ଲକ୍ଷ୍ନୌ,୧୭ା୫: ଆଇପିଏଲ୍ର ୬୩ ତମ ମ୍ୟାଚରେ କୃନାଲ ପାଣ୍ଡ୍ୟା(୪୯) ଓ ମାର୍କସ୍ ଷ୍ଟୋଇନିସଙ୍କ ୮୯ ରନ୍ ବଳରେ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ୧୭୭ ରନ୍ ସ୍କୋର କରିଛି ଲକ୍ଷ୍ନୌ ସୁପର ଜାଏଣ୍ଟ୍ସ। ଏକାନାର ସ୍ଲୋ ଟ୍ରାକ୍ରେ ୩୫ ରନରେ ୩ ଉଇକେଟ ହରାଇବା ପରେ ଦୃଢ ଭାବରେ ପ୍ରତ୍ୟାବର୍ତ୍ତନ କରିଥିଲା ଘରୋଇ ଦଳ। ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଲକ୍ଷ୍ନୌ ୩ ଉଇକେଟ ହରାଇ ୧୭୭ ରନ୍ କରିଥିଲା।
ମଙ୍ଗଳବାର କାଇଲ ମେୟର୍ସଙ୍କ ସ୍ଥାନରେ ଦୀପକ ହୁଦା ଇନିଂସ ଓପନ କରିଥିଲେ। ପ୍ରଥମ ଉଇକେଟରେ ୧୨ ରନ୍ ସଂଗ୍ରହ କରିବା ପରେ ୫ ରନ୍ କରି ଜାସନ୍ ବେହେଣ୍ଡ୍ରଫ୍ଙ୍କ ବଲରେ ଆଉଟ ହୋଇଥିଲେ ହୁଦା। ଗତ ମ୍ୟାଚ୍ର ଅର୍ଦ୍ଧଶତକ ହାସଲକାରୀ ପ୍ରେରକ ମଙ୍କଡଙ୍କୁ ପରବର୍ତ୍ତୀ ବଲରେ ଖାତା ଖୋଲିବା ପୂର୍ବରୁ ଆଉଟ କରିଥିଲେ। ୧୨ ରନ୍ରେ ଦୁଇ ଉଇକେଟ ହରାଇବା ପରେ ଅଧିନାୟକ କୃନାଲ ପାଣ୍ଡ୍ୟା (୪୯) ଓ କ୍ୱିଣ୍ଟନ ଡି କକ୍(୧୬) ତୃତୀୟ ଉଇକେଟରେ ୨୩ ରନ୍ ଯୋଡିଥିଲେ। ପୀୟୂଷ ଚାଓ୍ବଲା ନିଜର ପ୍ରଥମ ଓଭର ବୋଲିଂ କରିବାକୁ ଆସିଥିବା ବେଳେ ପ୍ରଥମ ବଲରେ ଡି କକ୍ଙ୍କ ଉଇକେଟ ନେଇଥିଲେ। ୩୫ ରନ୍ରେ ୩ ଉଇକେଟ ପତନ ପରେ କୃନାଲଙ୍କ ସହିତ ମୋର୍ଚ୍ଚା ସମ୍ଭାଳିଥିଲେ ମାର୍କସ୍ ଷ୍ଟୋଇନିସ୍। ଉଭୟ ଖେଳାଳି ୮୨ ରନ୍ ଯୋଡିବା ସହିତ ଚଳିତ ସିଜନରେ ଲକ୍ଷ୍ନୌର ଶ୍ରେଷ୍ଠ ଭାଗୀଦାରି କରିଥିଲେ। ୧୬ ତମ ଓଭରରେ କୃନାଲ ସିଙ୍ଗଲ ନେବା ପ୍ରୟାସରେ ରିଟାୟର୍ଡ ହର୍ଟ ହୋଇଥିଲେ। ୪୨ ବଲ୍ ଖେଳି ସେ ୪୯ ରନ୍ ସଂଗ୍ରହ କରିଥିଲେ। ଏହାପରେ ଆକ୍ରମଣାତ୍ମକ ବ୍ୟାଟିଂ କରିଥିଲେ ଷ୍ଟୋଇନିସ୍। ଶେଷ ଯାଏ ଅପରାଜିତ ରହିବା ସହିତ ସେ ୮୯ ରନ୍ ସ୍କୋର କରିଥିଲେ। ଏହି ଇନିଂସରେ ୪ ଚୌକା ଓ ୮ ଛକା ସାମିଲ ଥିଲା। ନିକୋଲାସ୍ ପୁରନ୍(୮)ଙ୍କ ସହିତ ସେ ଅନ୍ତିମ ୩ ଓଭରରୁ ୫୪ ରନ୍ ସଂଗ୍ରହ କରିଥିଲେ। କ୍ରିସ୍ ଜୋର୍ଡାନ୍ ବୋଲିଂ କରିଥିବା ୧୭ ତମ ଓଭରରୁ ଷ୍ଟୋଇନିସ୍ ୨୪ ରନ୍ ସ୍କୋର କରିଥିଲେ। ମୁମ୍ବାଇ ପକ୍ଷରୁ ଜାସନ୍ ବେହେଣ୍ଡ୍ରଫ୍ ଦୁଇ ଓ ପୀୟୁଷ ଚାଓ୍ବଲା ଗୋଟିଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ଲକ୍ଷ୍ନୌ ସୁପର ଜାଏଣ୍ଟ୍ସ ୨୦ ଓଭରରେ ୧୭୭/୩ ( ମାର୍କସ୍ ଷ୍ଟୋଇନିସ-୮୯*, କୃନାଲ ପାଣ୍ଡ୍ୟା-୪୯(ରିଟାୟର୍ଡ), କ୍ୱିଣ୍ଟନ୍ ଡି କକ୍-୧୬, ଜାସନ୍ ବେହେଣ୍ଡ୍ରଫ୍-୨/୩୦, ପୀୟୁଷ ଚାଓ୍ବଲା-୧/୨୬)।
