କଟକ ଅଫିସ,୧୨।୧୨: କେନ୍ଦ୍ରାଞ୍ଚଳ ଅଧୀନ ୧୦ଟି ଜିଲାରେ ଆଖିବୁଜା ଲଘୁ ଖଣିଜଦ୍ରବ୍ୟ ଚୋରି ହେଉଛି। ଏହି ଚୋରିକୁ ରୋକିବା ପାଇଁ ଆର୍ଡିସି ଅନିଲ କୁମାର ସାମଲ ୧୦ ଜିଲାପାଳଙ୍କୁ ତାଗିଦ୍ କରିଛନ୍ତି। ବିଶେଷକରି ଉପଜିଲାପାଳ ଓ ତହସିଲଦାରମାନେ ଏଥିପ୍ରତି ଧ୍ୟାନ ଦେଉ ନ ଥିବାରୁ ଏହା ଏବେ ଉଦ୍ବେଗଜନକ ପରିସ୍ଥିତି ସୃଷ୍ଟି କରିଛି। ଏହାକୁ ନେଇ ବିଧାନସଭାରେ ଆଲୋଚନା ହୋଇଥିଲା। ତେଣୁ ଉପଜିଲାପାଳ ଓ ତହସିଲଦାରମାନଙ୍କ ଏଭଳି ସ୍ଥାଣୁତାକୁ ବରଦାସ୍ତ କରାଯିବନାହିଁ ବୋଲି ଆରଡିସି କହିଛନ୍ତି। ଏହି ଚୋରିକୁ ରୋକିବା ପାଇଁ ଆରଡିସି ସାମଲ କେତେଗୁଡିଏ ନିର୍ଦ୍ଦେଶନାମା ଜିଲାପାଳମାନଙ୍କ ଉଦ୍ଦେଶ୍ୟରେ ଜାରି କରିଛନ୍ତି। ଜିଲାପାଳମାନେ ନିୟମିତ ଭାବେ ସମୀକ୍ଷା କରି ପରିସ୍ଥିତି ଉପରେ ନଜର ରଖିବାକୁ କୁହାଯାଇଛି। ସଇରାତଗୁଡିକର ଡିଜିପିଏସ(ଡିଫରେନସିଆଲ ଗ୍ଲୋବାଲ ପୋଜିିଶନିଂ ସିଷ୍ଟମ) ସର୍ଭେ କରିବା ସହିତ ସଇରାତ ଚିହ୍ନଟ କରିବାକୁ ଆରଡିସି ନିର୍ଦ୍ଦେଶ ଦେଇଛନ୍ତି। ଖଣି ଅଞ୍ଚଳଗୁଡିକର ତଦାରଖ ପାଇଁ ସ୍ବତନ୍ତ୍ର ସ୍କ୍ବାଡ୍ ମୁତୟନ କରିବାକୁ ଆରଡିସି କହିଛନ୍ତି। ଏହି ଖଣିଜଦ୍ରବ୍ୟଗୁଡିକ ମଧ୍ୟରେ ଆଖିବୁଜା ବାଲି ଚୋରି ଅଧିକ ଉଦ୍ବେଗଜନକ ପରିସ୍ଥିତି ସୃଷ୍ଟି କରିଛି।
ବାଲି ଚୋରି ଫୋକସ୍ରେ କଟକ ଓ ଯାଜପୁର ଜିଲା ରହିଥିବା ବେଳେ ପଥର ଚୋରି ଫୋକସ୍ରେ ଖୋର୍ଦ୍ଧା ରହିଛି। ଯାଜପୁର ଜିଲାରେ ୨୦୧୮ ଏପ୍ରିଲ ପହିଲାରୁ ୨୦୧୯ ମାର୍ଚ୍ଚ ୩୧ ତାରିଖ ମଧ୍ୟରେ ଲଘୁ ଖଣିଜଦ୍ରବ୍ୟ ରୟାଲ୍ଟି ବାବଦରେ ମୋଟ ୧୩କୋଟି ୨୩ଲକ୍ଷ ୩୩ହଜାର ୨୩୨ ଟଙ୍କା ଆଦାୟ ହୋଇଥିବାବେଳେ ବେଆଇନ ଉତ୍ତୋଳନ ପାଇଁ ଜରିମାନା ବାବଦକୁ ୧କୋଟି ୯୩ଲକ୍ଷ ୧୦ହଜାର ୫୩୦ଟଙ୍କା ଆଦାୟ କରାଯାଇଛି। ଏହି ସମୟ ମଧ୍ୟରେ ପ୍ରଶାସନ ପକ୍ଷରୁ ୬୪୯ ଥର ଚଢାଉ କରାଯାଇ ୧୨୦୧ ଗାଡିକୁ ଜବତ କରାଯାଇଛି।
