ମୁମ୍ବାଇ,୧୮।୧(ପି.ଟି.): ହିନ୍ଦୁତ୍ୱ ବିଚାରଧାରା ସମ୍ପନ୍ନ ଭି.ଡି. ସଭର୍କରଙ୍କୁ ଭାରତରତ୍ନ ପ୍ରଦାନ କରିବା ଲାଗି ଶିବସେନା ନେତା ସଞ୍ଜୟ ରାଉତ ଦାବି କରିଛନ୍ତି। ଏହାକୁ ବିରୋଧ କରୁଥିବା ଲୋକେ ସଭର୍କର ରହିଥିବା ଆଣ୍ଡାମାନ ସେଲୁଲାର୍ ଜେଲରେ ୨ ଦିନ କାଟନ୍ତୁ ବୋଲି ସେ ପ୍ରକାଶ କରିଛନ୍ତି। ପ୍ରକାଶଥାଉ କି, ସଭର୍କରଙ୍କୁ ଦେଶର ସର୍ବୋଚ୍ଚ ବେସାମରିକ ସମ୍ମାନ ଭାରତରତ୍ନ ଦେବାକୁ କଂଗ୍ରେସ ବିରୋଧ କରିଆସୁଛି। ମହାରାଷ୍ଟ୍ରରେ କଂଗ୍ରେସ, ଏନ୍ସିପି ସହ ଶିବସେନା ମେଣ୍ଟ ସରକାର ଗଠନ କରିଥିବାବେଳେ ସଭର୍କର ପ୍ରସଙ୍ଗ ଅଡ଼ୁଆ ବଢ଼ାଇଛି। ୨୦୧୯ ଡିସେମ୍ବରରେ କଂଗ୍ରେସ ନେତା ରାହୁଲ ଗାନ୍ଧୀ ‘ରେପ୍ ଇନ୍ ଇଣ୍ଡିଆ’ ମନ୍ତବ୍ୟ ଦେଇ ବିବାଦ ଘେରକୁ ଆସିଥିବାବେଳେ ଭୁଲ୍ ମାଗିବାର ପ୍ରଶ୍ନ ଉଠିନି କହି ‘ମୋ ନାମ ରାହୁଲ ଗାନ୍ଧୀ, ରାହୁଲ ସଭର୍କର ନୁହେଁ’ ବୋଲି ମନ୍ତବ୍ୟ ଦେଇଥିଲେ। ଏବେ ରାଉତଙ୍କ ମନ୍ତବ୍ୟ ପରେ ଶିବସେନା ନେତା ତଥା ମନ୍ତ୍ରୀ ଆଦିତ୍ୟ ଠାକ୍ରେ ମୁହଁ ଖୋଲିଛନ୍ତି। ମେଣ୍ଟ ସରକାର ଲୋକଙ୍କ ସେବାକରିବା ଲାଗି ଆସିଛି ଓ ଅନେକ ରତ୍ନ ଦେଶରେ ଅଛନ୍ତି। ହେଲେ କାହାକୁ ଏହି ସମ୍ମାନ ପ୍ରଦାନ କରାଯିବ ତାହା କେନ୍ଦ୍ରର ଭାଜପା ସରକାର ସ୍ଥିରକରିବ ବୋଲି ସେ ମତ ଦେଇଛନ୍ତି।
