ଯାଜପୁର ଅଫିସ,୨୫।୩-କେନ୍ଦ୍ର ଓ ରାଜ୍ୟ ସରକାରଙ୍କ ଲକ୍ଡାଉନ୍ ଘୋଷଣାକୁ ଯାଜପୁର ଜିଲାର ପ୍ରାୟ ଦୋକାନୀ ମାନୁଥିବାବେଳେ ଲୋକେ କିନ୍ତୁ ଏହାକୁ ଉଲ୍ଲଂଘନ କରୁଥିବା ଦେଖାଯାଇଛି। ଏଥିପାଇଁ ପୋଲିସକୁ ନାକେଦମ ହେବାକୁ ପଡୁଛି। ବୁଧବାର ଯାଜପୁର ରୋଡ ଗଣେଶ ମାର୍କେଟସ୍ଥିତ ଏକ ଆଳୁ ଓ ପିଆଜ ଦୋକାନରେ ଲୋକଙ୍କ ଗହଳି ପରିଲକ୍ଷିତ ହୋଇଛି। ସେହିପରି ଷ୍ଟେଶନ ମାର୍କେଟରେ ଥିବା ଏକ ଔଷଧ ଦୋକାନରେ ସାମାଜିକ ଦୂରତା ରକ୍ଷା କରାଯାଉ ନ ଥିବା ଦେଖିବାକୁ ମିଳିଛି। ଏହାସହ ଲୋକେ ବିନା କାରଣରେ ବାଇକ୍ ଧରି ବୁଲୁଥିବାର ଦେଖାଯାଇଛି। ଅନ୍ୟପକ୍ଷେ ସହରର ଗୋପବନ୍ଧୁ ଛକ, ଚୋର୍ଦ୍ଦାଛକ, ଗଣେଶ ମାର୍କେଟ, ଦଳା ପ୍ରଭୃତି ଅଞ୍ଚଳରେ ଲୋକଙ୍କ ଭିଡ ଜମୁଛି। ମଙ୍ଗଳବାର ପ୍ରଧାନମନ୍ତ୍ରୀଙ୍କ ୩ ସପ୍ତାହ ପର୍ଯ୍ୟନ୍ତ ଲକ୍ଡାଉନ୍ ଘୋଷଣାକୁ ଲୋକେ ସେତେଟା ଗୁରୁତ୍ୱ ଦେଉ ନ ଥିବା ମନେ ହୋଇଛି। ଜିଲାପାଳ ନିଜେ ଫ୍ଲାଗମାର୍ଚ୍ଚ କରିଥିଲେ ହେଁ ବାଇକ, ସ୍କୁଟି ଚଳାଚଳ ସଂଖ୍ୟା ହ୍ରାସ ପାଉନାହିଁ। ଫଳରେ କରୋନା ମୁକାବିଲା ନେଇ ଯାଜପୁର ରୋଡ୍ ଅଞ୍ଚଳରେ ପ୍ରଶ୍ନବାଚୀ ସୃଷ୍ଟି କରିଛି।
