ଭୁବନେଶ୍ୱର,୩ା୧୦(ବ୍ୟୁରୋ): ରାଜସ୍ଥାନର ଜୟପୁର, ଯୋଧପୁର ଓ ଦୁର୍ଗାପୁରା ହେଉଛି ଦେଶର ସବୁଠାରୁ ସ୍ବଚ୍ଛ ରେଳ ଷ୍ଟେଶନ। ପ୍ରଥମ, ଦ୍ୱିତୀୟ ଓ ତୃତୀୟରେ ଯଥାକ୍ରମେ ଏହି ଷ୍ଟେଶନଗୁଡିକ ରହିଛି। ବୁଧବାର ଦେଶର ୭୨୦ ଷ୍ଟେଶନକୁ ନେଇ କରାଯାଇଥିବା ଏହି ସ୍ବଚ୍ଛତା ସର୍ଭେର ଫଳାଫଳ ବୁଧବାର ପ୍ରକାଶ ପାଇଛି। ଦୁଃଖର ବିଷୟ ଯେ, ଗତଥର ଏହି ସର୍ଭେ ତାଲିକାରେ ୯ମ ସ୍ଥାନରେ ଥିବା ଭୁବନେଶ୍ୱର ଷ୍ଟେଶନ ଚଳିତବର୍ଷ ୮୭କୁ ଖସି ଆସିଛି। ଏହି ସର୍ଭେରେ ସଫେଇ, ବର୍ଜ୍ୟବସ୍ତୁ ପରିଚାଳନା, ମଇଳା ପାଣି ପରିଚାଳନା, ସବୁଜ ସାର୍ଟିଫିକେଟ, ଶକ୍ତି ସଂରକ୍ଷଣ, ଆଇଏସଓ ସାର୍ଟିଫିକେଟକୁ ମାନଦଣ୍ଡରେ ସାମିଲ କରାଯାଇଥିଲା। ଏ ନେଇ ପୂର୍ବରୁ ୨୬ ଅଗଷ୍ଟରେ ଧରିତ୍ରୀରେ ପ୍ରକାଶିତ ‘ସ୍ବଚ୍ଛତାରେ ତଳକୁ ଖସିପାରେ ଭୁବନେଶ୍ୱର ଷ୍ଟେଶନ’ ଖବର ସତ ହୋଇଛି। ଅନ୍ୟ ଷ୍ଟେଶନ ଅପେକ୍ଷା ଭୁବନେଶ୍ୱର ଷ୍ଟେଶନରେ ଭିତ୍ତିଭୂମିର ଅଭାବ, ସ୍ବଳ୍ପ ଲୋକବଳ ଓ ଉନ୍ନତ ଜ୍ଞାନକୌଶଳର ଅଭାବ ଯୋଗୁ ଏଭଳି ଫଳ ମିଳିଛି ବୋଲି ଅନୁମେୟ କରାଯାଉଛି। ଏହି ତାଲିକାରେ ଦେଶର ରାଜଧାନୀ ଦିଲ୍ଲୀର କୌଣସି ଗୋଟିଏ ବି ଷ୍ଟେଶନ ସ୍ଥାନ ପାଇନାହଁି। ରାଜସ୍ଥାନ, ଗୁଜରାଟ, ପଞ୍ଜାବ ଓ ହରିୟାଣା ଏହି ତାଲିକାରେ ଶୀର୍ଷ ସ୍ଥାନରେ ରହିଛନ୍ତି। ପୂର୍ବତଟ ରେଳପଥରେ ଭୁବନେଶ୍ୱର ୮୭ରେ ଥିବାବେଳେ ବିଶାଖାପାଟଣା ୮୪ରେ ରହିଛି। ସୂଚନାଯୋଗ୍ୟ, ରେଳପଥ ୨୦୧୬ଠାରୁ ଷ୍ଟେଶନଗୁଡିକର ସ୍ବଚ୍ଛତା ପାରାମିଟର ଚେକ୍ କରୁଛି। ଚଳିତଥର କ୍ୱାଲିଟି କାଉନସିଲ ଅଫ ଇଣ୍ଡିଆ ଷ୍ଟେଶନର ସ୍ବଚ୍ଛ ସର୍ବେକ୍ଷଣ କରୁଥିଲା।
