ଭଞ୍ଜନଗର,୪।୬(ଡି.ଏନ.ଏ)-କିଛିଦିନ ପୂର୍ବେ ସହରଗୁଡ଼ିକର ପରିମଳ ସେବାକୁ ସୁଧାରିବା ପାଇଁ ଜିଲାସ୍ତରୀୟ ଏକ ସମୀକ୍ଷା ହୋଇଥିଲା। ମାତ୍ର ଭଞ୍ଜନଗର ସହରରେ ୪ ମାସ ହେବ ପରିମଳ ସେବା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଥିବା ବେଳେ ଏହାକୁ ସୁଧାରିବା ପାଇଁ ଧ୍ୟାନ ଦିଆଯାଉନାହିଁ। ନିର୍ବାହୀ ଅଧିକାରୀ ଓ କର୍ମଚାରୀଙ୍କ ମଧ୍ୟରେ ବିଭିନ୍ନ କାରଣରୁ ସମନ୍ବୟର ଅଭାବ ରହୁଛି । ଯେଉଁଥିପାଇଁ ସହରରେ ସଫେଇ କାର୍ଯ୍ୟ ଠିକ୍ ଭାବେ ହୋଇ ପାରୁନାହିଁ । ସହରରେ ବିପର୍ଯ୍ୟପ୍ତ ପରିମଳ ସେବା ନେଇ ସୋମବାର ଧରିତ୍ରୀରେ ଏକ ଖବର ପ୍ରକାଶ ପାଇଥିଲା। ଏହାପରେ ଭଞ୍ଜନଗର ଉପଖଣ୍ଡ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି। ସୋମବାର ଉପ ଜିଲାପାଳ ରାଜେନ୍ଦ୍ର କୁମାର ମିଞ୍ଜ ଅଚାନକ ବିଭିନ୍ନ ଅଞ୍ଚଳ ବୁଲି ବିପର୍ଯ୍ୟସ୍ତ ପରିମଳ ବ୍ୟବସ୍ଥା ଦେଖିଛନ୍ତି। ସହରର ଶ୍ରୀରାମସାହି, ଆରସିରୋଡ଼, ପୁରୁଣାବଜାରସାହି, ଏଲଆଇସି କଲୋନୀ, ରାଜସ୍ବ ବିଭାଗ କଲୋନୀ ଆଦି ଅଞ୍ଚଳରେ ବିପର୍ଯ୍ୟପ୍ତ ପରିମଳ ଦେଖି ବିରକ୍ତି ପ୍ରକାଶ କରିଥିଲେ। ଏକ ସପ୍ତାହ ମଧ୍ୟରେ ଏହାକୁ ସୁଧାରିବା ପାଇଁ ବିଭାଗୀୟ କର୍ମଚାରୀଙ୍କୁ ନିର୍ଦ୍ଦେଶ ଦେଇଥିଲେ। ଅବହେଳା କଲେ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପ ଜିଲାପାଳ ସୂଚାଇ ଦେଇଥିଲେ । ଯେଉଁଠି ଲୋକେ ଡ଼୍ରେନକୁ ଅବରୋଧ କରି ରଖିଛନ୍ତି ସେଠାରେ ୭ଦିନ ମଧ୍ୟରେ ଜବରଦଖଲ ଉଚ୍ଛେଦ ପାଇଁ ନିଷ୍ପତ୍ତି ହୋଇଛି । ଉପ ଜିଲାପାଳଙ୍କ ଗସ୍ତ ସମୟରେ ଏନଏସି ଯନ୍ତ୍ରୀ ସୁଶାନ୍ତ କୁମାର ସାହୁ ଓ ଅନ୍ୟମାନେ ଉପସ୍ଥିତ ଥିଲେ । ନିର୍ବାହୀ ଅଧିକାରୀ କୈଣସି କାରଣରୁ ଅନୁପସ୍ଥିତ ଥିଲେ। ଏ ନେଇ ଏନଏସି ଯନ୍ତ୍ରୀ ସାହୁଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ସୁନ୍ଦର ସହର ଗଢ଼ି ତୋଳିବା ପାଇଁ ପଦକ୍ଷେପ ନିଆଯାଇଛି । ଆଗାମୀ ଦିନରେ ସହରର ସମସ୍ତ ଘରକୁ ୨ଟି ଲେଖାଏ ଡ଼ବା ଯୋଗାଇ ଦିଆଯିବ। ଉକ୍ତ ଡ଼ବାରେ ଲୋକେ ମଇଳା ରଖିବେ । ଉକ୍ତ ମଇଳା ସଂଗ୍ରହ ପାଇଁ ଏନଏସିର ୨ଟି ଗାଡ଼ି ଘର ଘର ବୁଲିବ। ଏଥିସହ ଆଗାମୀ ଦିନରେ ବଜ୍ୟବସ୍ତୁ ପରିଚାଳନା ପାଇଁ ଆବଶ୍ୟକ ପଦକ୍ଷେପ ନିଆଯିବ। କମ୍ ଦିନ ମଧ୍ୟରେ ସହରର ବିପର୍ଯ୍ୟସ୍ତ ପରିମଳ ସେବାକୁ ସୁଧାରି ଦିଆଯିବ ବୋଲି ସାହୁ କହିଛନ୍ତି ।
