କାଶୀପୁର,୨୭।୪: କରୋନା ଯୋଗୁ ସାରା ଦେଶରେ ଲକ୍ଡାଉନ ଜାରି ରହିଛି। ଏଥିଯୋଗୁ ଲୋକଙ୍କୁ ବହୁ ଅସୁବିଧାର ସମ୍ମୁଖୀନ ମଧ୍ୟ ହେବାକୁ ପଡ଼ୁଛି। ଏଥିପାଇଁ କେତେକଙ୍କ ବିବାହ ସ୍ଥଗିତ ହୋଇଥିବା ବେଳେ ଆଉ କେତେକ ଭିଡିଓ କନ୍ଫରେନ୍ସିଂରେ ହେଉଥିବା ଦେଖିବାକୁ ମିଳିଛି। ହେଲେ ଏହି ଲକ୍ଡାଉନ ଭିତରେ ଏକ ନିଆରା ବିବାହ ଦେଖିବାକୁ ମିଳିଛି। ଯେଉଁଠି ବର୍ଡରର ପୋଲିସ କ୍ୟାମ୍ପସ୍ ବିବାହ ମଣ୍ଡପ ସାଜିଥିବା ବେଳେ କନ୍ୟାର ପିତା ସାଜିଛନ୍ତି ପୋଲିସ କର୍ମୀ। ଏହି ଦୃଶ୍ୟ ହେଉଛି ଉତ୍ତରାଖଣ୍ଡ ଓ ଉତ୍ତରପ୍ରଦେଶ ସୀମାର। ସୂଚନା ମୁତାବକ ମୁଣ୍ଡାପାଣ୍ଡେ ଥାନା ଅଞ୍ଚଳର ବିକ୍ରମ ସିଂହ ଓ ବରଖେଡା ପାଣ୍ଡେ ଗାଁର ନେହା ସିଂହଙ୍କ ସହ ବିବାହ ଠିକ୍ ହୋଇଥିଲା।
କିନ୍ତୁ ଲକ୍ଡାଉନ ଯୋଗୁ ବିବାହ ତାରିଖକୁ ନେଇ ଦୁଇ ପରିବାରଙ୍କ ମଧ୍ୟରେ ଦ୍ୱନ୍ଦ ଦେଖାଦେଇଥିଲା। ତେବେ ବିବାହରେ ବରଯାତ୍ରୀ ନେଇକି ପାଇଁ ପ୍ରଶାସନଠାରୁ ଅନୁମତି ମାଗିବାକୁ ବିକ୍ରମ ଯାଇଥିଲେ। ସୀମାରୁ ଅନ୍ୟ ରାଜ୍ୟକୁ ଗଲେ ୧୪ଦିନ କ୍ୱାରାଣ୍ଟାଇନ୍ରେ ରଖିବା ପ୍ରକ୍ରିୟା ରହିଛି ବୋଲି ଅଧିକାରୀ ତାଙ୍କୁ କହିଥିଲେ। ତେବେ ସୀମାରେ ହିଁ ବିବାହ କରିବା ପାଇଁ ଉଭୟ ପରିବାର ନିଷ୍ପତ୍ତି ନେଇଥିଲେ ଏବଂ ଏଥିପାଇଁ ଜିଲା ପ୍ରଶାସନରୁ ଅନୁମତି ମଧ୍ୟ ମିଳିଥିଲା। ରବିବାର ବିବାହ ପାଇଁ ବିକ୍ରମ ନିଜ ସାଙ୍ଗରେ ଭଉଣୀଙ୍କୁ ନେଇ ଉତ୍ତରାଖଣ୍ଡର କାଶୀପୁରକୁ ଯାଇଥିଲେ। କାଶୀପୁର ପହଞ୍ଚିବା ପରେ ସେଠାକାର ପୋଲିସ ସୀମାରେ ହିଁ ତାଙ୍କୁ ଅଟକାଇ ଦେଇଥିଲେ। ତେବେ ଯାଞ୍ଚ ସମୟରେ ଜଣାପଡ଼ିଥିଲା ଯେ, ବରପକ୍ଷଙ୍କ ପାଖରେ ଜିଲା ପ୍ରଶାସନର ଅନୁମତି ରହିଛି କିନ୍ତୁ କନ୍ୟାପକ୍ଷଙ୍କ ନିକଟରେ କୌଣସି ଅନୁମତି ନାହିଁ। ଏଭଳି ସ୍ଥିତିରେ ବିବାହରେ ସଙ୍କଟ ଦେଖାଦେବାରୁ ବର ଓ କନ୍ୟାପକ୍ଷ ପ୍ରଶାସନଙ୍କୁ ଗୁହାରୀ କରିଥିଲେ। ଏହାପରେ ଉତ୍ତରପ୍ରଦେଶ ଓ ଉତ୍ତରାଖଣ୍ଡ ସୀମାରେ ବିବାହ ହେବ ବୋଲି ନିଷ୍ପତ୍ତି ନିଆଯାଇଥିଲା। ଉକ୍ତ ମୁହୂର୍ତ୍ତରେ ବିକ୍ରମ ଓ ନେହାଙ୍କ ବିବାହ କାଶୀପୁରର ପେଗା ଆଉଟପୋଷ୍ଟ ସୀମାରେ ଅନୁଷ୍ଠିତ ହୋଇଥିଲା। ଏହି ବିବାହରେ ଉତ୍ତରପ୍ରଦେଶର ୫ଜଣ ବରଯାତ୍ରୀ ଉତ୍ତରାଖଣ୍ଡର ସୀମା ଆଡକୁ ଆସିଥିଲେ। ଉକ୍ତ ବରଯାତ୍ରୀଙ୍କୁ ପୋଲିସକର୍ମୀ ସ୍ବାଗତ କରିଥିଲେ।
ଏହାପରେ ରୀତିନୀତି ଅନୁସାରେ ବର ଓ କନ୍ୟାଙ୍କ ବିବାହ ହୋଇଥିଲା। ଏହି ବିବହାରେ ସାମାଜିକ ଦୂରତ୍ୱକୁ ଗୁରୁତ୍ୱ ଦିଆଯାଇଥିଲା। ୧୨ ବର୍ଷ ପୂର୍ବରୁ ନେହାଙ୍କ ବାପାଙ୍କ ଦେହାନ୍ତ ହୋଇଥିବାରୁ ଜଣେ ପୋଲିସକର୍ମୀ ତାଙ୍କର କନ୍ୟାଦାନ କରିଥିଲେ। ବିବାହ ଶେଷ ହେବା ପରେ ପୋଲିସକର୍ମୀମାନେ କନ୍ୟାଙ୍କୁ ବିଦା କରିଥିଲେ। ଏହି ବିବାହ ଏବେ ଚର୍ଚ୍ଚାର ବିଷୟ ପାଲଟିଛି।
