ବିନିକା, ୧୮।୧ (ଡି.ଏନ୍.ଏ.)-
ସୁବର୍ଣ୍ଣପୁର ଜିଲା ବିନିକା ବ୍ଲକ ସିଂହିଯୁବା ପଁଚେତ୍ ଅଧୀନ ଜାମପାଲି ଗଁାର କେନାଲ ପଡ଼ା, ଟାଙ୍ଗର ପଡ଼ା ଆର ଜଙ୍ଗଲ ପଡ଼ାରେ ଅନେକ ବଛର ହେଲା ରହିଆସୁଛନ୍ ସିଦ୍ରିଆ ସମାଜର ୫୦ ପରିବାରର ପାଖାପାଖି ୩ଶହ ଲୋକ୍। ସମାଜର ବଡ଼ଭାଗି ଲୁକ୍କର ଜମିବାଡ଼ି ନଁାଇଁନ, ସରକାରନୁ ପାଇଥିବାର ୫ ଡେସିମିଲ ଜାଗାରେ ଘରର କରି ବଛର ବଛର ହେଲା ରହିଆସୁଛନ୍। ନିଜର କଉଲିକ୍ ବୁର୍ତି ହିସାବେ ପିତଲର ମାନ, ତାମ୍ବି, ଭିନେ ଭିନେ ଦେବାଦେବୀ ମୁର୍ତି ତିଆରି ବିକାଭଂଗା କରି ଚଲୁଛନ୍। ଆରକେତେ କୁଲିମଜୁରି କରି କୁଟୁମ ପୁଷୁଛନ୍। ଇ ସମାଜର ଲୋକ୍ କହୁଥିବାର ଭାଷା ବି ଭିନେ, ଯେନ୍ଟା ଝନେ ସାଧାରନ୍ ଲୋକ୍ ବୁଝି ନିପାରେ। ଗଁାରେ ବଡ଼ଭାଗି ଲୋକ୍ ଅଶିକ୍ଷିତ। ସମାଜର ୩୦ରୁ ଅଧ୍କା ଛୁଆ ୫ମରୁ ୭ମ ଭିତ୍ରେ ପାଠ୍ପଢ଼ା ଛାଡ଼ିଛନ୍। ସେନ୍ତା ଆଏଜ୍ତକ ଗଁାର ୩ ଝନ୍ ପିଲା ହେମନ୍ତ ଝରା, ସୁଶାନ୍ତ ଝରା, ପ୍ରଶାନ୍ତ ଝରା କଲେଜର ମାଏଟ୍ ମାଡ଼ି ପାରିଛନ୍। ଇତାର ମୂଲ କାରନ୍ ସିଦ୍ରିଆ ଭାଷା ଅଲଗ ହେଇଥିଲାବେଲେ ସ୍କୁଲରେ ଛୁଆମାନକୁ ଓଡ଼ିଆ ଭାଷାଥି ପଢ଼ାଯାଉଛେ। ଯେନ୍ଟା ଛୁଆକର ମଗଜରେ ନାଇଁ ପଶବାର ବଲି କେତେ ଅଭିଭାବକ ଆର କଲେଜର ମାଏଟ୍ ମାଡ଼ିଥିବାର ଯୁବକମାନେ କହିଛନ୍। ଯେନ୍ଥିରଲାଗି ଇ ସମାଜର ଅନେକ ପିଲା ଶିକ୍ଷା ଲେଖେଁ ଗୁଟେ ଗୁରୁତ୍ ବିଷେରୁ ଦିନୁଦିନ୍କେ ଦୂରେଇ ଯାଉଛନ୍। ଶିକ୍ଷାଦିକ୍ଷା ଅଭାବୁ ସମାଜରେ ଆଏଜ୍ ବି ଅନେକ୍ କୁସଁସ୍କାର ରହିଛେ। ସରକାର ନାବାଲିକ ବିହାକେ ବେଆଇନ୍ ଘୋଷନା କରିଛନ୍। ଇ ଦିଗେ ସଚେତନତା ଲାଗି ଅନେକ ସ୍ବେଚ୍ଛାସେବୀ ସଂଗଠନ ବି କାମ୍ କରୁଛନ୍। ହେଲେ ଶିକ୍ଷାର ଅଭାବ୍ରୁ ଇ ସମାଜରେ ଆଏଜ୍ ବି ନାବାଲିକ, ନାବାଲକ ବିହାର ପରଚଲନ ଥିବାର ଖବର ଠୁଲାଲାବେଲେ ଜନାପଡ଼ିଛେ। ଇତାର ବାହାରେ ଇ ସମାଜର ଲୋକ୍ ଏସ୍.ସି, ଏସ୍.ଟି, ଓ.ବି.ସି. କି ସାଧାରନ ଭେଲିରେ ଯିବେ ସେଟା ଆଏଜ୍ତକ ଜାନି ନାଇଁପାରବାର। ଥାନୀଅ ପରଶାସନ ପାସେ ବି ଇତାର ଉତର ନଁାଇଁନ। ଯେନ୍ଥିରଲାଗି ଇ ସମାଜର ଲୋକ୍, ଛାତ୍ରୀଛାତ୍ର ସରକାରକଁର ଅନେକ ଜନହିତକର ଯୋଜନାର ଲାଭ୍ ପାଏବାରୁ ବଁଚିତ୍ ହେଉଛନ୍। ୨୦୧୪ ସାଲେ ଇ ଗଁାର ସୁଶାନ୍ତ ଝରା ବିନିକା ତହସିଲରୁ କେଶ୍ (ନଂ. ଇ-ସିଏଏସ୍/୧୫୧୧ ଅଫ୍ ୨୦୧୪)ରେ ଏସ୍.ସି. ଭେଲିର ବଲି ଜାତିଗତ ପରମାନପତର ପାଇଥିଲେ। ହେଲେ ୫ ବଛର ଉତାରୁ ସେ ଉଚ ଶିକ୍ଷା ଲାଗି ଯେତେବେଲେ ଆରଘାଏ ଆବେଦନ କଲେ ତାହାକୁ ମନା କରିଦିଆଗଲା ବଲି ସେ କହିଛନ୍। ଇ ବାବ୍ଦେ ସିଂଘିଯୁବା ରାଜସ୍ବ ନିରୀକ୍ଷକ ସରୋଜ ବାଘକୁଁ ପଚ୍ରାଲାରୁ ସିଦ୍ରିଆମାନେ କେନ୍ ଭେଲିଥି ସାମିଲ ହେବେ ତାର କିଛି ସୂଚନା ଆମ୍କୁ ବିଭାଗୀୟ ଉଚ କତୁରପକ୍ଷ ନାଇଁଦେଇ। ଆଗ୍ରୁ ଝନେ ସିଦ୍ରିଆ ଯୁବକ ଏସ୍.ସି. ଜାତିଗତ ପରମାନପତର ପାଇଥିଲେ। ହେଲେ ସେ କେନ୍ଥେଇ ଆର କାହାର ଜରିଆରେ ପାଇଥିଲେ ସେଟା ମୁଇଁ ନାଇଁ ଜାନି ବଲି ସେ କହିଥିଲେ। ସେନ୍ତା ଇ ବାବ୍ଦେ ବିନିକା ତହସିଲଦାର ତ୍ରୀପୁର ମହାନନ୍ଦକୁଁ ପଚ୍ରାଲାରୁ ୨ ମାସ୍ ହେଲା ମୁଇଁ ଇଠାନକେ ଆସିଛେଁ। ଇ ବିଷେରେ ମୋର ପାସେ କିଛି ସୂଚନା ନଁାଇଁନ। ଇ ଦିଗେ ଜିଲାପାଳ ଯାହା କରବାର କଥା କରିପାରବେ ବଲି ସେ କହିଥିଲେ।
