ଜଗତ୍ସିଂହପୁର ଅଫିସ୍, ୧୭।୧:ସତ୍ୟର ଅନ୍ୟ ନାମ ସାମ୍ବାଦିକତା। ଗଣତନ୍ତ୍ରର ୪ର୍ଥ ସ୍ତମ୍ଭ ଗାନ୍ଧୀଙ୍କ ନୀତି ଓ ଆଦର୍ଶକୁ ଅନୁକରଣ କରିବା ଉଚିତ ବୋଲି ଗୁରୁବାର ଏକବିଂଶତମ ଜଗତ୍ସିଂହପୁର ପୁସ୍ତକ ମେଳାର ଦ୍ୱିତୀୟ ସନ୍ଧ୍ୟାରେ ଅନୁଷ୍ଠିତ ସାହିତ୍ୟ ଆସରରେ ଅତିଥି ଭାବେ ଯୋଗଦେଇ ପ୍ରାଧ୍ୟାପକ ଡ. ଅଜୟ କୁମାର ମିଶ୍ର କହିଛନ୍ତି। ଜିଲାପାଳଙ୍କ କାର୍ଯ୍ୟାଳୟ ପରିସର ପଡ଼ିଆରେ ଆୟୋଜିତ ଏହି ସାହିତ୍ୟ ଆସରର ପ୍ରସଙ୍ଗ ଥିଲା ‘ସତ୍ୟର ପଥ ଓ ମହାତ୍ମା ଗାନ୍ଧୀ’। ଏହି ପ୍ରସଙ୍ଗରେ ଡ. ମିଶ୍ର ଏକଥା ମଧ୍ୟ କହିଥିଲେ, ଦେଶ ସ୍ବାଧୀନ ପାଇଁ ଜଗତ୍ସିଂହପୁରର ଅଳକା ଆଶ୍ରମରେ ରଣନୀତି ପ୍ରସ୍ତୁତ କରାଯାଉଥିଲା। ଆଶ୍ରମରେ ବହୁ ସଂଖ୍ୟାରେ ସ୍ବାଧୀନତା ସଂଗ୍ରାମୀ ରହି ତାଲିମ ନେଉଥିଲେ। ଗାନ୍ଧି ଯେତେବେଳେ ଏହି ଆଶ୍ରମରେ ପାଦ ଥାପିଥିଲେ, ସେତେବେଳେ ବିପ୍ଳବୀମାନଙ୍କ ମନରେ ବିପ୍ଳବର ବହ୍ନି ପ୍ରଜ୍ୱଳିତ କରିଥିଲା। ସ୍ବାଧୀନତା ଆନ୍ଦୋଳନରେ ଜଗତ୍ସିଂହପୁରର ଅବଦାନ ଅତୁଳନୀୟ। ରବି ନାରାୟଣ ଦାସ ମଧ୍ୟ ଅତିଥି ଭାବେ ଯୋଗଦେଇ ଗାନ୍ଧୀଙ୍କ ନୀତି ଓ ଆଦର୍ଶ ଉପରେ ବର୍ଣ୍ଣନା କରିଥିଲେ। ସାହିତ୍ୟ ଆସର ଶହୀଦ ପ୍ରସନ୍ନ ସାହୁଙ୍କ ନାମରେ ଉତ୍ସର୍ଗୀକୃତ ହୋଇଥିଲା। ଜଗତ୍ସିଂହପୁର ସାଂସ୍କୃତିକ ପରିଷଦ କାର୍ଯ୍ୟକାରୀ ଅଧ୍ୟକ୍ଷ ବିପ୍ଳବ ଚୌଧୁରୀଙ୍କ ପୌରୋହିତ୍ୟରେ ଆୟୋଜିତ କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ ଡ. ବାବାଜି ଚରଣ ପଟ୍ଟନାୟକ ଯୋଗଦେଇଥିଲେ। ମହାତ୍ମା ଗାନ୍ଧୀ ଗୀତାରୁ ସତ୍ୟର ସନ୍ଧାନ ପାଇଥିଲେ ବୋଲି ଡ. ପଟ୍ଟନାୟକ କହିଥିଲେ। ଡିଆର୍ଡିଏ ପ୍ରକଳ୍ପ ନିର୍ଦ୍ଦେଶକ ସରୋଜକାନ୍ତ ମହାନ୍ତି ଗାନ୍ଧୀଙ୍କ ଚିନ୍ତା ଓ ଚେତନା ଉପରେ ଗୁରୁତ୍ୱାରୋପ କରିଥିଲେ। ଏହି ଅବସରରେ ୨୧ ବର୍ଷ ଧରି ଏହି ପୁସ୍ତକ ମେଳା ଚାଲିଥିବାରୁ ଜଗତ୍ସିଂହପୁର ସାଂସ୍କୃତିକ ପରିଷଦ କର୍ମକର୍ତ୍ତାମାନଙ୍କୁ ସେ ସାଧୁବାଦ ଜଣାଇଥିଲେ। ଅଧ୍ୟାପକ ସୁଧୀର ମହାନ୍ତି ଅତିଥି ପରିଚୟ କରିବା ସହ ସ୍ବାଗତ ଭାଷଣ ଓ ପ୍ରସନ୍ନ ସାହୁଙ୍କ ସ୍ମୃତିଚାରଣ କରିଥିଲେ। ପରିଷଦର ଯୁଗ୍ମ ସମ୍ପାଦକ ନରେଶ ଦାସ ଧନ୍ୟବାଦ ଦେଇଥିଲେ। ଏହି ଅବସରରେ ତୃପ୍ତି ରଞ୍ଜନ ଦାସଙ୍କ ଲିଖିତ ପୁସ୍ତକ ‘ଆକାଂକ୍ଷିତ ସନ୍ଧ୍ୟାଟିଏ’ ଉନ୍ମୋଚିତ ହୋଇଥିଲା। ଶେଷରେ ସାଂସ୍କୃତିକ କାର୍ଯ୍ୟକ୍ରମ ପରିବେଶଣ ହୋଇଥିଲା।
