କଣିହାଁ,୨୭।୮(ଡି.ଏନ୍.ଏ): ରାଜ୍ୟରେ ଗତ କିଛି ଦିନରୁ ଲଗାତର ଭାବେ ପ୍ରବଳ ବର୍ଷା ଜାରି ରହିଛି। ଉପରମୁଣ୍ଡରେ ଲଗାଣ ବର୍ଷା ଯୋଗୁ ତଳିଆ ଅଞ୍ଚଳ ଏବେ ଜଳମଗ୍ନ ହୋଇପଡ଼ିଛି। ଇତିମଧ୍ୟରେ କଣିହାଁ ବ୍ଲକ ସ୍ଥିତ ବ୍ରାହ୍ମଣୀ ନଦୀର ରେଙ୍ଗାଳି ଡ୍ୟାମରୁ ବନ୍ୟାଜଳ ନିଷ୍କାସନ ପାଇଁ ଗତ ଶନିବାର ରାତିରେ ଗୋଟିଏ ଗେଟ ଖୋଲାଯାଇଥିଲା। ଡ୍ୟାମର ଜଳଧାରଣ କ୍ଷମତା ୧୨୩.୫୦ମିଟର ହୋଇଥିବାବେଳେ ବୁଧବାର ବିଳମ୍ବିତ ରାତିରେ ଜଳସ୍ତର ୧୨୩.୪୩ ମିଟରକୁ ପହଞ୍ଚିଛି। ଫଳରେ ପୁଣି ଡ୍ୟାମର ୨ଟି ଗେଟ ଖୋଲାଯାଇଥିବା ଜଣାପଡ଼ିଛି। ଗୁରୁବାର ଏନେଇ ରେଙ୍ଗାଳି ଡ୍ୟାମ ଡିଭିଜନ ନିର୍ବାହୀ ଯନ୍ତ୍ରୀ ଅଜିତ କୁମାର ଜେନା ସୂଚନା ଦେଇଛନ୍ତି। ସୂଚନା ମୁତାବକ ପୂର୍ବାହ୍ନ ୧୦ଟା ସୁଦ୍ଧା ଡ୍ୟାମ ଭିତରକୁ ପ୍ରତି ସେକେଣ୍ଡରେ ୧୦୧୩୯.୯୯ଘନମିଟର ଜଳ ପ୍ରବେଶ କରୁଥିବା ବେଳେ ଖୋଲାଯାଇଥିବା ୩ଗେଟ ଦେଇ ୫୫୭୬.୦୭ ଘନମିଟର ଜଳ ନିଷ୍କାସିତ ହେଉଛି ।
