ଇନ୍ଦୋର,୨୮।୯: ମଧ୍ୟପ୍ରଦେଶ ହନିଟ୍ରାପ୍ର ଗୁମର ଖୋଲିବା ସହ ବହୁ ରହସ୍ୟପୂର୍ଣ୍ଣ ତଥ୍ୟ ଲୋକଲୋଚନକୁ ଆସିଛି। ୧୨ ବରିଷ୍ଠ ପ୍ରଶାସନିକ ଅଧିକାରୀ ଓ ୮ ପୂର୍ବତନ ମନ୍ତ୍ରୀ ହନିଟ୍ରାପ୍ରେ ଫସିଥିବାବେଳେ କିଙ୍ଗପିନ୍ କୁହାଯାଉଥିବା ଶ୍ୱେତା ଜୈନ ଏସ୍ଆଇଟି ଆଗରେ ଶୁକ୍ରବାର ଗୁମର ଖୋଲିଛନ୍ତି। କଲେଜ ପଢ଼ୁଆ ଗରିବ ଓ ମଧ୍ୟବିତ୍ତ ଶ୍ରେଣୀର ଝିଅମାନଙ୍କୁ ଭିଆଇପିଙ୍କ ଶଯ୍ୟାସଙ୍ଗିନୀ କରିବା ଲାଗି ବାଧ୍ୟ କରାଯାଇଥିବା ସେ ମାନିିଛନ୍ତି। ସେ କହିଛନ୍ତି, ସରକାରୀ ଫାଇଦା ହାସଲ ଓ ବିପୁଳ ଟଙ୍କା ରୋଜଗାର କରିବା ଏହାର ମୁଖ୍ୟ ଉଦ୍ଦେଶ୍ୟ ଥିଲା। ଶ୍ୱେତା ଓ ତାଙ୍କ ସହଯୋଗୀ ଆରତି ଦୟାଲ ଏଥିଲାଗି ବଡ଼ବଡ଼ କମ୍ପାନୀ ଅଧିକାରୀଙ୍କଠାରୁ ମୋଟା ଅଙ୍କର କମିଶନ ପାଉଥିଲେ।
ସହଯୋଗୀ ମୋନିକା ଯାଦବ ବଡ଼ କଲେଜରେ ନାମ ଲେଖାଇବା ଲାଗି ସେମାନଙ୍କ ସହ ସମ୍ପର୍କ ରଖିଥିବା ଏସ୍ଆଇଟିକୁ କହିଛନ୍ତି। ଶ୍ୱେତାଙ୍କ ସହ ସେ ସଚିବାଳୟକୁ ଯାଇ ୩ ସଚିବସ୍ତରୀୟ ଆଇଏଏସ୍ ଅଧିକାରୀଙ୍କୁ ଭେଟିଥିଲେ। ପରେ ଶ୍ୱେତା ତାଙ୍କୁ ଏକ ଅଡି କାର ଦେଇଥିବା ମୋନିକା ପ୍ରକାଶ କରିଛନ୍ତି। ଏକ ଏନ୍ଜିଓ କରି ଶ୍ୱେତା ଓ ଆରତି ମୋନିକାଙ୍କୁ ଅର୍ଥଲୋଭ ଦେଖାଇବା ସହ ଫସାଇଥିବା ଜଣାପଡିଛି। ହରଭଜନ ସିଂ (୬୦) ନାମକ ଜଣେ ଯନ୍ତ୍ରୀଙ୍କ ସହ ମୋନିକା ଏକ ବିଳାସପୂର୍ଣ୍ଣ ହୋଟେଲରେ ରାତି କାଟିଥିଲେ। ଏହି ଅନ୍ତରଙ୍ଗ ମୁହୂର୍ତ୍ତର ଭିଡିଓ ଆରତି ଶୁଟିଂ କରି ମୋନିକାଙ୍କୁ ବ୍ଲାକ୍ମେଲ କରି ଚୁପ୍ ରହିବା ଲାଗି ବାଧ୍ୟ କରିଥିଲେ। ଅନେକ କଲେଜ ପଢୁଆ ଛାତ୍ରୀ ଲୋଭରେ ସେମାନଙ୍କ ଜାଲରେ ଫସିଥିବା ଇନ୍ଦୋର ଏସ୍ଏସ୍ପି ରୁଚିବର୍ଦ୍ଧନ ସିଂ ପ୍ରକାଶ କରିଛନ୍ତି। ଶ୍ୱେତା କଲେଜ ପଢୁଆ ଯୁବତୀ ଓ ପ୍ରାୟ ୪୦ କଲ୍ଗର୍ଲ ସମ୍ପର୍କରେ ରହି ଭିଆଇପି ଏବଂ ନେତାଙ୍କୁ ଫସାଇ ଫାଇଦା ହାସଲ କରୁଥିଲେ ।
