ବାଲେଶ୍ୱର ଅଫିସ, ୪।୬-ବାଲେଶ୍ୱର ସହରରେ ଗତ ରବିବାର କେନ୍ଦ୍ର ଅଣୁ, କ୍ଷୁଦ୍ର ଏବଂ ମଧ୍ୟମଉଦ୍ୟୋଗ, ମତ୍ସ୍ୟ, ପ୍ରାଣୀବିକାଶ ଏବଂ ଗୋପାଳନ ରାଷ୍ଟ୍ରମନ୍ତ୍ରୀ ତଥା ବାଲେଶ୍ୱର ଏମ୍ପି ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କ ନିଖୋଜ ପୋଷ୍ଟର ଲାଗିଥିଲା। ଉକ୍ତ ପୋଷ୍ଟରକୁ ଫଟୋ ଉଠାଇ ଫେସବୁକ୍ରେ ଅପଲୋଡ୍ କରିଥିବା ୫ଜଣଙ୍କ ନାମରେ ଜିଲା ଭାଜପା ପକ୍ଷରୁ ସହଦେବଖୁଣ୍ଟା ମଡେଲ ଥାନାରେ ଏତଲା ଦିଆଯାଇଥିଲା। ପୋଲିସ ତନ୍ମଧ୍ୟରୁ କଂଗ୍ରେସର ୨ଜଣ ଯୁବନେତାଙ୍କୁ ଗିରଫ କରି କୋର୍ଟଚାଲାଣ କରିଛି। ଉକ୍ତ ଘଟଣାକୁ ବାଲେଶ୍ୱର କଂଗ୍ରେସ ପକ୍ଷରୁ ତୀବ୍ର ନିନ୍ଦା କରାଯାଇଥିବା ବୁଧବାର ଏକ ପ୍ରେସ୍ ବିବୃତିରେ ଜଣାଇଛନ୍ତି। ମହାମାରୀ କରୋନା ଏବଂ ବାତ୍ୟା ‘ଅମ୍ଫନ’ ସମୟରେ କେନ୍ଦ୍ରମନ୍ତ୍ରୀ ବାଲେଶ୍ୱର ସଂସଦୀୟ କ୍ଷେତ୍ରରେ ନ ଥିବା କାରଣରୁ ଏହା ଏକ ଅଭିନବ ପ୍ରତିବାଦ। ପୋଷ୍ଟର ଲଗାଇବା ପଛରେ କାହାର ହାତ ରହିଛି ପୋଲିସ ସେମାନଙ୍କୁ ଗିରଫ ନ କରି ଫେସବୁକ୍ରେ ଅପଲୋଡ୍ କରିଥିବା ୨ଯୁବନେତାଙ୍କୁ ଗିରଫ କରିବା ଗଣତନ୍ତ୍ର ବିରୋଧୀ ଏବଂ ଅସହିଷ୍ଣୁତାର ପରିଚାୟକ ବୋଲି କଂଗ୍ରେସ ପକ୍ଷରୁ କୁହାଯାଇଛି।
