ଓଡ଼ଗାଁ,୨୬ା୪(ସ୍ବ.ପ୍ର.): ନୟାଗଡ଼ ଜିଲା ଓଡ଼ଗାଁ ବ୍ଲକ ରଘୁନାଥ ବିଦ୍ୟପୀଠ ପରିସରରେ ଥିବା ଏକ ଷ୍ଟାଫ୍ କ୍ୱାର୍ଟର ଆଟୁ ଖସି ଯିବାରୁ ସଂପୃକ୍ତ ପରିବାର ସଦସ୍ୟ ଅଳ୍ପକେ ବର୍ତ୍ତି ଯାଇଛନ୍ତି। ୪ ନମ୍ବର କ୍ୱାର୍ଟରରେ ସ୍କୁଲ ପିଅନ କୈଳାସ ସାହୁ ରହୁଥିବା ବେଳେ ଅନ୍ୟ କ୍ୱାର୍ଟରରେ ଶିକ୍ଷକମାନେ ରହୁଛନ୍ତି। ହେଲେ ଏହି ଗୃହ ବହୁ ପୁରାତନ ହୋଇଥିବା ବେଳେ ସବୁ ଆଜବେଷ୍ଟସ୍ ଛାତ ତଳେ ଥିବା ଓରା ଉଇ ଖାଇ ବ୍ୟବହାର ଅନୁପଯୋଗୀ ହୋଇଛି।
ଦୁଇଦିନ ଲଗାଣ ବର୍ଷାରେ ପାଣି ଗାଳିବା ସହିତ ରବିବାର ସକାଳୁ ଉଇ ଖିଆ ଓରା ହଠାତ ଭାଙ୍ଗି ଖସିପଡ଼ିଛି। ଫଳରେ ଆଟୁର ସବୁ ମାଟି ଘର ଭିତରେ ପଡ଼ିଛି। ଏହି ସମୟରେ ଖଟ ଉପରେ ବସି ପଢ଼ୁଥିବା ପିଅନଙ୍କ ଝିଅ ଦୌଡ଼ି ପଳାଇବାରୁ ଅଳ୍ପକେ ରକ୍ଷା ପାଇଯାଇଛନ୍ତି। ଜରାଜୀର୍ଣ୍ଣ ସ୍କୁଲ କାର୍ଟର ସମ୍ପର୍କରେ ପ୍ରଧାନଶିକ୍ଷକ ପ୍ରସନ୍ନ ପ୍ରଧାନ ବହୁବାର ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇଥିଲେ ସୁଦ୍ଧା କୌଣସି ପଦକ୍ଷେପ ନିଆଯାଇନାହିଁ। ସୁରକ୍ଷା ପାଇଁ କ୍ୱାର୍ଟରଗୁଡ଼ିକୁ ତୁରନ୍ତ ବିପଦପୂର୍ଣ୍ଣ ଘୋଷଣା କରିବାକୁ ଶିକ୍ଷକମାନେ ଦାବି କରିଛନ୍ତି।
