ବିଞ୍ଝାରପୁର,୪ା୧୨(ଡି.ଏନ୍.ଏ)- ଗତ ସାଧାରଣ ନିର୍ବାଚନ ପରଠାରୁ ବିଞ୍ଝାରପୁର ବ୍ଲକ କଲ୍ୟାଣପୁର ପଞ୍ଚାୟତର ରୁଦ୍ରପୁର ଗ୍ରାମରେ ବିଜେଡି ଓ ଭାଜପା ସମର୍ଥକଙ୍କ ମଧ୍ୟରେ ଲାଗି ରହିଥିବା ଛକାପଞ୍ଝା ସୋମବାର ସନ୍ଧ୍ୟାରେ ବିସ୍ଫୋରକ ପରିସ୍ଥିତି ସୃଷ୍ଟି କରିଥିଲା। ରାଜନୈତିକ ବିବାଦକୁ ନେଇ ଉଭୟ ଦଳର ସମର୍ଥକଙ୍କ ମଧ୍ୟରେ ଗୋଷ୍ଠି ସଂଘର୍ଷ ଘଟିବାରୁ ୨ଜଣ ଗୁରୁତର ହୋଇଛନ୍ତି। ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଆହତଦ୍ୱୟ ହେଲେ ରୁଦ୍ରପୁର ଗ୍ରାମର ଅକ୍ଷୟ ଦାସ ଓ କଲ୍ୟାଣପୁର ଗ୍ରାମର ବାବନା ଗୋଚ୍ଛାୟତ। ଏହି ଘଟଣାକୁ ନେଇ ଉଭୟ ଗୋଷ୍ଠୀ ପକ୍ଷରୁ ଅଭିଯୋଗ ହେବା ପରେ ପୋଲିସ ୪ଟି ପୃଥକ ମାମଲା (ନଂ. ୩୪୮/୧୯, ୩୪୯/୧୯, ୩୫୦/୧୯, ୩୫୧/୧୯) ରୁଜୁ କରିଛି। ଏହି ଘଟଣାରେ ସଂପୃକ୍ତି ନେଇ ପୂର୍ବତନ ସରପଞ୍ଚ ତଥା ଭାଜପା ସମର୍ଥକ ମୁକ୍ତିକାନ୍ତ ସାମଲ ଓ ତାଙ୍କ ସହେଯାଗୀ ଅଶୋକ ଦାସ ଏବଂ ଅପରଗୋଷ୍ଠୀର ବିଜେଡି ସମର୍ଥକ ପ୍ରକାଶ କାଣ୍ଡିଙ୍କୁ ଗିରଫ କରି ମଙ୍ଗଳବାର କୋର୍ଟ ଚାଲାଣ କରିଛି। ଏପରି କି ଏହି ଘଟଣାରେ ଅନ୍ୟ ୨ଜରଙ୍କୁ ଅଟକ ରଖି ପୋଲିସ ପଚରାଉଚରା ଜାରି ରଖିଛି। ଏହି ଘଟଣାରେ କଲ୍ୟାଣପୁର ପଞ୍ଚାୟତରେ ଉତ୍ତେଜନା ଦେଖା ଦେଇଥିବାବେଳେ ଯାଜପୁର ଏସ୍ଡି୍ପିଓ ରବୀନ୍ଦ୍ର କୁମାର ଜେନା ଘଟଣାସ୍ଥଳରେ ପହଞ୍ଚତ୍ ପରିସ୍ଥିତି ଅନୁଧ୍ୟାନ କରିଛନ୍ତି। ତେବେ ରୁଦ୍ରପୁର ଗ୍ରାମରେ ଉତ୍ତେଜନା ଲାଗି ରହିଥିବାରୁ ପୋଲିସ ପକ୍ଷରୁ ୧ପ୍ଲାଟୁନ ସୁରକ୍ଷାବଳ ନିୟୋଜିତ ହୋଇଥିବା ଜଣାପଡ଼ିଛି।
