ବ୍ରହ୍ମପୁର ଅଫିସ,୧୨ା୧୧-ବ୍ରହ୍ମପୁର ସହରକୁ ସବୁଜ, ସୁନ୍ଦର ସହ ସ୍ମାର୍ଟ ସିଟିରେ ପରିଣତ କରିବାକୁ ନେଇ ବ୍ରହ୍ମପୁର ମହାନଗର ନିଗମ ପକ୍ଷରୁ ବହୁ ପଦକ୍ଷେପ ଗ୍ରହଣ କରାଯାଉଛି ା ରାସ୍ତା, ଡ୍ରେନ୍ ମରାମତି ଦିଗରେ ଅବହେଳା କରାଯାଉଥିବା ଅଭିଯୋଗ ହୋଇଛି ା
ବିଶେଷ କରି ଓଡିଆର୍ପି(ଓଡିଶା ବିପର୍ଯ୍ୟୟ ଥଇଥାନ ପ୍ରକଳ୍ପ)ରେ ନିର୍ମିତ ହେବାକୁ ଥିବା ସବରେଜିଷ୍ଟ୍ରାର ଅଫିସରୁ ପ୍ରେମନଗର ମୁଖ୍ୟରାସ୍ତା ଦେଇ ଆମ୍ବମାର୍କେଟ ପର୍ଯ୍ୟନ୍ତ ଡ୍ରେନ୍ ଓ ରାସ୍ତା ନିର୍ମାଣରେ ବିଳମ୍ବ ଯୋଗୁ ଅନେକ ସମୟରେ ଛୋଟ ବଡ ଦୁର୍ଘଟଣା ଘଟୁଥିବା ଅଭିଯୋଗ ହୋଇଛି। ଅନେକ ସମୟରେ ଯାତାୟାତ ବେଳେ ଯାନବାହନ, ଶିଶୁ ଓ ଅଞ୍ଚଳବାସୀ ଡ୍ରେନ୍ ପାଇଁ ଖୋଳା ଯାଇଥିବା ଗାତରେ ପଡି ଆହତ ହେଉଛନ୍ତି। ସୋମବାର ବିଏମ୍ସିର ଗାଡି (ନଂ-ଓଡି୦୭ଏସ୬୮୬୯) ଖୋଳାଯାଇଥିବା ଗାତରେ ଓଲଟି ପଡିଥିବା ଦେଖିବାକୁ ମିଳିଥିଲା।
ପ୍ରେମନଗର ମୁଖ୍ୟରାସ୍ତାର ଉଭୟ ପାର୍ଶ୍ୱରେ ଡ୍ରେନ୍ ନିର୍ମାଣ ପାଇଁ ୬ ମାସ ପୂର୍ବରୁ ଜବରଦଖଲ ଉଚ୍ଛେଦ କରାଯିବା ସହ ପ୍ରାୟ ୫ ରୁ ୬ ଫୁଟ ଗାତ ଖୋଳାଯାଇଥିଲା। କିନ୍ତୁ ଏଯାଏ ତାର କାର୍ଯ୍ୟ ଆରମ୍ଭ ହୋଇ ନ ଥିବାରୁ ଗାତଟି ଏବେ ଅଞ୍ଚଳବାସୀଙ୍କ ପାଇଁ ବିପଦ ସୃଷ୍ଟି କରିଛି ା ମୁଖ୍ୟରାସ୍ତା ପାର୍ଶ୍ୱରେ ବାସ କରୁଥିବା ପରିବାର ବର୍ଗଙ୍କୁ ନିଜ ଘରକୁ ଯିବାକୁ କାଠ, ବାଉଁଶର ସାହାରା ନେବାକୁ ପଡୁଛି। ଅନେକ ସମୟରେ ଲୋକେ ଗାତରେ ପଡି ଆହତ ହେଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ସେହିପରି ପ୍ରେମନଗର ମୁଖ୍ୟରାସ୍ତାରେ ଟ୍ରାଫିକ ସମସ୍ୟା ସୃଷ୍ଟି ହେଉଥିବା ଲୋକେ କହିଛନ୍ତି। ପ୍ରେମନଗର ଡ୍ରେନ୍ ଓ ରାସ୍ତା ନିର୍ମାଣ କାର୍ଯ୍ୟ ଶୀଘ୍ର ଶେଷ କରିବାକୁ ବିଭିନ୍ନ ମହଲରେ ଦାବି ହୋଇଛି ା ସେହିପରି ଖାଲରେ ଗାଡି ଡ୍ରାଇଭର ଭାରସାମ୍ୟ ହରାଇବା ଯୋଗୁ ଓଲଟି ପଡିଥିଲା। ତେବେ ଖବର ମିଳିବା ପରେ କ୍ରେନ ଦ୍ୱାରା ବାହାର କରାଯାଇଥିବା କମିଶନର ଚକ୍ରବର୍ତ୍ତୀ ସିଂ ରାଠୋର କହିଛନ୍ତି ା ଏଥିସହ ବର୍ତ୍ତମାନ ଓଡିଆରପିରେ ଚାଲିଥିବା ସବରେଜିଷ୍ଟ୍ରାର ଅଫିସରୁ ପ୍ରେମନଗର ଦେଇ ଆମ୍ବମାର୍କେଟ ପର୍ଯ୍ୟନ୍ତ ରାସ୍ତା ଓ ଡ୍ରେନ୍ ନିର୍ମାଣ କାର୍ଯ୍ୟ ଆସନ୍ତା ମାର୍ଚ୍ଚ ସୁଦ୍ଧା ଶେଷ ହେବ ବୋଲି କମିଶନର ସୂଚାଇଛନ୍ତି ା