ଖୋର୍ଦ୍ଧା ଜିଲାର ପଥର ଖଣିକୁ ଦେଖିଲେ ଅଧିକାଂଶ ଖଣି ପୁରୀ ଶ୍ରୀଜଗନ୍ନାଥଙ୍କ ଜମିରେ ରହିଛି। ସେପ୍ଟେମ୍ବର ୫ ତାରିଖ ସୁଦ୍ଧା ଜିଲାର ମୋଟ ୧୩୧ଟି ଖଣି ମଧ୍ୟରୁ ୬୫ଟି କାର୍ଯ୍ୟ କରୁଥିବା ରିପୋର୍ଟରୁ ଜଣାପଡିଛି। ତେବେ ଜିଲାରେ କାର୍ଯ୍ୟ କରୁଥିବା ବେଆଇନ କ୍ରଶର ୟୁନିଟ୍ଗୁଡିକ ଉପରେ କଡା ନଜର ରଖିବାକୁ ଆର୍ଡିସି ତାଗିଦ କରିଛନ୍ତି। ଜଟଣୀ ତହସିଲ ଅଞ୍ଚଳରୁ ବେଆଇନଭାବେ ପଥର ଉତ୍ତୋଳନ କରାଯାଇ ଡେଲାଙ୍ଗ ଓ କଣାସ ଅଞ୍ଚଳକୁ ଚାଲାଣ କରାଯାଉଥିବା ଜଣାପଡିଛି।
ବାଲି ଚୋରି କଟକ ଜିଲାରେ ଲାଭଜନକ ବ୍ୟବସାୟରେ ପରିଣତ ହୋଇଛି। ଦିନ ଦ୍ୱିପ୍ରହରରେ ମହାନଦୀ, କୋଠଯୋଡି, ଲୁଣା, ଚିତ୍ରୋତ୍ପଳା ଓ ବିରୂପା ଆଦି ନଦୀରୁ ବେଆଇନଭାବେ ବାଲି ଚୋରି କରାଯାଉଛି। ସ୍ଥାନୀୟ ପୋଲିସ ଓ ତହସିଲ ପ୍ରଶାସନ ସହାୟତାରେ ଏଭଳି କରାଯାଉଥିବା ଅଭିଯୋଗ ହୋଇଛି। ଗ୍ୟାଙ୍ଗଷ୍ଟର ଧଳସାମନ୍ତ ଭ୍ରାତା ଗିରଫ ହେବା ପରେ ସେମାନଙ୍କର ବାଲି ଘାଟ ଲିଙ୍କ ପଦାକୁ ଆସିଥିଲା। ଏହାପରେ କଟକ ସଦର ତହସିଲ ଅଞ୍ଚଳରେ ତହସିଲ ପ୍ରଶାସନ ଖୋଳତାଡ କରିବାରୁ ବଡ ଧରଣର ବାଲି ଚୋରି ର଼୍ୟାକେଟ ଧରାପଡିଥିଲା। ଲିଜ୍ଧାରୀମାନେ ଯେତିକି ଇଲାକା ଲିଜ୍ ସୂତ୍ରରେ ଆଣିଛନ୍ତି ତାହା ଠୁ ଅଧିକ ଇଲାକାରୁ ବାଲି ଉତ୍ତୋଳନ କରୁଥିବା ତଦନ୍ତରୁ ଜଣାପଡିଥିଲା। ଫଳରେ ଏହି ଲିଜ୍ଧାରୀମାନଙ୍କ ଉପରେ ଜରିମାନା ଲାଗୁ କରାଯାଇଥିଲା। ମୁଖ୍ୟତଃ ନଦୀର ସମ୍ବେଦନଶୀଳ ଅଞ୍ଚଳରୁ ବାଲି ଉତ୍ତୋଳନ କରାଯାଉଥିବାରୁ ଭବିଷ୍ୟତରେ ନଦୀର ଗତିପଥ ପରିବର୍ତ୍ତନ ହେବା ଆଶଙ୍କା ରହିଛି। ଏ ସମ୍ପର୍କରେ ଆରଡିସିଙ୍କ କାର୍ଯ୍ୟାଳୟରେ ରାଜସ୍ବ ଦାୟିତ୍ୱରେ ଥିବା ଅଧିକାରୀ ଏଲୋରା ଭାରତୀ ଜେନାଙ୍କୁ ପଚାରିବାରୁ ଲଘୁ ଖଣିଜଦ୍ରବ୍ୟ ଉପରେ କଡା ନଜର ରଖାଯାଇଛି। ଏହି ଚୋରିରେ ସାମିଲ ରହୁଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି କହିଥିଲେ।
