ବଲାଙ୍ଗୀର ଅଫିସ,୧୦ା୬: ବିବାହ ପାଇଁ କାର୍ଡ ଛପା ହୋଇଥିଲା। ବନ୍ଧୁବାନ୍ଧବଙ୍କୁ ନିମନ୍ତ୍ରଣ ମଧ୍ୟ କରାଯାଇଥିଲା। ମାତ୍ର ଲକ୍ଡାଉନ୍ ଯୋଗୁ ସବୁକିଛି ଓଲଟ ପାଲଟ ହୋଇଗଲା। ଅନିର୍ଦ୍ଦିଷ୍ଟ କାଳ ପାଇଁ ଅଟକିଗଲା ବାହାଘର। ପ୍ରାୟ ଅଢ଼େଇ ମାସ ପରେ ସରକାରଙ୍କ ପକ୍ଷରୁ ଲକ୍ଡାଉନକୁ ନେଇ କିଛି କୋହଳ କରାଯିବା ପରେ ପୁଣି ଥରେ ଲୋକଙ୍କ ମଧ୍ୟରେ ନୂଆ ଆଶା, ଆକାଂକ୍ଷା ସଂଚାର ହୋଇଛି। ବିବାହ, ବ୍ରତ ପାଇଁ ବାଟ ଫିଟିବା ପରେ ଦୋକାନ ବଜାର ଧୀରେ ଧୀରେ ଖୋଲିବା ଆରମ୍ଭ ହୋଇଛି। ବିଶେଷକରି ବଲାଙ୍ଗୀର ସହରରେ ପାରମ୍ପାରିକ ଜିନିଷ ରାସ୍ତାପାର୍ଶ୍ୱରେ ବେଶ୍ ବିକ୍ରି ହୁଏ। ବିବାହ ସମୟରେ ଆବଶ୍ୟକ ହେଉଥିବା କୁଲା, ବାଉଁଶିଆ ଆଦି ବିକି କାରିଗର ବେଶ ଦୁଇ ପଇସା ରୋଜଗାର କରିଥାନ୍ତି। କିନ୍ତୁ ଏବେ ସହରର ମୁଖ୍ୟ ବଜାରରେ ଯଦିଓ ପୂର୍ବଭଳି ଭିଡ଼ ଦେଖିବାକୁ ମିଳୁ ନାହିଁ ତଥାପି ସାମାଜିକ ଦୂରତା ରଖି ଲୋକେ କିଣାବିକା କରୁଛନ୍ତି। ବାଉଁଶ କାରିଗର ରାଘବ ଚିନ୍ଦାଙ୍କ କହିବା ଅନୁସାରେ, ଦେଓଗଁ। ବ୍ଲକ ଅନ୍ତର୍ଗତ ବଡ଼ବନ୍ଧ, ସିକୁଆ ଅଞ୍ଚଳରେ ଅଧିକାଂଶ କାରିଗର ରହିଛନ୍ତି। ଦୀର୍ଘ ଅଢ଼େଇ ମାସ ଭିତରେ କାରିଗର ଅନେକ କ୍ଷତି ସହିଛନ୍ତିି। ବିବାହ ଲଗ୍ନ ଅନେକ ରହିଥିଲା। ତେଣୁ ବିକ୍ରି ମଧ୍ୟ ଏହି ସମୟରେ ଖୁବ୍ ହୁଏ। କୋହଳ ହେଲା ପରେ ପୁଣି ବିକ୍ରି କରିବା ଆରମ୍ଭ କରିଛୁ ବୋଲି କହିଥିଲେ। ସଇଁତଳା ବ୍ଲକର ମୀନତି ସାହୁ କୁହନ୍ତି, ନିଜ ଭଉଣୀଙ୍କ ବାହାଘର ଲକ୍ ଡାଉନ ଯୋଗୁ ଅଟକି ଯାଇଥିବା ବେଳେ ଖୁବ୍ କମ୍ ଲୋକଙ୍କୁ ନେଇ ବାହାଘର ଶେଷ କରିବା ପାଇଁ ଯୋଜନା କରିଛୁ। ପରମ୍ପରା ଅନୁଯାୟୀ, ଦରକାରୀ ଜିନିଷ କିଣିବା ପାଇଁ ଆଜି ବଲାଙ୍ଗିର ବଜାର କରି ଆସିଥିବା କହିଥିଲେ। ଲୋକଙ୍କ ମଧ୍ୟରେ ସାମାଜିକ ଦୂରତା, ମାସ୍କ ବ୍ୟବହାର କରିବା ସହ ବ୍ୟବସାୟରେ ଲୋକଙ୍କ ସହଯୋଗିତା ଓ ସହଭାଗିତା ଠିକ୍ ଆକାରରେ ହୋଇ ପାରିଲେ ପୁଣି ଆଗ ସ୍ଥିତିକୁ ଫେରିବ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି।
