ନୂଆପଡା ଅଫିସ,୧୩ା୫: ମହାମାରୀ କରୋନା ପରିସ୍ଥିତିର ମୁକାବିଲା ପାଇଁ ସମଗ୍ର ଦେଶ ଲକ୍ ଡାଉନ୍ ରହିଛି। ଏହାଦ୍ୱାରା ଜନଜୀବନ ପ୍ରଭାବିତ ହୋଇଛି। ବଣଜଙ୍ଗଲରେ ବସବାସ କରୁଥିବା ଗରିବ ପରିବାର ବନଜାତ ଦ୍ରବ୍ୟ ସଂଗ୍ରହ କରୁଥିଲେ ବି ବିକି ପାରୁ ନାହାନ୍ତି। ଏଣୁ ଏମାନଙ୍କ ପରିବାର ଚଳିବାରେ ଅସୁବିଧା ହେଉଛି। ପିଲାଛୁଆଙ୍କୁ ଭୋକ ଉପାସରେ ଦିନ କାଟିବାକୁ ପଡୁଛି। ନୂଆପଡ଼ା ଜିଲା ପ୍ରଶାସନ ଏହା ହୃଦୟଙ୍ଗମ କରି ପାରିଛି। ଏହି ଦୁର୍ଦ୍ଦିନରେ ବନଜାତ ଦ୍ରବ୍ୟ ସଂଗ୍ରହକାରୀ ବଣମୁଲକର ଲୋକଙ୍କ ଜୀବନ ଜୀବିକାରେ ସହାୟକ ହେବାକୁ ଜିଲା ପ୍ରଶାସନ ହାତ ବଢାଇଛି। ଏମାନଙ୍କ ମୁହଁରେ ଦାନା ଯୋଗାଇବାକୁ ପ୍ରୟାସ ମଧ୍ୟ ଆରମ୍ଭ କରିଛି। ସେମାନଙ୍କ ଘର ମୁହଁକୁ ଯାଇ ବନଜାତ ଦ୍ରବ୍ୟ କିଣିବାକୁ ସ୍ବତନ୍ତ୍ର ବ୍ୟବସ୍ଥା ଆରମ୍ଭ କରିଛି। ଏଥିପାଇଁ ବୁଧବାର ଜିଲାପାଳ ମଧୁସ୍ମିତା ସାହୁ ପତାକା ଦେଖାଇ ୨ଟି ରଥର ଶୁଭାରମ୍ଭ କରିଛନ୍ତି। ଜିଲାପାଳଙ୍କ ସହ ଅଞ୍ଜନ କୁମାର ପଣ୍ଡା, ଜିଲା ମଙ୍ଗଳ ଅଧିକାରୀ ସନ୍ଧ୍ୟା ମାଝି ପ୍ରମୁଖ ଉପସ୍ଥିତ ଥିଲେ। ଏହି ରଥ ଜିଲାର ବିଭିନ୍ନ ଅଞ୍ଚଳ ବୁଲି ଲୋକଙ୍କଠାରୁ ବନଜାତ ଦ୍ରବ୍ୟ ସଂଗ୍ରହ କରିବ। ଏଥିରେ ମହିଳା ସ୍ବୟଂ ସହାୟିକା ଗୋଷ୍ଠୀର ସଦସ୍ୟା ସହଯୋଗ କରିବେ। ଲୋକେ ଯେଭଳି କୌଣସି ଦ୍ୱନ୍ଦ୍ୱରେ ନ ପଡ଼ିବେ ସେଥିପାଇଁ ମୋଟ ୪୯ଟି ବନଜାତ ଦ୍ରବ୍ୟର ମୂଲ୍ୟ ତାଲିକା ଏହି ରଥରେ ଝୁଲା ଯାଇଛି ବୋଲି କୁହାଯାଇଛି।
