରସଂସ୍ଥା ପକ୍ଷରୁ ସୂଚନା ଦିଆଯାଇଛି। ଅନ୍ୟପଟେ ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ୧୨ଜଣଙ୍କ ରିପୋର୍ଟକୁ ଅପେକ୍ଷା କରିଛି ପ୍ରଶାସନ।
ସର୍ଭେରେ ଥଣ୍ଡା, କାଶ, ଜ୍ୱର ଆକ୍ରାନ୍ତଙ୍କୁ ଚିହ୍ନଟ କରିବାକୁ ପ୍ରାଥମିକତା ଦିଆଯାଉଛି। ଆବଶ୍ୟକସ୍ଥଳେ ଡାକ୍ତରୀ ଦଳ ସେମାନଙ୍କ ନିକଟକୁ ଯାଇ ସ୍ବାବ୍ ସଂଗ୍ରହ କରିବେ। ଶନିବାର ସୁଦ୍ଧା ଅଧିକାଂଶ ଓ୍ବାର୍ଡରେ ସର୍ଭେ ସରିଛି। ସେହିପରି ରାଜ୍ୟ ବାହାରୁ ଆସିଥିବା ୨,୮୦୩ ଜଣଙ୍କ ମଧ୍ୟରୁ ୨୩୮ଜଣ ହୋମ୍ କ୍ୱାରାଣ୍ଟାଇନରେ ରହିଛନ୍ତି। ଜିଲା ଏବଂ ବିଦେଶରୁ ସହରକୁ ଆସିଥିବା ୫୬ଜଣଙ୍କ କ୍ୱାରାଣ୍ଟାଇନ ଅବଧି ଶେଷ ହୋଇଯାଇଛି। ଏ ନେଇ ଜିଲାପାଳ ଭୂମେଶ ଚନ୍ଦ୍ର ବେହେରା କୁହନ୍ତି, ଆକ୍ରାନ୍ତ ମହିଳାଙ୍କୁ ଅଶ୍ୱିନୀ ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କ ସଂସ୍ପର୍ଶରେ ଆସିଥିବା ୧୨ଜଣଙ୍କ ରକ୍ତ ନମୁନା ଶୁକ୍ରବାର ପରୀକ୍ଷା ଲାଗି ପଠାଯାଇଥିଲା। ସେମାନଙ୍କ ରିପୋର୍ଟ ଆସିନାହିଁ। ମିନାବଜାର ଅଞ୍ଚଳକୁ ସମ୍ପୂର୍ଣ୍ଣ ବନ୍ଦ କରାଯାଇଛି। ସେହିପରି ସହରର ବିଭିନ୍ନ ଅଞ୍ଚଳରେ ଲକ୍ଡାଉନ୍ କଡାକଡି କରାଯାଇଥିବା ଜିଲାପାଳ ସୂଚନା ଦେଇଛନ୍ତି।
