ଅକ୍ଲାଣ୍ଡ, ୧୮।୭- ଆଇସିସି ବିଶ୍ୱକପ୍ର ସଂଘର୍ଷପୂର୍ଣ୍ଣ ଫାଇନାଲ ମ୍ୟାଚ୍ରେ ଆୟୋଜକ ଇଂଲଣ୍ଡ ନିକଟରୁ ବାଉଣ୍ଡାରୀ ବ୍ୟବଧାନରେ ହାରି ରନର୍ସଅପ୍ରେ ସନ୍ତୁଷ୍ଟ ରହିଥିବା ନ୍ୟୁଜିଲାଣ୍ଡ ଦଳ ଗୁରୁବାର ସ୍ବଦେଶ ପ୍ରତ୍ୟାବର୍ତ୍ତନ କରିଛି। ସିନିୟର ଖେଳାଳି ତଥା ଦ୍ରୁତ ବୋଲର ଟ୍ରେଣ୍ଟ ବୋଲ୍ଟଙ୍କ ସମେତ ଟିମ୍ ସୌଦୀ, ଅଲ୍ରାଉଣ୍ଡର କଲିନ୍ ଡି ଗ୍ରାଣ୍ଡହୋମ୍, ସ୍ପିନର ମିଚେଲ ସାଣ୍ଟନରଙ୍କ ସମେତ ୭ଜଣ କିଓ୍ବି ଖେଳାଳି ଅକ୍ଲାଣ୍ଡ ବିମାନବନ୍ଦରରେ ଓହ୍ଲାଇଛନ୍ତି। ‘ଏହିଭଳି ଏକ ଚମତ୍କାର ବିଶ୍ୱକପ୍ ଫାଇନାଲ ଖେଳିବା ଅଦ୍ଭୂତପୂର୍ବ ଅଭିଜ୍ଞତା ଥିଲା। ମ୍ୟାଚ୍ର ୫୦ତମ ଓଭରରେ ମୋ ବଲ୍ରେ ଛକା ହୋଇଥିଲା। ବେନ୍ ଷ୍ଟୋକ୍ସ ଓ ଜୋ ରୁଟ୍ ଚମତ୍କାର ପାର୍ଟନରଶିପ୍ କରିଥିଲେ। ବିଜୟୀ ଲାଗି ଇଂଲଣ୍ଡ ଦଳକୁ ଅଭିନନ୍ଦନ’ ବୋଲି ବୋଲ୍ଟ ତାଙ୍କ ପ୍ରତିକ୍ରିୟାରେ କହିଛନ୍ତି। ଦୀର୍ଘ ୪ ମାସର ବ୍ୟବଧାନ ପରେ ମୁଁ ଘରକୁ ଫେରୁଛି। ମୋ ଡଗ୍ ସହ ପ୍ରଥମେ ସି-ବିଚ୍ ବୁଲିବାକୁ ଯିବି ବୋଲି ଟୁର୍ନାମେଣ୍ଟରେ ମୋଟ୍ ୧୭ ଉଇକେଟ୍ ନେବା ସହ ଆଇସିସି ବିଶ୍ୱକପ୍ ଟିମ୍ରେ ଦ୍ୱାଦଶ ଖେଳାଳି ଭାବେ ସ୍ଥାନ ପାଇଥିବା ବୋଲ୍ଟ ଏହି ଅବସରରେ ପ୍ରକାଶ କରିଛନ୍ତି। ‘ଆମେ ଯେଉଁଭଳି ଭାବେରେ ଖେଳିଲୁ କିଓ୍ବି କ୍ରିକେଟର୍ଙ୍କ ଲାଗି ଏହା ଗର୍ବର ବିଷୟ’ ବୋଲି ଫାଇନାଲ ମ୍ୟାଚ୍ରେ ବଦଳ ଖେଳାଳିଭାବେ ଫିଲ୍ଡିଂ କରିବାକୁ ଆସି ଏକ ଦର୍ଶନୀୟ କ୍ୟାଚ୍ ଦ୍ୱାରା ଜୋଶ୍ ବଟ୍ଲରଙ୍କୁ ଆଉଟ୍ କରିଥିବା ଟିମ୍ ସୌଦୀ କହିଛନ୍ତି। ନ୍ୟୁଜିଲାଣ୍ଡ ଆସନ୍ତା ମାସରେ ଶ୍ରୀଲଙ୍କା ଗସ୍ତରେ ଯାଇ ସେଠାରେ ଘରୋଇ ଦଳ ବିପକ୍ଷରେ ୨ ଟେଷ୍ଟ ଓ ୩ ଟି୨୦ ମ୍ୟାଚ୍ ଖେଳିବାର କାର୍ଯ୍ୟସୂଚୀ ରହିଛି।
