ଭୁବନେଶ୍ୱର, ୩୧ା୧୨ (ବ୍ୟୁରୋ)- ଶ୍ରୀଲିଙ୍ଗରାଜ ମନ୍ଦିର ପାର୍ଶ୍ୱରୁ ଉଚ୍ଛେଦ ପ୍ରାୟତଃ ସରି ଆସିଛି। ଏପଟେ ଆରମ୍ଭ ହୋଇଯାଇଛି ସୌନ୍ଦର୍ଯ୍ୟକରଣ କାର୍ଯ୍ୟ। ପୁରୁଣା ମାର୍କେଟ କମ୍ପ୍ଲେକ୍ସ ସ୍ଥାନ ଓ ଭଜନ ମଣ୍ଡପ ସ୍ଥାନକୁ ଏକାକାର କରାଯିବାପରେ ମନ୍ଦିର ସମ୍ମୁଖ ସୌନ୍ଦର୍ଯ୍ୟକରଣକୁ ଆହୁରି ବ୍ୟାପକ କରାଯିବ ବୋଲି ବିଏମ୍ସି ଅତିରିକ୍ତ କମିଶନର ଅବନୀ ପଟ୍ଟନାୟକ କହିଛନ୍ତି। ମନ୍ଦିର ଚତୁଃପାର୍ଶ୍ୱ ଉଚ୍ଛେଦ କାର୍ଯ୍ୟ ତଦାରଖବେଳେ ପଟ୍ଟନାୟକ କହିଲେ, ନିର୍ଦ୍ଧାରିତ ସମୟ ପୂର୍ବରୁ ଉଚ୍ଛେଦ କାର୍ଯ୍ୟ ସରୁଛି। ସେହିଭଳି ନିର୍ଦ୍ଧାରିତ ସମୟ ପୂର୍ବରୁ ହିଁ ସୌନ୍ଦର୍ଯ୍ୟକରଣ ଓ ପାରିପାର୍ଶ୍ୱିକ ବିକାଶ କାର୍ଯ୍ୟ ଆରମ୍ଭ ହୋଇଛି। ଏଥିପାଇଁ ବିଏମ୍ସି, ବିଡିଏ ଓ ଆର୍ ଆଣ୍ଡ୍ ବି ବିଭାଗ ଶତପ୍ରତିଶତ ଉଦ୍ୟମ ଜାରି ରଖିଛନ୍ତି। ତେଣୁ ଖୁବ୍ କମ୍ ଦିନରେ ବିକାଶ କାର୍ଯ୍ୟ ସରିବ। ଅନ୍ୟପକ୍ଷରେ ମଙ୍ଗଳବାର ଭଜନ ମଣ୍ଡପର ଉଚ୍ଛେଦ କାର୍ଯ୍ୟ ଶେଷ ହୋଇଛି। ଏକ ଘରୋଇ ଠିକା ସଂସ୍ଥା ଏହାର ଉଚ୍ଛେଦ କାର୍ଯ୍ୟ ସାରିଛି। ଏବେ ନିର୍ମାଣର ଭଗ୍ନାବଶେଷ ଉଠାଯିବ। ବର୍ତ୍ତମାନ ମନ୍ଦିର ପାରିପାର୍ଶ୍ୱିକ ପରିବେଶର ଏକ ଭିନ୍ନ ରୂପରେଖ ଦେଖିବାକୁ ମିଳିଲାନି। ସୌନ୍ଦର୍ଯ୍ୟକରଣ କାର୍ଯ୍ୟ ଏବେ ଦ୍ରୁତ ଗତିରେ ଚାଲିଥିବାବେଳେ ଯେଉଁ ସ୍ଥାନରେ ଗାଡି ପାର୍କିଂ କରାଯାଉଥିଲା, ସେ ସ୍ଥାନରେ ଏବେ ଟାଇଲ ଖଞ୍ଜା ଚାଲିଛି। ଦିନେ ଦୁଇ ଦିନ ମଧ୍ୟରେ ଏହି କାମ ସରିବା ପରେ ଚତୁଃପାର୍ଶ୍ୱରେ ଗଛ ଲଗାଯିବ ଓ ପର୍ଯ୍ୟଟକଙ୍କ ବସିବା ପାଇଁ ବେଞ୍ଚ ଲଗାଯିବ। ଏବେ ପ୍ରାଥମିକ ଭାବେ ପୁରୁଣା ମାର୍କେଟ କମ୍ପ୍ଲେକ୍ସ ସ୍ଥାନରେ ବଡ଼ ବଡ଼ ଗଛ ରଖାଯାଇଥିବାବେଳେ ବେଞ୍ଚ ସ୍ଥାପନ ସରିଛି। ମନ୍ଦିର ସମ୍ମୁଖ ଦେବୀପାଦହରା ପୁଷ୍କରିଣୀ ପାର୍ଶ୍ୱରୁ ସମସ୍ତ ଉଚ୍ଛେଦ ପରେ ଏବେ ପରବର୍ତ୍ତୀ କାର୍ଯ୍ୟ ଜାରି ରହିଛି ବୋଲି ଅତିରିକ୍ତ କମିଶନର ପଟ୍ଟନାୟକ କହିଛନ୍ତି।
