ମୁମ୍ବାଇ,୧୯ା୨(ପି.ଟି.): ୨୬/୧୧ ମୁମ୍ବାଇ ଆକ୍ରମଣକୁ ହିନ୍ଦୁ ଆତଙ୍କବାଦ ରୂପ ଦେବା ଲାଗି ଲଶ୍କର-ଇ-ତୋଇବା ଯୋଜନା ପ୍ରସ୍ତୁତ କରିଥିଲା ବୋଲି ପୂର୍ବତନ ମୁମ୍ବାଇ ପୋଲିସ କମିଶନର ରାକେଶ ମାରିଆ କହିଛନ୍ତି। ପାକିସ୍ତାନୀ ଆତଙ୍କବାଦୀ ମହମ୍ମଦ ଅଜମଲ କସବଙ୍କୁ ବେଙ୍ଗାଲୁରୁର ସମୀର ଚୌଧ୍ରୀ ପରିଚୟରେ ମରିବା ପାଇଁ କୁହାଯାଇଥିଲା। ମାରିଆଙ୍କ ଲିଖିତ ପୁସ୍ତକ ‘ଲେଟ୍ ମି ସେ ଇଟ୍ ନାଓ’ ସୋମବାର ଉନ୍ମୋଚିତ ହୋଇଛି। ଏଥିରେ ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣ ଘଟଣାର ତଦନ୍ତ ସମ୍ପର୍କରେ ଉଲ୍ଲେଖ ରହିଛି। ଉକ୍ତ ପୁସ୍ତକ ଅନୁଯାୟୀ ୨୬/୧୧ ଆକ୍ରମଣର ମୁଖ୍ୟ ପ୍ରମାଣ କସବଙ୍କୁ ଜେଲରେ ହତ୍ୟା କରିବା ପାଇଁ ପାକିସ୍ତାନୀ ଗୋଇନ୍ଦା ସଂସ୍ଥା ଆଇଏସ୍ଆଇ ଏବଂ ଲଶ୍କର ଆତଙ୍କବାଦୀ ସଂଗଠନ ପକ୍ଷରୁ ଯୋଜନା ହୋଇଥିଲା। ଏହି ଦାୟିତ୍ୱ ଦାଉଦ ଇବ୍ରାହିମଙ୍କ ଗ୍ୟାଙ୍ଗକୁ ଦିଆଯାଇଥିଲା। ସେମାନଙ୍କ ଯୋଜନା ଅନୁଯାୟୀ କାର୍ଯ୍ୟ ହୋଇଥିଲେ କସବ ଜେଲ୍ରେ ସମୀର ଚୌଧରୀ ନାମରେ ମରିଥାନ୍ତା ଓ ଗଣମାଧ୍ୟମ ମୁମ୍ବାଇ ଆକ୍ରମଣ ପାଇଁ ହିନ୍ଦୁ ଆତଙ୍କବାଦକୁ ଦାୟୀ କରିଥାନ୍ତା ବୋଲି ମାରିଆ ଲେଖିଛନ୍ତି। ସେଥିପାଇଁ ଭାରତୀୟ ଠିକଣାରେ ଜାଲ୍ ପରିଚୟ ପତ୍ର କଶବ ପାଇଁ ପ୍ରସ୍ତୁତ ହୋଇଥିଲା। ସୁରକ୍ଷା କାରଣରୁ ମୁମ୍ବାଇ ପୋଲିସ କସବ ସମ୍ପର୍କିତ ସମସ୍ତ ସୂଚନା ଗୁପ୍ତ ରଖିବାକୁ ଚାହୁଁଥିବାବେଳେ କେନ୍ଦ୍ରୀୟ ସଂସ୍ଥା ତାଙ୍କ ଫଟୋ ଛାଡ଼ିଦେଇଥିଲା ବୋଲି