ପୁରୁଣା ଭୁବନେଶ୍ୱର, ୩୧ା୮(ଡି.ଏନ.ଏ.): ବିଭାଗୀୟ କର୍ତ୍ତୃପକ୍ଷଙ୍କ ଉଦାସୀନତା ମନୋଭାବ ଯୋଗୁ ପୁରୁଣା ଭୁବନେଶ୍ୱର ଅଞ୍ଚଳରେ ବିଭିନ୍ନ କୀର୍ତ୍ତିରାଜି ବିପନ୍ନ ହେବାକୁ ବସିଛି। ତନ୍ନମଧ୍ୟରୁ ଶିଶୁପାଳଗଡ ଅନ୍ୟତମ। ଏକଦା ୫୬୭ ଏକର ପରିମିତ ଅଞ୍ଚଳରେ ଗଡ ପରିସୀମା ଥିଲା ବୋଲି ଏଏସ୍ଆଇ ପକ୍ଷରୁ ଦାବି କରାଯାଉଛି। କାଳକ୍ରମେ ଏବେ ମାତ୍ର ଏ ୦.୭୭୭ ଡିସିମିଲ ଗଡ ପରିସୀମା ଏଏସ୍ଆଇ କର୍ତ୍ତୃପକ୍ଷଙ୍କ ସଂରକ୍ଷଣରେ ରହିଛି। ତେଣୁ ଐତିହ୍ୟ ୧୬ ଖୁମ୍ବରୁ ମାତ୍ର ଆଉ କେତୋଟି ଖୁମ୍ବ ଇତିହାସର ମୁକସାକ୍ଷୀ ବହନ କରୁଛି। ଜବରଦଖଲକାରୀମାନେ ଗଡ଼ର ଅନ୍ୟାନ୍ୟ ଜାଗା ଦଖଲ କରି ସାରିଲେଣି। ଏମିତି କି ଶିଶୁପାଳଗଡ ପଞ୍ଚାୟତର ଜଳାଶୟଗୁଡିକ ଉପରେ ମଧ୍ୟ ଖୁଲମଖୁଲା ଘର ନିର୍ମାଣ କରି ବ୍ୟବସାୟୀ ବ୍ୟବସାୟ କଲେଣି। ତେଣୁ ଏଭଳି କୀର୍ତ୍ତିରାଜିକୁ ସୁରକ୍ଷା ଦେବାକୁ ବିଭିନ୍ନ ସଙ୍ଗଠନ ଏବଂ ସାମାଜିକ କର୍ମୀ ମୁଣ୍ଡ ଟେକୁଥିଲେ ହେଁ ବିଭାଗୀୟ ଅଧିକାରୀ ହାତ ଟେକି ଦେଉଛନ୍ତି। ଫଳରେ ଏହି ଐତିହ୍ୟ ଏକ ପ୍ରକାର ସତ୍ତା ହରାଇବାକୁ ବସିଲାଣି। ଜବରଦଖଲକାରୀମାନେ ଦ୍ରୁତଗତିରେ ଯେଭଳି ଗଡ଼ର ପରିସୀମାକୁ ଜବରଦଖଲ କରି ଘରଦ୍ୱାର ନିର୍ମାଣ କରି ଚାଲିଛନ୍ତି ଦିନ ଆସିବ ଶିଶୁପାଳଗଡ଼ ଭଳି ଐତିହ୍ୟର ମୂକସାକ୍ଷୀଟି ମାନଚିତ୍ରରୁ ଉଭେଇ ନ ଯିବ କିଏ କହିପାରିବ। ପୁରାତନ କୀର୍ତ୍ତିରାଜିଗୁଡିକ ସଂରକ୍ଷଣ ଓ ସୁରକ୍ଷା ନିମନ୍ତେ ଉଭୟ କେନ୍ଦ୍ର ଓ ରାଜ୍ୟ ସରକାର ଅନେକଗୁଡିଏ ନୀତିନିୟମ ଜାରି କରିଛନ୍ତି। ମାତ୍ର ଉଭୟ ସରକାରଙ୍କ ମଧ୍ୟରେ ସମନ୍ବୟ ଅଭାବ ପରିଲକ୍ଷିତ ହେଉଛି। ରାଜ୍ୟ ସରକାରଙ୍କ ପଞ୍ଚାୟତିରାଜ, ରାଜସ୍ବ, ନଗର ଉନ୍ନୟନ ଭଳି ବିଭାଗର ଅଧିକାରୀଙ୍କ ପୁରାତନ କୀର୍ତ୍ତିରାଜି ପ୍ରତି ଯତ୍ନବାନ ନ ହେବା ଯୋଗୁ ଏଗୁଡିକ ସୁରକ୍ଷା ପ୍ରତି ବିପଦ ସୃଷ୍ଟି ହୋଇଛି। ପରସ୍ପରକୁ ଦୋଷ ଲଦି ଏଡାଇ ଦେଉଥିବା ଅଧିକାରୀମାନଙ୍କୁ ସମ୍ମୁଖକୁ ଆଣିବା ସହ କୀର୍ତ୍ତିରାଜିକୁ ବଞ୍ଚେଇବାକୁ ବିଭିନ୍ନ ମହଲରେ ଦାବି ହେଉଛି। କୀର୍ତ୍ତିରାଜିଠାରୁ ୧୦୦ ମିଟର ଭିତରେ ଖନନ କାର୍ଯ୍ୟ କିମ୍ବା ନିର୍ମାଣ ପାଇଁ ଏଏସ୍ଆଇ ପକ୍ଷରୁ ଦଣ୍ଡବିଧାନ ରହିଛି। ହେଲେ ଏହାକୁ ଭ୍ରୁକ୍ଷେପ ନ କରି ଅନେକ ଜବରଦଖଲକାରୀ କୋଟି କୋଟି ଟଙ୍କା ସମ୍ପତ୍ତିକୁ ନିଜର ଜବରଦଖଲକୁ ନେଇ ଯାଉଛନ୍ତି। ଏହି ପରିପ୍ରେକ୍ଷୀରେ ଗୁରୁବାର ଏକ ଜନସ୍ବାର୍ଥ ମାମଲା ନିମନ୍ତେ ଆଇନଜୀବୀ ଅରୁଣ କୁମାର ମହାପାତ୍ର ବେଆଇନ ନିର୍ମାଣ ବନ୍ଦ କରିବା ନିମନ୍ତେ ବିଡିଓ ଭୁବନେଶ୍ୱର ଓ ବିଏମ୍ସି କମିଶନରଙ୍କୁ ନୋଟିସ୍ ଜାରି କରାଯାଇଛି। ଏ ନେଇ ଭୁବନେଶ୍ୱର ବିଡିଓ ଶାନ୍ତନୁ ମହାନ୍ତିଙ୍କୁ ପଚାରିବାରେ ଆମେ ଜାଣିଛୁ ଯେ, ଏଏସ୍ଆଇର ଗାଇଡ ଲାଇନ ଅନୁସାରେ କାର୍ଯ୍ୟ ହେବା କଥା। କିନ୍ତୁ ବିଧିବଦ୍ଧ ଭାବେ ଭୁବନେଶ୍ୱର ବିଡିଓ ହିସାବରେ ଆମକୁ ଏଏସଆଇ କିମ୍ବା ଅନ୍ୟ କୌଣସି ବିଭାଗ ପକ୍ଷରୁ କାମ ବନ୍ଦ ପାଇଁ ନିର୍ଦ୍ଦେଶନାମା ଆସି ନାହିଁ। ଜନସ୍ବାର୍ଥ ମାମଲା ନିମନ୍ତେ ନୋଟିସ ପାଇବା ପରେ ବିଭାଗୀୟ ତର୍ଜମା ଚାଲିଛି। ଏଏସ୍ଆଇ ଗାଇଡ ଲାଇନ ମାନିଲେ ଏମ୍ପି , ବିଧାୟକ କିମ୍ବା ବିଭିନ୍ନ ପାଣ୍ଠିରୁ ଉନ୍ନୟନମୂଳକ କାର୍ଯ୍ୟ ହୋଇ ପାରିବ ନାହିଁ।
