ବାଲିକୁଦା,୨୨ା୧(ସ୍ବ.ପ୍ର.):ଇ-ଟୋକୋନ ମାଧ୍ୟମରେ ଚାଷୀ ମଣ୍ଡିରେ ଧାନ ବିକ୍ରି କରିବା ପାଇଁ ଯୋଗାଣ ବିଭାଗ ପକ୍ଷରୁ ବ୍ୟବସ୍ଥା କରାଯାଇଛି। ଏହିକ୍ରମରେ ବାଲିକୁଦାର ସମସ୍ତ ସମବାୟ ସମିତିରେ ଏହି ବ୍ୟବସ୍ଥା ଲାଗୁ କରାଯାଇଛି। ମାତ୍ର ଧାନ ସଂଗ୍ରହରେ ୩ଟି ସଂସ୍ଥାର ଦାୟିତ୍ୱ ଥିବାବେଳେ ମୁଖ୍ୟତ ଯୋଗାଣ ବିଭାଗ ଓ ମିଲରଙ୍କ ଗୁରୁଦାୟିତ୍ୱ ରହିଛି। କାରଣ ମଣ୍ଡିରୁ ମିଲରମାନେ ସମବାୟ ସମିତି ମାଧ୍ୟମରେ ଧାନ ସଂଗ୍ରହ କରୁଛନ୍ତି। ଯୋଗାଣ ବିଭାଗ ଜରିଆରେ ଚାଷୀଙ୍କ ଆକାଉଣ୍ଟକୁ ଟଙ୍କାଯାଉଛି। କିନ୍ତୁ ଚଳିତ ବର୍ଷ ମିଲର ଓ ଯୋଗାଣ ବିଭାଗ ମଧ୍ୟରେ ସମନ୍ବୟ ଅଭାବ ଦେଖିବାକୁ ମିଳିଛି। ଯାହାର ଉଦାହରଣ ହେଉଛି, ବାଲିକୁଦା ସମୁଦ୍ର ଉପକୂଳ ଅନନ୍ତପୁର ସେବା ସମବାୟ ସମିତି ମଣ୍ଡିରେ। ଏହି ମଣ୍ଡିରୁ ସମ୍ବଲପୁର ହନୁମାନଜୀଉ ରାଇସ ମିଲ ଧାନସଂଗ୍ରହ ପାଇଁ ଯୋଗାଣ ବିଭାଗର ଅନୁମତି ପାଇଛି। ଗତ ୧୭ ତାରିଖରେ ଚାଷୀଙ୍କୁ ଧାନ ବିକ୍ରି କରିବା ପାଇଁ ଇଟୋକନ ମାଧ୍ୟମରେ ଅନୁମତି ଦିଆଯାଇଛି। ମାତ୍ର ଏନେଇ ମିଲରଙ୍କ ସାଙ୍ଗରେ ଯୋଗାଣ ବିଭାଗ କୌଣସି ଆଲୋଚନା କରି ନ ଥିବା ଜଣାପଡିଛି। କାରଣ ଏହି ସମିତିର ଯେଉଁ ଚାଷୀ ଟୋକନ ପାଇଥିଲେ ସେମାନେ ୨୦ତାରିଖରୁ ମଣ୍ଡିରେ ଧାନ ଆଣି ରଖିଛନ୍ତି। ମାତ୍ର ଦୁଇ ଦିନ ହେବ ମିଲରଙ୍କ ଦେଖାନାହିଁ। ୧୭ ତାରିଖରେ ଯୋଗାଣ ବିଭାଗ ପକ୍ଷରୁ ଯେଉଁ ଟୋକନ କରାଯାଇଥିଲା ସେହି ଚାଷୀଙ୍କ ଧାନ ଏବେ ମଣ୍ଡିରେ ପଡି ରହିଛି। ଶୀତ କାକରରେ ଚାଷୀ ଏବେ ମଣ୍ଡି ଆଗରେ ବସି ରହିଛନ୍ତି। ଏପଟେ ଯୋଗାଣ ବିଭାଗ ପୁଣି ୨୨ ତାରିଖରେ ଧାନ ଦେବାକୁ ଆଉ ୨୫ ଜଣ ଚାଷୀଙ୍କୁ ଟୋକନ ପ୍ରଦାନ କରିଛି। ତୁରନ୍ତ ବିଭାଗୀୟ ଅଧିକାରୀ ଏଥିପ୍ରତି ଦୃଷ୍ଟି ଦେଇ ମଣ୍ଡିରୁ ଧାନ ଉଠାଇବା ପାଇଁ ବ୍ୟବସ୍ଥା କରାଇବାକୁ ଚାଷୀ ଦାବି କରିଛନ୍ତି। ନଚେତ ଚାଷୀ ଅନ୍ଦୋଳନାତ୍ମକ ପନ୍ଥା ଅବଲମ୍ବନ କରିବେ ବୋଲି ଚେତାବନୀ ଦେଇଛନ୍ତି। ଏସମ୍ପର୍କରେ ସମ୍ପୃକ୍ତ ମିଲରଙ୍କ ସହିତ ଯୋଗଯୋଗ କରିବାରୁ ଆମକୁ ୭ରୁ୮ଟି ମଣ୍ଡିରୁ ଧାନ ସଂଗ୍ରହ ପାଇଁ ବିଭାଗ ପକ୍ଷରୁ ନିର୍ଦ୍ଦେଶ ଆସିଛି। ତେଣୁ ଧାନ ଉଠାଇବା ପାଇଁ ଗାଡିର ଅଭାବ ରହୁଛି। ସେଥିପାଇଁ ଆମେ ଧାନ ଉଠାଇ ପାରିନାହୁଁ। ତଥାପି ବୁଧବାର ୨ଟି ଗାଡିରେ କିଛି ଧାନ ନେବା ପାଇଁ ଚେଷ୍ଟା କରୁଛୁ ବୋଲି କହିଥିଲେ। ଏସମ୍ପର୍କରେ ବାଲିକୁଦା ଯୋଗାଣ ବିଭାଗ ଅଧିକାରୀ ବିଜୟ ସିଂ ପଚାରିବାରୁ ମିଲର ଯଦି ବୁଧବାର ଧାନ ନ ଉଠାନ୍ତି ତେବେ ତାଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ବୋଲି କହିଥିଲେ।
