ସେମିଳିଗୁଡ଼ା,୧୬ା୪(ସ୍ବ.ପ୍ର.): କୌଳିକ ବୃତ୍ତିରେ ଗୁଜୁରାଣ ଚଳାଉଥିବା ଅନେକ ଲୋକଙ୍କ ଜୀବିକାରେ ଲାତ ମାରିଛି କରୋନା ଭାଇରସ। ସଂକ୍ରମଣ ଭୟରେ ସବୁଠି ଲକ୍ଡାଉନ। ଦୋକାନ ବଜାର ବନ୍ଦ। ଏଥିରେ କ୍ଷୁଦ୍ର ବ୍ୟବସାୟୀଙ୍କ ଜୀବନ ଦୁର୍ବିସହ ହୋଇପଡ଼ିଛି। ଅନେକ ବ୍ୟବସାୟୀଙ୍କ ପାଇଁ ଦୋକାନ ଖୋଲିବା ପାଇଁ ବାଟ ବନ୍ଦ ଥିବାବେଳେ ବାରିକମାନେ ଏବେ ନିଜ ବାରଣ୍ଡାରେ ସେଲୁନ ଖୋଲି ଚୁଟିକଟା ଆରମ୍ଭ କରିଛନ୍ତି। ଲୋକେ କୁହାକୁହି ହେଉଛନ୍ତି- ବାରିକଙ୍କ କାମ ଯେଉଁଠୁ ଆରମ୍ଭ ହୋଇଥିଲା, ସେଇଠିକୁ ଫେରିଛି। ଦିନ ଥିଲା ବାରିକ ପରିବାର ଗାଁ ଦାଣ୍ଡ ବାରଣ୍ଡାରେ ନିଜ କୁଳ ବେଉସା କରି ଦୁଇ ପଇସା ରୋଜଗାର କରୁଥିଲେ। କିନ୍ତୁ ଆଧୁନିକତାରେ ତାଳ ଦେଇ ଆରମ୍ଭ ହେଲା ସେଲୁନ, ପାର୍ଲର। କିନ୍ତୁ ଏବେ ଲକ୍ଡାଉନ ପରିସ୍ଥିତି ସବୁ ବାରିକଙ୍କୁ ପୁରୁଣା ସମୟକୁ ଫେରାଇ ନେଇଛି। ସେଲୁନ ବନ୍ଦ ହେବା ଫଳରେ ବହୁ ଗରିବ ବାରିକ ପରିବାର ଚଳାଇବା ପାଇଁ ନାନାଦି ଅସୁବିଧାର ସମ୍ମୁଖୀନ ହେଉଛନ୍ତି। ଦୀର୍ଘଦିନ ହାତ ବାନ୍ଧି ଘରେ ବସି ରହିବା ପରେ ସେମାନେ ଏବେ ଘର ଘର ବୁଲି ଲୋକଙ୍କ ବାରଣ୍ଡାରେ ଚୁଟି ଓ ଦାଢ଼ିକଟା ଆରମ୍ଭ କରିଛନ୍ତି। ମୁଁହରେ ମାସ୍କ ପିନ୍ଧି ସେମାନେ ଚୁଟି କାଟୁଥିବା ଦେଖିବାକୁ ମିଳିଛି। କେହି ଚୁଟି କାଟିବା ପାଇଁ ଖବର ଦେଲେ, ସେମାନେ ଘରକୁ ଘର ଯାଇ ଚୁଟି କାଟିଦେଇ ଆସୁଛନ୍ତି।
