ପୁରୀ ଅଫିସ, ୨୫-୯:ଶୀଘ୍ର ନୂଆ ରୂପ ନେବ ସ୍ବର୍ଗଦ୍ୱାର। ବଦଳିବ ଏହାର ଚେହେରା। ଆଗକୁ ପୁରୀ ପାଇଁ ଯେଉଁ ବିକାଶର ଚିତ୍ର ପରିକଳ୍ପନା କରାଯାଇଛି ସେଥିରେ ସ୍ବର୍ଗଦ୍ୱାରକୁ ଯୋଡିଛି ପ୍ରଶାସନ। ଏଥିପାଇଁ ପ୍ରକ୍ରିୟା ବି ଆରମ୍ଭ ହୋଇଯାଇଛି। ସ୍ବର୍ଗଦ୍ୱାର ପ୍ରତି ଆସ୍ଥା ଏବଂ ବିଶ୍ୱାସ ରଖି ଦୂରଦୂରାନ୍ତରୁ ମୃତଦେହ ଦାହ ପାଇଁ ଆସୁଥିବା ସମ୍ପର୍କୀୟମାନେ ଯେପରି କୌଣସି ପ୍ରକାର ତିକ୍ତ ଅନୁଭୂତି ନ ସାଉଁଣ୍ଟିବେ ସେଥିପ୍ରତି ଗୁରୁତ୍ୱ ଦିଆଯାଇଛି। ଅତ୍ୟାଧୁନିକ ସୁବିଧା ସୁଯୋଗ ଉପଲବ୍ଧ କରାଇବା ଲାଗି ବ୍ଲ୍ୟୁ ପ୍ରିଣ୍ଟ ପ୍ରସ୍ତୁତ କରାଯାଉଛି। ପ୍ରଶାସନର ଯୋଜନା ଯଦି ଠିକ୍ ଢଙ୍ଗରେ ଆଗେଇଲା ତେବେ ଖୁବ୍ ଶୀଘ୍ର ସ୍ବର୍ଗଦ୍ୱାରର ଚିତ୍ର ବଦଳିଯିବ।
ଅବହେଳିତ ଅବସ୍ଥାରେ ଥିବା ସ୍ବର୍ଗଦ୍ୱାରରେ ସବୁକିଛି ସୁବ୍ୟବସ୍ଥିତ କରାଯିବାକୁ ନିଷ୍ପତ୍ତି ହୋଇଛି। ସ୍ବର୍ଗଦ୍ୱାରର ସୌନ୍ଦର୍ଯ୍ୟକରଣ ସାଙ୍ଗକୁ ଏଠାରେ ଅତ୍ୟାଧୁନିକ ସୁବିଧା ଉପଲବ୍ଧ ହେବ। ଏ ସମ୍ପର୍କରେ ଜିଲାପାଳ କହିଛନ୍ତି, ଆନ୍ଧ୍ରପ୍ରଦେଶ ଏବଂ ତେଲେଙ୍ଗାନାରେ ଯେଉଁପରି ଭାବେ ହିନ୍ଦୁମାନଙ୍କ ଲାଗି ମହାପ୍ରସ୍ଥାନମ୍ କ୍ରିମେଟୋରିୟମ୍ କରାଯାଇଛି ସ୍ବର୍ଗଦ୍ୱାରରେ ସେହିଭଳି କରାଯିବ। ଏଥିଲାଗି ହାଇଦ୍ରାବାଦରୁ ସମ୍ପୃକ୍ତ ସଂସ୍ଥାର ପ୍ରତିନିଧିମାନେ ଆସି ସ୍ବର୍ଗଦ୍ୱାରର ସ୍ଥିତି ଅନୁଧ୍ୟାନ କରିଛନ୍ତି। ଜିଲା ପ୍ରଶାସନ ସହ ଆଲୋଚନା କରିବା ପରେ ସର୍ଭେ ମଧ୍ୟ କରିଛନ୍ତି। ସେମାନେ ଏଥିନେଇ ଡିଟେଲ ପ୍ରୋଜେକ୍ଟ ରିପୋର୍ଟ (ଡିପିଆର) ପ୍ରସ୍ତୁତ କରୁଛନ୍ତି। ଡିପିଆର ପ୍ରସ୍ତୁତ କରି ଦେବା ପରେ ଏହାର କାମ ଆରମ୍ଭ ହେବ ବୋଲି ଜିଲାପାଳ ସୂଚନା ଦେଇଛନ୍ତି। ମିଳିଥିବା ସୂଚନା ମୁତାବକ, ସମ୍ପୃକ୍ତ ସଂସ୍ଥା ୨ମାସ ପୂର୍ବେ ଆନ୍ଧ୍ରପ୍ରଦେଶ ଏବଂ ତେଲେଙ୍ଗାନାରେ ମହାପ୍ରସ୍ଥାନମ୍ କ୍ରିମେଟୋରିୟମ୍ ନିର୍ମାଣ କରିଛି। ପୂର୍ବରୁ ଏହି ସ୍ଥାନରେ ହିନ୍ଦୁ ଲୋକମାନଙ୍କର ଅନ୍ତ୍ୟେଷ୍ଟି କ୍ରିୟା ପୁରୀ ସ୍ବର୍ଗଦ୍ୱାର ଭଳି କରାଯାଉଥିଲା। ଏବେ ଅତ୍ୟାଧୁନିକ ଉପାୟରେ ମୃତଦେହ ଦାହ କରାଯାଉଛି। କିଛିଦିନ ପୂର୍ବରୁ ପୁରୀ ଜିଲାପାଳ ଏବଂ ଅତିରିକ୍ତ ଜିଲାପାଳ ସେଠାକୁ ଯାଇ ବାସ୍ତବ ସ୍ଥିତି ପରଖିଥିଲେ। ସ୍ବର୍ଗଦ୍ୱାରରେ ଏହି ଢାଞ୍ଚାରେ ମୃତଦେହ ଦାହ କରାଇବା ପାଇଁ ନିଷ୍ପତ୍ତି ନେଇଥିଲେ। ସ୍ବର୍ଗଦ୍ୱାରର ପ୍ରବେଶ ପଥକୁ ବେଶ୍ ଆକର୍ଷଣୀୟ କରାଯିବ। ମୃତଦେହ ଦାହ ପାଇଁ ଆସୁଥିବା ପରିଜନଙ୍କ ଲାଗି ବସିବା ଏବଂ ରିଫ୍ରେସ୍ମେଣ୍ଟ ବ୍ୟବସ୍ଥା କରାଯିବ। ଦାହ ପାଇଁ ସ୍ବତନ୍ତ୍ର ପିଣ୍ଡି, ବାଲିକୁ ହଟାଯାଇ ସ୍ବତନ୍ତ୍ର ଭାବେ ଘାସର ଗାଲିଚା, ପୂଜା ଓ ପିଣ୍ଡଦାନ ପାଇଁ ସ୍ବତନ୍ତ୍ର ସୁବିଧା ସାଙ୍ଗକୁ ଦାହ ପରେ ଅସ୍ଥି ରଖିବା ପାଇଁ ଲକର ବ୍ୟବସ୍ଥା କରାଯିବ ବୋଲି ଜଣାପଡିଛି।
