ବୋଡେନ,୨୨।୯(ଡି.ଏନ.ଏ.)
ନୂଆପଡା ଜିଲା ବୋଡେନ ପୋଲିସ ପକ୍ଷରୁ ଶନିବାର ସଡକ ସୁରକ୍ଷା ସମ୍ପର୍କରେ ଏକ ସଚେତନତା ଶୋଭାଯାତ୍ରା ଅନୁଷ୍ଠିତ ହୋଇଯାଇଛି। ବୋଡେନ ଥାନା ଅଧିକାରୀ ସରୋଜ କୁମାର ମଲ୍ଲିଙ୍କ ନେତୃତ୍ୱରେ ବୋଡେନ ହାଇସ୍କୁଲ ଓ କଲେଜର ଛାତ୍ରୀଛାତ୍ରୀମାନେ ପ୍ଲାକାର୍ଡ ଧରି ବୋଡେନ ହାଇସ୍କୁଲଠାରୁ ବୋଡେନ ବସଷ୍ଟାଣ୍ଡ ପର୍ଯ୍ୟନ୍ତ ଶୋଭଯାତ୍ରାରେ ଯାଇଥିଲେ । ଏହି ରାଲିରେ ବୋଡେନ ସରପଞ୍ଚ ନୃପରାଜ ତାଣ୍ଡି, ସମିତି ସଭ୍ୟ ସୌଦାଗର ସାହୁ, ସଚେତନ ନାଗରିକ ମଞ୍ଚ ସମ୍ପାଦକ ପର୍ଶୁରାମ ସେଠୀ, ବିଜୁ ପଟ୍ଟନାୟକ ଡିଗ୍ରୀ ମହାବିଦ୍ୟାଳୟ ଅଧ୍ୟାପକ କିଶୋର କୁମାର କର୍ଣ୍ଣ ଓ ପୋଲିସ କର୍ମଚାରୀ ପ୍ରମୁଖ ଯୋଗଦାନ କରିଥିଲେ। ଏହା ପରେ ବୋଡେନ ଥାନା ଅଧିକାରୀ ଥାନା ପରିସରରେ ସଡକ ସୁରକ୍ଷା ଉପରେ ସମସ୍ତଙ୍କୁ ବୁଝାଇଥିଲେ । ବିନା ହେଲମେଟରେ ଦୁଇ ଚକିଆ ଗାଡି ଚଲାନ୍ତୁ ନାହିଁ, ଗାଡି ଚଳାଇବା ବେଳେ ଫୋନ ବ୍ୟବହାର କରିବା ନାହିଁ, ମଦପିଇ ଗାଡି ଚଲାନ୍ତୁ ନାହିଁ, ଦୁଇ ଚକିଆ ଗାଡିରେ ଦୁଇ ଜଣରୁ ଅଧିକ ବସନ୍ତୁ ନାହିଁ, ଚାରି ଚକିଆ ଗାଡି ଚାଳକ ଓ ଯାତ୍ରୀ ସିଟ ବେଲ୍ଟ ବାନ୍ଧିବା ଆଦି ବିଷୟରେ ବୁଝାଇଥିଲେ।
