ଲିଜା ପଣ୍ଡା ଓରଫ ଲିଜା ଓଡ଼ିଆ ଯାତ୍ରା ଜଗତରେ ବେଶ୍ ଜଣାଶୁଣା। ଚଳିତ ବର୍ଷ ଅପେରା ସୂର୍ଯ୍ୟମନ୍ଦିରରେ ସେ ନିଜ ଅଭିନୟର ଯାଦୁ ବିତରଣ କରି ଚାଲିଛନ୍ତି। ଦର୍ଶକମାନେ ତାଙ୍କୁ ନେଗେଟିଭ୍ ଭୂମିକାରେ ବେଶ୍ ଗ୍ରହଣ କରିଛନ୍ତି। ନେଗେଟିଭ୍ ଭୂମିକା ମଧ୍ୟ ତାଙ୍କୁ ବେଶ ସୁହାଏ। ତେବେ ପୂଜାଙ୍କର ପସନ୍ଦ ହେଉଛି ପଜିଟିଭ୍ ଭୂମିକା। ଚଳିତ ବର୍ଷ ସେ ଖଣ୍ଡିଏ ନାଟକରେ ମଧ୍ୟ ପଜିଟିଭ୍ ଭୂମିକା ପାଇଛନ୍ତି। ନାଟକଟି ହେଉଛି ‘ଭିତିରି କଥା’। ଏଥିରେ ତାଙ୍କୁ ତାଙ୍କର ଦକ୍ଷତା ଦେଖେଇବାର ଭରପୂର ସୁଯୋଗ ମିଳିଛି। ‘ଭିତିରି କଥା’ ନାଟକରେ ସେ ‘ଦୀପିକା’ ଚରିତ୍ରରେ ମଞ୍ଚ ଉପରକୁ ଆସୁଛନ୍ତି। ଆଉ ଦର୍ଶକଙ୍କର ବାହାବା ମଧ୍ୟ ସାଉଣ୍ଟୁଛନ୍ତି।
୨୦୦୭ ମସିହାରେ ସେ ପ୍ରଥମେ ଆସିଲେ ଅନୁଗୋଳର ‘ସୂର୍ଯ୍ୟ ଗଣନାଟ୍ୟ’କୁ। ଅବଶ୍ୟ ସେ ଯାତ୍ରାକୁ ଆସିବା ନେଇ ତାଙ୍କର କୌଣସି ଯୋଜନା ନ ଥିଲା। ନାଟ୍ୟକାର ମନୋଜ ପଣ୍ଡା ହିଁ ତାଙ୍କୁ ପେସାଦାର ଯାତ୍ରାକୁ ଆସିବା ପାଇଁ ପ୍ରସ୍ତାବ ଦେଲେ। ଅଭିନୟ ପ୍ରତି ତ ରୁଚିଥିଲା। ପୁଣି ତାଙ୍କ ଦ୍ୱାରା ଭଲ ଅଭିନୟ ବି ହେଉଥିଲା। ପିଲାବେଳେ ସ୍କୁଲ୍ରେ ସେ ଏକକ ଅଭିନୟ କରୁଥିଲେ। ତାଙ୍କ ଅଭିନୟ ଏତେ ଜୀବନ୍ତ ହେଉଥିଲା ଯେ, ଯିଏ ଦେଖୁଥିଲା ସେ ଘଡ଼ିଏ ରହିଯାଉଥିଲା। ସେହି ଆତ୍ମବିଶ୍ୱାସକୁ ପୁଞ୍ଜିକରି ଲିଜା ଆସିଲେ ‘ସୂର୍ଯ୍ୟ ଗଣନାଟ୍ୟ’କୁ। ଇତିମଧ୍ୟରେ ସେ ୧୨ବର୍ଷରୁ ଊର୍ଦ୍ଧ୍ୱ ସମୟ ବିତାଇ ସାରିଲେଣି ଯାତ୍ରା ଜଗତରେ। ‘ସୂର୍ଯ୍ୟ ଗଣନାଟ୍ୟ’ ପରେ ପରେ ସେ ‘ତାରାପୁର’, ‘ଧଉଳି’, ‘ପାର୍ବତୀ’, ‘ବିଶ୍ୱ ଦରବାର’, ‘ଗୌରୀ’, ‘କଳିଙ୍ଗ’ ଆଦି ଗଣନାଟ୍ୟରେ ଅଭିନୟ ସାରି ଚଳିତବର୍ଷ ଆସି ପହଞ୍ଚତ୍ଛନ୍ତି ‘ଅପେରା ସୂର୍ଯ୍ୟମନ୍ଦିର’ରେ। ସେ ଅଭିନୟ କରିଥିବା ସଫଳ ନାଟକଗୁଡ଼ିକ ମଧ୍ୟରେ ରହିଛି ‘ଗାନ୍ଧୀ ଫେରୁଛନ୍ତି’, ‘ଲକ୍ଷେ ଟଙ୍କିଆ ବୋହୂ’, ‘ବେଶ୍ୟା ପାଳୁଛି ସାବିତ୍ରୀ ବ୍ରତ’, ‘ମୋ ଠିକଣା ମୋତେ ଅଜଣା’, ‘ଠିକଣା ହଜିଛି ଜଗା ଭାଇର’, ‘ମୋତେ ଭୁଲିଯିବୁ ତତେ ମୋ ରାଣ’ ଏବଂ ଆହୁରି ଅନେକ। ଚଳିତବର୍ଷ ‘ଅପେରା ସୂର୍ଯ୍ୟମନ୍ଦିର’ରେ ତାଙ୍କ ଅଭିନୀତ ନାଟକ ମଧ୍ୟରେ ରହିଛି ‘ମାୟାବିନୀ ମୌସୁମୀ’, ‘କାହାଣୀ କହୁଛି ସୂର୍ଯ୍ୟମନ୍ଦିର’, ‘ଭିତିରି କଥା’ ଏବଂ ‘ପ୍ରେମିକାର ନଁା ଚନ୍ଦ୍ରଭାଗା’।
