ଇସ୍ଲାମାବାଦ,୧୧ା୬: ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କ ଲୋକପ୍ରିୟତା ହ୍ରାସ ପାଇଚାଲିଛି। ଏହାର ସୁଯୋଗ ନେଇ ପାକ୍ ସୈନ୍ୟବାହିନୀର ଉଚ୍ଚ ଅଧିକାରୀମାନେ ଦେଶକୁ ନିୟନ୍ତ୍ରଣ କରିବା ଲାଗି ଆଗେଇ ଆସିଥିବା ଜଣାପଡ଼ିଛି। ସରକାରଙ୍କ ପ୍ରମୁଖ ଭୂମିକାରେ ସମ୍ପ୍ରତି ଅନେକ ପୂର୍ବତନ ତଥା ବର୍ତ୍ତମାନର ସେନାଧିକାରୀ ରହିଛନ୍ତି। ରାଷ୍ଟ୍ରାୟତ୍ତ ଏୟାରଲାଇନ୍ସ, ବିଦ୍ୟୁତ ନିୟାମକ ଏବଂ କୋଭିଡ୍-୧୯ ମହାମାରୀର ମୁକାବିଲା କରୁଥିବା ଦେଶର ଜାତୀୟ ସ୍ବାସ୍ଥ୍ୟ ଅନୁଷ୍ଠାନର ମୁଖ୍ୟ ଦାୟିତ୍ୱରେ ସୈନ୍ୟବାହିନୀର ୩ ଅଧିକାରୀ ରହିଛନ୍ତି। ଗତ ଦୁଇମାସ ମଧ୍ୟରେ ଏହି ନିଯୁକ୍ତି ପ୍ରଦାନ କରାଯାଇଛି।
ପାକିସ୍ତାନ ଅର୍ଥନୀତିରେ ମାନ୍ଦାବସ୍ଥା, ଆକାଶଛୁଆଁ ଦରଦାମ୍ ବୃଦ୍ଧି ଏବଂ ପ୍ରଧାନମନ୍ତ୍ରୀଙ୍କ ଘନିଷ୍ଠ ସହଯୋଗୀମାନଙ୍କ ବିରୋଧରେ ମାମଲାର ତଦନ୍ତରେ ଦୁର୍ନୀତି ଆଦି କାରଣରୁ ଇମ୍ରାନ୍ ଖାନ୍ଙ୍କ ଲୋକପ୍ରିୟତା ଓ ପ୍ରତିପତ୍ତି ଯଥେଷ୍ଟ ହ୍ରାସ ପାଇଛି। ପାର୍ଲାମେଣ୍ଟରେ ଇମ୍ରାନ୍ଙ୍କ ଦଳ ଅକ୍ତିଆରରେ ୪୬ ପ୍ରତିଶତ ଆସନ ରହିଥିବାବେଳେ କେତେକ ଛୋଟ ଦଳର ସମର୍ଥନରେ ସରକାର ଚାଲିଛି। ସେନା ସହାୟତା ନେବା ଶାସକ ଦଳ ପାଇଁ ଗୁରୁତର ସ୍ଥିତି ସୃଷ୍ଟି କରିପାରେ ବୋଲି ବିଶେଷଜ୍ଞମାନେ ମତ ଦେଇଛନ୍ତି। ପାକିସ୍ତାନରେ ସେନା କ୍ଷମତା ଦଖଲ କରିବା ନୂଆ କଥା ନୁହେଁ। ୭ ଦଶନ୍ଧିର ଇତିହାସରେ ଅଧିକାଂଶ ସମୟ ସୈନ୍ୟବାହିନୀ ପାକିସ୍ତାନକୁ ଶାସନ କରିଛି। ନୂଆ ପାକିସ୍ତାନ ଗଠନର ପ୍ରତିଶ୍ରୁତି ଦେଇ ୨୦୧୮ରେ କ୍ଷମତାକୁ ଆସିଥିତ୍ଲେ ଇମ୍ରାନ୍। ତେବେ ପ୍ରତିଶ୍ରୁତି ପାଳନରେ ତାଙ୍କ ସରକାର ସମ୍ପୂର୍ଣ୍ଣ ବିଫଳ ହୋଇଛନ୍ତି। ଗୁରୁତ୍ୱପୂର୍ଣ୍ଣ ପଦବୀରେ ଅଧିକରୁ ଅଧିକ ସେନା ଅଧିକାରୀଙ୍କୁ ନିଯୁକ୍ତି ପ୍ରଦାନ ଯୋଗୁ ଦେଶର ବିକାଶ ଓ ଶାସନ ପରିଚାଳନାରେ ନାଗରିକଙ୍କର ଯେଉଁ ସ୍ଥାନ ଥିଲା ତାହା ସଙ୍କୁଚିତ ହେବାରେ ଲାଗିଛି ବୋଲି ଆଟଲାଣ୍ଟିକ୍ କାଉନସିଲ୍ର ଅଣଆବାସିକ ବରିଷ୍ଠ ଗବେଷକ ଉଜେର୍ ୟୁନୁସ୍ କହିଛନ୍ତି। କରୋନା ମହାମାରୀର ମୁକାବିଲା ସମ୍ପର୍କରେ ସରକାର ଟେଲିଭିଜନରେ ବିବୃତି ଦେଉଥିବାବେଳେ ସେଠାରେ ସେନା ଅଧିକାରୀଙ୍କୁ ଦେଖିବାକୁ ମିଳୁଛି। ଅବସରପ୍ରାପ୍ତ ଲ୍ୟୁଟନାଣ୍ଟ ଜେନେରାଲ ଅସିମ୍ ସଲିମ ବଜଓ୍ବା ଏବେ ପ୍ରଧାନମନ୍ତ୍ରୀଙ୍କ ଯୋଗାଯୋଗ ଉପଦେଷ୍ଟା ରହିବା ସହ ଚାଇନାର ବେଲ୍ଟ ଆଣ୍ଡ ରୋଡ୍ ଇନିସିଏଟିଭ୍ରେ ପାକିସ୍ତାନର ୬୦ ବିଲିୟନ ଡଲାର ପୁଞ୍ଜିନିବେଶ କାର୍ଯ୍ୟକାରିତାର ତଦାରଖ କରୁଛନ୍ତି। କ୍ୟାବିନେଟରେ ୧୨ ସେନା ଅନୁଗତ ରହିଛନ୍ତି। ସେମାନେ ପୂର୍ବତନ ସାମରିକ ଶାସକ ପରଭେଜ୍ ମୁଶରଫଙ୍କ ପ୍ରଶାସନରେ ମଧ୍ୟ ଥିଲେ। ଇଜାଜ୍ ଶାହ ଗୃହମନ୍ତ୍ରୀ ଥିବାବେଳେ ଅବଦୁଲ ହଫିଜ ଶେଖ୍ ପ୍ରଧାନମନ୍ତ୍ରୀଙ୍କ ଅର୍ଥନୈତିକ ଉପଦେଷ୍ଟା ଅଛନ୍ତି। ସେହିପରି ନୂଆ ପାକିସ୍ତାନ ହାଉସିଂ ପ୍ରୋଗ୍ରାମ୍ ଟାସ୍କଫୋର୍ସର ସଦସ୍ୟ ଥିବା ଜୈଘାମ୍ ରିଜ୍ଭି ପ୍ରଧାନମନ୍ତ୍ରୀ ଇମ୍ରାନ୍ଙ୍କ ମୁଖ୍ୟ ଅର୍ଥନୈତିକ ପ୍ରକଳ୍ପକୁ ପରିଚାଳନା କରୁଛନ୍ତି। ଏହି ସଂସ୍ଥାରେ ଦୁଇ ସେନା ଅଧିକାରୀଙ୍କୁ ଗତ ମାସରେ ନିଯୁକ୍ତି ଦିଆଯାଇଛି। ସେନାର ବ୍ୟବସ୍ଥା ଭଲ ଥିବାରୁ ଏହାକୁ ସରକାରରେ ଅଧିକ ନେତୃତ୍ୱ ଦିଆଯିବା ସପକ୍ଷରେ ରାଜ୍ଭି ଯୁକ୍ତି ବାଢ଼ିଛନ୍ତି। ତେବେ ପାକ୍ ସୈନ୍ୟବାହିନୀ ପକ୍ଷରୁ କୌଣସି ମନ୍ତବ୍ୟ ଦିଆଯାଇନାହିଁ। ତେବେ ସୈନ୍ୟବାହିନୀର ଅଧିକ ନିକଟତର ହେଉଥିବା ଅଭିଯୋଗକୁ ଇମ୍ରାନ୍ ଖଣ୍ଡନ କରିଆସିଛନ୍ତି।
