ରାମନଗର,୨୮।୬: ଆକ୍ସନ ମୁଡରେ ଗଜରାଜ। ଉତ୍ତରାଖଣ୍ଡର ରାମନଗର ନିକଟରେ ଥିବା ଭାକ୍ରାକୋଟରେ କିଛି ହାତୀ ପଲ ଉତ୍ପାତ ମଚାଇଛନ୍ତି। ରାସ୍ତାରେ ଠିଆ ହୋଇଥିବା ପର୍ଯ୍ୟଟକଙ୍କ ଗାଡ଼ିକୁ ଠେଲା ପେଲା କରି ଭାଙ୍ଗି ଦେଇଛନ୍ତି ହାତୀପଲ। ସୂଚନାଯୋଗ୍ୟ ଭକ୍ରାକୋଟ ରାମନଗରରୁ ୨୩ କିଲୋମିଟର ଦୂର ଏବଂ କୋରବେଟ ଟାଇଗର ରିଜର୍ଭ ଓ ଆଲମୋରା ଜଙ୍ଗଲ ମଝିରେ ଅବସ୍ଥିତ। ଏଠାରେ ପ୍ରତିଦିନ ପର୍ଯ୍ୟଟକ ଛୁଟି କାଟିବାକୁ ଆସିଥାନ୍ତି। ତେବେ କିଛି ପର୍ଯ୍ୟଟକ ଏଠାରେ ଛୁଟି ମନାଇବାକୁ ଆସିଥିବା ବେଳେ ରାସ୍ତା ଉପରେ ଗାଡି ରଖି ପାଖରେ ଥିବା ଏକ ରିସୋର୍ଟକୁ ଚାଲିଯାଇଥିଲେ। ସେହି ସମୟରେ ଜଙ୍ଗଲରୁ କିଛି ହାତୀ ପଲ ଆସି କାରକୁ ନିଜ ଗୋଡ଼ ଓ ଶୁଣ୍ଢରେ ଦଳି ଦେଇଥିଲେ। କାରଟି ଭାଙ୍ଗିଯାଇଥିବା ବେଳେ ଭାଗ୍ୟବଶତଃ ସେଥିରେ କେହି ନ ଥିଲେ। ଅପରପକ୍ଷରେ ଆଉ ଏକ କାର ସେହି ବାଟ ଦେଇ ଆସୁଥିବା ବେଳେ ହାତୀଙ୍କ ଉତ୍ପାତ ଦେଖି ପୁଣି ପଛକୁ ଫେରିଯାଇଥିଲା। କିଛି ସମୟ କାର ସହ ଖେଳିବା ପରେ ହାତୀପଲ ପୁଣି ଜଙ୍ଗଲକୁ ଫେରିଯାଇଥିଲେ।
