ମୁମ୍ବାଇ: ବଲିଉଡ୍ ଫିଲ୍ମ ନିର୍ମାତା ଅନୁରାଗ କଶ୍ୟପ କିଛିଦନ ହେବ ସୋସିଆଲ ମିଡିଆରୁ ଦୂରେଇ ରହିଥିବା ବେଳେ ଏବେ ପୁଣିଥରେ ସୋସିଆଲ ମିଡିଆରେ ଯୋଡି ହୋଇଯାଇଛନ୍ତି। ସବୁବେଳେ ସେ ବିବାଦୀୟ ବୟାନ ଦେଇ ଚର୍ଚ୍ଚାରେ ରହୁଥିବା ବେଳେ ଏଥର ମଧ୍ୟ ସେମିତି ଏକ ବିବାଦୀୟ ବୟାନ ପାଇଁ ଆସିଛନ୍ତି ଚର୍ଚ୍ଚାକୁ। ଏଥର ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ‘ଅହଙ୍କାରୀ’ ଓ ‘ନିରକ୍ଷର’ ବୋଲି କହିଛନ୍ତି। ଗତବର୍ଷ ଡିସେମ୍ବରରେ ନାଗରିକତ୍ୱ ସଂଶୋଧନ ଆଇନ(ସିଏଏ) ଅନୁମୋଦନ ହେବା ପରେ ପ୍ରଥମଥର ଲାଗି ଏହାକୁ ନେଇ ମୋଦି ସରକାରଙ୍କୁ ଟାର୍ଗେଟ କରିଛନ୍ତି ଅନୁରାଗ। ସେ ଟୁଇଟ୍ କରି କହିଛନ୍ତି, ମୋଦି ସରକାର ସିଏଏକୁ ଫେରାଇ ନେଇ ପାରିବେ ନାହିଁ। କାରଣ ଏମିତି କଲେ ଏହା ତାଙ୍କ ପାଇଁ ପରାଜୟ ହେବ ବୋଲି ସେ କହିଛନ୍ତି। କେନ୍ଦ୍ର ସରକାର ସବୁ କଥାକୁ ବିଜୟ-ପରାଜୟ ଦୃଷ୍ଟିରେ ଦେଖିଥାଆନ୍ତି। ଏମାନଙ୍କର ଏତେ ଗର୍ବ ଯେ ଏଥିରେ ସବୁ ଜଳିପୋଡି ପାଉଁଶ ହୋଇଯିବ ବୋଲି ଅନୁରାଗ କହିଛନ୍ତି। ମୋଦି କେବେ ଭୁଲ୍ ହୋଇ ପାରିବେନି, କାରଣ ପାଠ ପଢି ନ ଥିବା ଲୋକେ ହିଁ ଏମିତି କାମ କରନ୍ତି ବୋଲି ଅନୁରାଗ ଟୁଇଟ୍ କରିବା ପରେ ଏବେ ଏହାର ଉତ୍ତର ରଖୁଛନ୍ତି ସୋସିଆଲ ମିଡିଆ ୟୁଜର୍ସ। ଏହାପରେ ଜଣେ ୟୁଜସଙ୍କ ପ୍ରଶ୍ନର ଉତ୍ତରରେ ଅନୁରାଗ କହିଛନ୍ତି, କ୍ଷମା କରିବେ, ମୁଁ କାହାକୁ ଆକ୍ଷେପ କରି ଏହା କହିନାହିଁ। ମୋର କହିବାର ଅର୍ଥ ମଧ୍ୟ ସେମିତି କିଛି ନକରାତ୍ମକ ନ ଥିଲା। ଆପଣ ମୋତେ ବୁଝିବାକୁ ଚେଷ୍ଟା କରନ୍ତୁ। କ୍ଷମା ତ ସେତେବେଳେ ମଗାଯାଏ ଯେତେବେଳେ କାହାର ଅପମାନ କରାଯାଏ। ସୂଚନାଯୋଗ୍ୟ, ଅନୁରାଗଙ୍କ କ୍ଷେତ୍ରରେ ଏହା ପ୍ରଥମ ଘଟଣା ନୁହେଁ। ଏହା ପୂର୍ବରୁ ମଧ୍ୟ ସେ କେନ୍ଦ୍ର ସରକାରଙ୍କୁ ଅନେକ ଥର ଏମିତି କଥା କହି ଟ୍ରୋଲ୍ ହୋଇଛନ୍ତି।
