ନୂଆଦିଲ୍ଲୀ,୯ା୪(ପି.ଟି.): କରୋନା ମହାମାରୀ ବିରୋଧୀ ଲଢ଼େଇରେ ଡାକ୍ତର ଓ ସ୍ବାସ୍ଥ୍ୟସେବା କର୍ମଚାରୀମାନେ ହେଉଛନ୍ତି ଯୋଦ୍ଧା। ସେମାନଙ୍କୁ ସୁରକ୍ଷିତ ରଖିବାକୁ ହେବ ବୋଲି ସୁପ୍ରିମକୋର୍ଟ ବୁଧବାର କେନ୍ଦ୍ର ସରକାରଙ୍କୁ କହିଛନ୍ତି। ସେମାନଙ୍କୁ ବ୍ୟକ୍ତିଗତ ସୁରକ୍ଷା ଉପକରଣ (ପିପିଇ) ଏବଂ ଅନ୍ୟାନ୍ୟ ସୁବିଧା ଯୋଗାଇଦେବା ଲାଗି ସରକାର ଯଥାସାଧ୍ୟ ଉଦ୍ୟମ କରୁଥିବା ସରକାର ଅଦାଲତଙ୍କୁ ପ୍ରତିଶ୍ରୁତି ଦେଇଛନ୍ତି। କୋଭିଡ୍-୧୯କୁ ନେଇ ଆଗକୁ କିଭଳି ପଦକ୍ଷେପ ନେବାକୁ ହେବ ସେନେଇ ଜନସାଧାରଣଙ୍କ ମତାମତ ଜାଣିବା ଲାଗି ବ୍ୟବସ୍ଥା ପ୍ରସ୍ତୁତ କରିବାକୁ ହେବ ବୋଲି ଜଷ୍ଟିସ୍ ଅଶୋକ ଭୂଷଣ ଏବଂ ଏସ୍. ରବୀନ୍ଦ୍ର ଭଟ୍ଟଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି। ଡାକ୍ତର ଓ ସ୍ବାସ୍ଥ୍ୟ କର୍ମୀଙ୍କୁ ସୁରକ୍ଷା ଉପକରଣ ଯୋଗାଇଦେବା ଲାଗି ଆସିଥିବା ୩ଟି ପିଟିଶନ ଉପରେ ଖଣ୍ଡପୀଠ ଭିଡିଓ କନ୍ଫରେନ୍ସିଂ ଜରିଆରେ ଶୁଣାଣି କରିଥିଲେ। ଡାକ୍ତର ଓ ସ୍ବାସ୍ଥ୍ୟ କର୍ମଚାରୀମାନେ କରୋନା ଯୋଦ୍ଧା ବୋଲି ସଲିସିଟର ଜେନେରାଲ ତୁଷାର ମେହଟ୍ଟା ଖଣ୍ଡପୀଠଙ୍କୁ ଜଣାଇଥିଲେ। ଡାକ୍ତର ଓ ହସ୍ପିଟାଲ କର୍ମଚାରୀଙ୍କ ବେତନ କାଟ୍ ଖବରକୁ ସେ ଖଣ୍ଡନ କରିଥିଲେ। ମାସ୍କ ଓ ଅନ୍ୟ ବ୍ୟକ୍ତିଗତ ସୁରକ୍ଷା ଉପକରଣ କିଣିବା ପାଇଁ ବେତନ କଟାଯାଇପାରିବ ନାହିଁ। ଏ ସମ୍ପର୍କରେ ସମସ୍ତ ରାଜ୍ୟକୁ କେନ୍ଦ୍ର ସରକାର ଚିଠି ଲେଖିବେ। ଯଦି କେହି ଡାକ୍ତର ଓ କର୍ମଚାରୀଙ୍କ ଦରମା କାଟୁଥାନ୍ତି ତେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମେହଟ୍ଟା କହିଛନ୍ତି।
ଘରୋଇ ଲାବ୍ରେ ଯାଞ୍ଚ ଦେୟ କମାଅ
କୋଭିଡ୍-୧୯ ପରୀକ୍ଷାରେ ନିୟୋଜିତ ଘରୋଇ ଲାବରେଟୋରୀଗୁଡ଼ିକ ଯେପରି ଜନସାଧାରଣଙ୍କଠାରୁ ଅଧିକ ଦେୟ ନ ନେବେ ସେଥିପାଇଁ ବ୍ୟବସ୍ଥା ଗ୍ରହଣ କରିବାକୁ ସୁପ୍ରିମକୋର୍ଟ କେନ୍ଦ୍ରକୁ ନିର୍ଦ୍ଦେଶ ଦେଇଛନ୍ତି। ଘରୋଇ ଲାବରେଟୋରୀଗୁଡ଼ିକର ଦାବି କରୁଥିବା ଦେୟ ସରକାର ଭରଣା କରିବା ଉଚିତ୍ ବୋଲି ଅଦାଲତ କହିଛନ୍ତି। ପୂର୍ବରୁ ଦିନକୁ ୧୫,୦୦୦ ପରୀକ୍ଷା ହେଉଥିବାବେଳେ ଏବେ ଏହି କ୍ଷମତାକୁ ବଢ଼ାଇଦିଆଯାଇଛି। ୪୭ଟି ଘରୋଇ ଲାବ୍କୁ କୋଭିଡ୍-୧୯ ପରୀକ୍ଷା ପାଇଁ ଅନୁମତି ଦିଆଯାଇଥିବା ସରକାର ଜଷ୍ଟିସ୍ ଅଶୋକ ଭୂଷଣ ଏବଂ ଏସ୍. ରବୀନ୍ଦ୍ର ଭଟ୍ଟଙ୍କ ଖଣ୍ଡପୀଠକୁ ଜଣାଇଥିଲେ। ସମସ୍ତଙ୍କୁ ମାଗଣାରେ ସ୍ପରୀକ୍ଷା ସୁବିଧା ଯୋଗାଇବା ଲାଗି ଆଇନଜୀବୀ ଶଶାଙ୍କ ଦେଓ ସୁଧି ଦାଏର କରିଥିବା ପିଟିଶନର ଶୁଣାଣି କରି ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି। କରୋନା ପରୀକ୍ଷା ବ୍ୟୟବହୁଳ ହୋଇଥିବାରୁ ଏହା ସମସ୍ତଙ୍କୁ ମାଗଣାରେ ଉପଲବ୍ଧ ହେବା ଆବଶ୍ୟକ ବୋଲି ଆଇନଜୀବୀ ସୁଧି କୋର୍ଟଙ୍କୁ କହିଥିଲେ। ତେବେ କେତେ ଲାବରେଟୋରୀର ଆବଶ୍ୟକ ହେବ ଏବଂ ଲକ୍ଡାଉନ କେତେଦିନ ଚାଲିବ ତାହା ବର୍ତ୍ତମାନ କୁହାଯାଇପାରୁନାହିଁ ବୋଲି ସଲିସିଟର ଜେନେରାଲ ତୁଷାର ମେହଟ୍ଟା କହିଥିଲେ।
