କଟକ ଅଫିସ,୧୨ା୮: ଗୋପଦ ଅଭିଯାନରେ ରବିବାର ସକାଳୁ ଜିଲାପାଳ ଭବାନୀ ଶଙ୍କର ଚୟନୀ, କଟକ ମହାନଗର ନିଗମ(ସିଏମ୍ସି) କମିଶନର ଅନନ୍ୟା ଦାସଙ୍କ ସମେତ ସିଡିଏମଓ କଟକ ସହରର ବିଭିନ୍ନ ସ୍ଥାନ ବୁଲି ଦେଖିଥିଲେ। ସହରର କନିକା ଛକଠାରୁ ବାହାରି ସିଦ୍ଧେଶ୍ୱର ସାହି, ୧୦ନଂ. ୱାର୍ଡ ଓ ଷ୍ଟିୱାର୍ଟପାଟଣା ଅଞ୍ଚଳ ପରିଦର୍ଶନ କରି ସ୍ଥାନୀୟ ଲୋକଙ୍କଠାରୁ ଡ୍ରେନେଜ, ପରିମଳ, ରାସ୍ତା ଓ ପାଣି ସମସ୍ୟା ସମ୍ପର୍କରେ ପଚାରି ବୁଝିଥିଲେ। ସହରରେ ଦୀର୍ଘଦିନ ହେବ ଏହିସବୁ ସମସ୍ୟା ଲାଗିରହିଛି। ଏହାର ସମାଧାନ କିପରି ହୋଇପାରିବ ସେ ନେଇ ଜିଲାପାଳ ପ୍ରତିଦିନ ଗୋପଦ ଅଭିଯାନରେ ବିଭିନ୍ନ ଅଞ୍ଚଳ ପରିଦର୍ଶନ କରୁଛନ୍ତି। ରବିବାର ଜିଲାପାଳ ଏହିସବୁ ଅଞ୍ଚଳ ପରିଦର୍ଶନ କରିବା ପରେ ପରିମଳ ବ୍ୟବସ୍ଥାରେ ସୁଧାର ଆଣିବା ପାଇଁ ସିଏମ୍ସିକୁ ଜଣାଇଥିଲେ। ସେହିପରି ଅନାଧିକାର ଜମିକୁ ମୁକ୍ତ କରିବା, ଡ୍ରେନକୁ ଜବରଦଖଲ ମୁକ୍ତ କରିବା ଓ ସଫାସୁତୁରା ପାଇଁ ଆବଶ୍ୟକ ପଦକ୍ଷେପ ନେବାକୁ ଜିଲାପାଳ କହିଥିଲେ। ଏଥିସହ ସିଦ୍ଧେଶ୍ୱର ସାହି ବାସିନ୍ଦା ଏବଂ ବୁଦ୍ଧିଜୀବୀଙ୍କ ସହିତ ସମସ୍ୟା ସମ୍ପର୍କରେ ଆଲୋଚନା କରିଥିଲେ। ସେଠାକାର ଆଲୋକ, ଆବଶ୍ୟକ ଭେଣ୍ଡିଂଜୋନର ବ୍ୟବସ୍ଥା କରାଯିବା ଉପରେ ଅବଗତ ହେବା ସହ ସାହିରେ ଥିବା ମଧୁସୂଦନ ଦାସ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ କରି ସ୍ବଚ୍ଛତା ଓ ପରିମଳ ବ୍ୟବସ୍ଥା ଦେଖିଥିଲେ।
