ଭୁବନେଶ୍ୱର, ୨୩।୬(ବ୍ୟୁରୋ): କଟକଣା କୋହଳ ହେବା ପଠାରୁ ରାଜଧାନୀ ଭୁବନେଶ୍ୱରକୁ ବାହାର ରାଜ୍ୟରୁ ଦଳଦଳ ହୋଇ ଶ୍ରମିକ ଆସୁଛନ୍ତି। ସବୁ ନିୟମକୁ ଜଳାଞ୍ଜଳି ଦେଇ ଅମାନିଆ କଣ୍ଟ୍ରାକ୍ଟର ସେମାନଙ୍କୁ କାମରେ ଲଗାଉଛନ୍ତି। ବିଶେଷକରି କରୋନା ହଟ୍ସ୍ପଟ ରାଜ୍ୟ ପଶ୍ଚିମବଙ୍ଗରୁ ଅଧିକ ଶ୍ରମିକ ଆସିଥିବାବେଳେ ଉତ୍ତରପ୍ରଦେଶ, ଛତିଶଗଡ଼ ଓ ଅନ୍ୟ ରାଜ୍ୟରୁ ମଧ୍ୟ ଶ୍ରମିକଙ୍କୁ ଭୁବନେଶ୍ୱର ଅଣାଯାଉଛି। ଏମାନଙ୍କ ପାଇଁ ସହରର ସଂକ୍ରମଣ ବଢ଼ିବା ସହ ସ୍ଥିତି ବିଗିଡିଯିବ ବୋଲି ଯେଉଁ ଆଶଙ୍କା କରାଯାଉଥିଲା ତାହା ଏବେ ସତ ହେବାରେ ଲାଗିଛି। ସୋମବାର ଭୁବନେଶ୍ୱରରୁ ଚିହ୍ନଟ ୧୧ଜଣ ନୂଆ ଆକ୍ରାନ୍ତଙ୍କ ମଧ୍ୟରେ ୮ଜଣ ବାହାର ରାଜ୍ୟର ଶ୍ରମିକ ଥିବା ଜଣାପଡିଛି। ସେମାନେ ଅନ୍ୟକେତେଜଣଙ୍କ ସହ ଭୁବନେଶ୍ୱର ଆସି ଏକ ନିର୍ମାଣ କାର୍ଯ୍ୟରେ ନିୟୋଜିତ ଥିଲେ। ଏନେଇ ଧରିତ୍ରୀରେ ଖବର ପ୍ରକାଶନ ପରେ ଭୁବନେଶ୍ୱର ମହାନଗର ନିଗମ (ବିଏମ୍ସି) ବିଭିନ୍ନ ସ୍ଥାନରେ ଚଢ଼ାଉ କରି ନିର୍ମାଣ କାର୍ଯ୍ୟ ବନ୍ଦ କରିବା ସହ ଶ୍ରମିକମାନଙ୍କୁ କ୍ୱାରାଣ୍ଟାଇନ୍ରେ ରଖିଥିଲା। ଏବେ ନମୁନା ପଜିଟିଭ୍ ଆସିଥିବାରୁ ସହରରେ ଆହୁରି ବହୁ ସଂକ୍ରମିତ ଶ୍ରମିକ ଥିବା ଅନୁମାନ କରାଯାଉଛି। ତେବେ ଚିହ୍ନଟ ହୋଇଥିବା ୧୧ଜଣ ନୂଆ ଆକ୍ରାନ୍ତଙ୍କ ମଧ୍ୟରୁ ୭ଜଣ ଶ୍ରମିକ ମଞ୍ଚେଶ୍ୱରରୁ ଓ ଜଣେ ବାଣୀବିହାରରୁ ଚିହ୍ନଟ ହୋଇଥିବାବେଳେ ୩ଜଣ ରେଳ କର୍ମଚାରୀ ଥିବା ବିଏମ୍ସି ଟୁଇଟ୍ ଯୋଗେ ଜଣାଇଛି। ମଞ୍ଚେଶ୍ୱରରୁ ଚିହ୍ନଟଙ୍କ ମଧ୍ୟରେ ୬ଜଣ ପୁରୁଷ ଓ ସେମାନଙ୍କ ଘର ଉତ୍ତରପ୍ରେଦେଶ। ଅନ୍ୟଜଣେ ଆକ୍ରାନ୍ତ ଶ୍ରମିକଙ୍କ ଘର ପଶ୍ଚିମବଙ୍ଗ। ସମସ୍ତେ ମଞ୍ଚେଶ୍ୱରସ୍ଥିତ ଏକ ଖବରକାଗଜ କାର୍ଯ୍ୟାଳୟ ନିକଟରେ କାମ କରୁଥିଲେ। ଅଷ୍ଟମ କରୋନା ଆକ୍ରାନ୍ତ ପଶ୍ଚିମବଙ୍ଗର ଓ ସେ ନିକଟରେ ଭୁବନେଶ୍ୱର ଆସି ବାଣୀବିହାର ଅଞ୍ଚଳରେ କାମ କରୁଥିଲେ। ଅନ୍ୟ ୩ ଆକ୍ରାନ୍ତ ରେଳ କର୍ମଚାରୀ ହୋଇଥିବାବେଳେ ନିକଟରେ ଦିଲ୍ଲୀରୁ ଫେରିଥିଲେ। ନୂଆ ଆକ୍ରାନ୍ତଙ୍କୁ ମିଶାଇଲେ ରାଜଧାନୀରେ ଆକ୍ରାନ୍ତଙ୍କ ସଂଖ୍ୟା ୧୯୬ରେ ପହଞ୍ଚତ୍ଛି।
