କଣାସ,୩୧ା୩(ସ୍ଵ.ପ୍ର.)- ମହାମାରୀ କରୋନା ସଂକ୍ରମଣ ଦେଶରେ ଅହେତୁକ ଭାବେ କାୟା ବିସ୍ତାର କରିବାରେ ଲାଗିଛି। ପରେ ଲକଡାଉନ ଘୋଷଣା ଯୋଗୁ ଅଧିକାଂଶ ଲୋକ ନିଜ ଘର ଅଭିମୁଖେ ଆସୁଛନ୍ତି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ବିଦେଶ ତଥା ରାଜ୍ୟ ବାହାରୁ ଆସୁଥିବା ଲୋକ ଏବଂ ଗରିବମାନଙ୍କ ରହିବା ପାଇଁ ପ୍ରତି ପଞ୍ଚାୟତର ସ୍କୁଲ, କଲେଜ ଓ ବାତ୍ୟା ଆଶ୍ରୟସ୍ଥଳଗୁଡ଼ିକରେ ରହିବା ପାଇଁ ନିର୍ଦ୍ଦେଶ ଦିଆଯାଇଥିଲା। କିନ୍ତୁ କଣାସ ବ୍ଲକରେ ଥିବା ଆଶ୍ରୟସ୍ଥଳର ଅବସ୍ଥା ଶୋଚନୀୟ ହୋଇପଡ଼ିଛି। ଖବର ଅନୁଯାୟୀ, ଏହି ବ୍ଲକରେ କଣାସ ସରକାରୀ ଉଚ୍ଚ ବିଦ୍ୟାଳୟ ପରିସରରେ ୨୦୦୨ରେ ଏକ ବାତ୍ୟା ଆଶ୍ରୟସ୍ଥଳ ନିର୍ମାଣ କରାଯାଇଥିଲା। ନିର୍ମାଣକୁ ଦୀର୍ଘ ୧୮ବର୍ଷ ବିତିଯାଇଥିଲେ ମଧ୍ୟ କବାଟ, ଝରକା ଭଗ୍ନ ଅବସ୍ଥାରେ ରହିଛି। କିନ୍ତୁ ଏଥିପ୍ରତି ବିଭାଗୀୟ କର୍ତ୍ତୃପକ୍ଷ ଦୃଷ୍ଟି ଦେଇ ନାହାନ୍ତି। ଯାହାଦ୍ୱାରାକି କବାଟ, ଝରକା ଉଇ ଓ ପାଣିଖାଇ ନଷ୍ଟ ହୋଇଥିବାବେଳେ କାନ୍ଥଗୁଡ଼ିକରୁ ପ୍ଲାଷ୍ଟର ଛାଡି ଲୁହାରଡ୍ଗୁଡିକ ଦୀର୍ଘ ଦିନ ହେଲା ପାଣିଖାଇ ଜଙ୍କ୍ ଧରିି ନଷ୍ଟ ହୋଇଗଲାଣି। କେତେବେଳେ ଯେ ବାତ୍ୟା ଆଶ୍ରୟସ୍ଥଳୀ କୋଠାଟି ଭୁଶୁଡି ପଡିବ କହି ହେବ ନାହିଁ। ଏ ସମ୍ପର୍କରେ ଗ୍ରାମ୍ୟ ଉନ୍ନୟନ ବିଭାଗ ସହକାରୀ ଯନ୍ତ୍ରୀ ସରୋଜ କୁମାର ପଣ୍ଡା କୁହନ୍ତି, ବାତ୍ୟା ଆଶ୍ରୟସ୍ଥଳୀ ନିର୍ମାଣ ହେବା ଦିନଠାରୁ ବର୍ତ୍ତମାନ ସୁଦ୍ଧା ମରାମତି ପାଇଁ ଟଙ୍କାଟିଏ ଆସିନାହିଁ। ଏ ବିଷୟ ଉପରିସ୍ଥ ଅଧିକାରୀଙ୍କୁ ଜଣାଇ ଦିଆଯାଇଛି। ଟଙ୍କା ଆସିଲେ ମରାମତି କାର୍ଯ୍ୟ ହେବ।