ମାରିଆ କହିଛନ୍ତି। ଏହି ଫଟୋରେ କସବ ଡାହାଣ ହାତରେ ଏକ ଲାଲ୍ ସୂତା ବନ୍ଧାଯାଇଥିବା ଦେଖିବାକୁ ମିଳିଥିଲା, ଯାହା ଫଳରେ ସେ ଜଣେ ହିନ୍ଦୁ ବୋଲି ବିଶ୍ୱାସ ହେବ। ଏପରିକି ସେତେବେଳେ କେତେକ ଗଣମାଧ୍ୟମ ମୁମ୍ବାଇ ଆକ୍ରମଣରେ ହିନ୍ଦୁ ଆତଙ୍କବାଦୀ ସମ୍ପୃକ୍ତ ବୋଲି ଖବର ପ୍ରକାଶ କରିଥିଲେ। ହେଲେ ଆତଙ୍କବାଦୀଙ୍କ ଯୋଜନା କାମ ନ କରିବାରୁ ୨୬/୧୧ ଆକ୍ରମଣର ଏକମାତ୍ର ଜୀବିତ ଆତଙ୍କବାଦୀ ପାକିସ୍ତାନ ଫରିଦକୋଟର ଅଜମଲ ଅମୀର କସବ ବୋଲି ଜଣାପଡିଯାଇଥିଲା। ସେମାନଙ୍କ ଯୋଜନାକୁ ଭଣ୍ଡୁର କରିବାରେ ମୁମ୍ବାଇ କନ୍ଷ୍ଟେବଲ ତୁକାରାମ ଓମ୍ବଲେଙ୍କର ଗୁରୁତ୍ୱପୂର୍ଣ୍ଣ ଭୂମିକା ଥିଲା। ସେ କସବଙ୍କୁ ଜୀବନ୍ତ କାବୁ କରିଥିଲେ।
ମାରିଆଙ୍କ ପୁସ୍ତକ ଅନୁଯାୟୀ କସବ ଲଶ୍କର ସଂଗଠନରେ ଯୋଗଦେଇଥିଲେ ହେଁ ଜେହାଦ ସହ ତାଙ୍କର ସମ୍ପର୍କ ନ ଥିଲା। ମୁମ୍ବାଇ ଆକ୍ରମଣ ମିଶନରେ ଆସିବା ପୂର୍ବରୁ ତାଙ୍କୁ ୧.୨୫ ଲକ୍ଷ ଟଙ୍କା ଦିଆଯାଇ ସପ୍ତାହେ ଛୁଟିରେ ଛଡ଼ାଯାଇଥିଲା। କସବ ତାଙ୍କ ଭଉଣୀ ବାହାଘର ପାଇଁ ଉକ୍ତ ଟଙ୍କା ପରିବାରକୁ ଦେଇଥିଲେ। ୨୦୦୮ ନଭେମ୍ବର ୨୬ରେ କସବ ସମେତ ୧୦ ସଶସ୍ତ୍ର ଆତଙ୍କବାଦୀ ସମୁଦ୍ରପଥରେ ମୁମ୍ବାଇରେ ପହଞ୍ଚତ୍ ଆକ୍ରମଣ କରିଥିଲେ। ଏହି ଆକ୍ରମଣରେ ୧୬୬ ଜଣଙ୍କ ମୃତ୍ୟୁ ହେବା ସହ ୩୦୦ରୁ ଊର୍ଦ୍ଧ୍ୱ ଆହତ ହୋଇଥିଲେ। ୯ ଆତଙ୍କବାଦୀ ସୁରକ୍ଷା କର୍ମୀଙ୍କ ଗୁଳିରେ ନିହତ ହୋଇଥିବାବେଳେ ବଞ୍ଚତ୍ୟାଇଥିବା କସବଙ୍କୁ ୨୦୧୨ ନଭେମ୍ବର ୨୧ରେ ଫାଶୀ ଦିଆଯାଇଥିଲା।
