ଭୁବନେଶ୍ୱର, ୧୦।୫ (ବ୍ୟୁରୋ): କରୋନା ସଂକ୍ରମଣ ରୋକିବାକୁ ସନ୍ଧ୍ୟା ୭ରୁ ସକାଳ ୭ଟା ପର୍ଯ୍ୟନ୍ତ ୧୨ ଘଣ୍ଟିଆ କର୍ଫ୍ୟୁ କରିଛି କମିଶନରେଟ ପୋଲିସ। ଏପରି କି ରାତିରେ କେବଳ ଭୂତ ହିଁ ଯାଇପାରିବେ ବୋଲି ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ଟୁଇଟ୍ କରି କହିଛନ୍ତି। ଏଭଳିସ୍ଥିତିରେ ଲକ୍ଡାଉନ୍ରେ ରାଜଧାନୀରେ ଗୁରୁବାର ରାତିର କର୍ଫ୍ୟୁ କିଭଳି ଥିଲା ସେନେଇ ଧରିତ୍ରୀ ଟିମ୍ କରିଥିଲା ଅନୁସନ୍ଧାନ। ସନ୍ଧ୍ୟା ୭ରୁ ରାତି ୨ଟା ପର୍ଯ୍ୟନ୍ତ ସହରର ବିଭିନ୍ନ ଛକ, ଗଳି କନ୍ଦିରେ ବୁଲି ରାଜଧାନୀର ରାତିକୁ ପରଖା ଯାଇଥିଲା। ୭ଟା ବାଜିବା ପୂର୍ବରୁ ପୋଲିସ ଭ୍ୟାନ୍ଗୁଡ଼ିକ ସାଇରନ୍ ବଜାଇ ସହରର ଗଳି କନ୍ଦିରେ ବୁଲି ଦୋକାନ ବଜାର ବନ୍ଦ କରୁଛି। ଲୋକଙ୍କୁ ଘରକୁ ଚାଲିଯିବାକୁ କହୁଛି। ଯେଉଁମାନେ ଯାଉ ନାହାନ୍ତି ସେମାନଙ୍କୁ ପୋଲିସ ଲାଠି ମାଡ଼ କରୁଥିବା ଦେଖିବାକୁ ମିଳୁଛି। ରାତି ୯ଟା ପର୍ଯ୍ୟନ୍ତ ରାଜଧାନୀର ବିଭିନ୍ନ ଛକରେ ପୋଲିସ ଦେଖିବାକୁ ମିଳୁଛି। ହେଲେ ରାତି ପ୍ରାୟ ସାଢେ ୯ଟା ପରଠୁ ରାଜଧାନୀର କୌଣସି ଛକରେ ଜଣେ ହେଲେ ବି ପୋଲିସଙ୍କୁ ଦେଖିବାକୁ ମିଳୁ ନାହିଁ। ସହରର ବିଭିନ୍ନ ଛକ ଖୋଲାମେଲା। ହାତ ଗଣତି ପିସିଆର ଭ୍ୟାନ୍କୁ ବୁଲୁଥିବା ଦେଖିବାକୁ ମିଳୁଛି। ଯିଏ ପାଇଲା ଯୁଆଡ଼େ ଚାଲିଲା। କେହି କାହାକୁ ଅଟକାଇବାକୁ ନାହଁାନ୍ତି। ଭୁବନେଶ୍ୱର ବାହାରର ଅନେକ ଲୋକେ ସହର ଭିତରକୁ ସହଜରେ ଯିବା ଆସିବା କରିପାରୁଛନ୍ତି। ରାତି ପ୍ରାୟ ଗୋଟାଏ ସମୟରେ ବାଣୀବିହାର ଛକରେ ପହଞ୍ଚିବା ପରେ ଦେଖିବାକୁ ପାଇଲୁ ଅନେକ ଲୋକ ବାଇକ ଧରି ଯାତାୟାତ କରୁଛନ୍ତି। କ’ଣ ପାଇଁ ଏମାନେ ଯାଉଥିବା ସନ୍ଦେହ ହେବାରୁ ଜଣଙ୍କୁ ଅଟକାଇ ପଚାରିବାରୁ ସେ କେନ୍ଦ୍ରାପଡ଼ା ଯାଉଥିବା କହିଥିଲେ। ବିଳମ୍ବିତ ରାତିରେ ପୋଲିସର ଚେକିଂ ନ ଥିବାରୁ ସହଜରେ ଯିବା ଆସିବା କରିହେଉଛି ବୋଲି କହିଥିଲେ। ସେହିପରି ମାଷ୍ଟରକ୍ୟାଣ୍ଟିନ ଛକ,ଏଜି ଛକ, କ୍ୟାପିଟାଲ ହସ୍ପିଟାଲ ଛକ, ଜୟଦେବ ବିହାର ଛକ,ଖଣ୍ଡଗିରି ଛକ,ଏୟାରପୋର୍ଟ ଛକ, ଲକ୍ଷ୍ମୀସାଗର ଛକ,ନାଲ୍କୋ ଛକ,ପଟିଆ ଛକ ଆଦି ଅଞ୍ଚଳରେ ପୋଲିସ ପୋଷ୍ଟ ଥିଲେ ମଧ୍ୟ ଜଣେ ହେଲେ ପୋଲିସ କର୍ମଚାରୀଙ୍କୁ ଦେଖିବାକୁ ମିଳି ନ ଥିଲା। କେବଳ ପୋଲିସ ପୋଷ୍ଟ ନିକଟରେ କୁକୁର ବୁଲୁଥିବା ଦେଖିବାକୁ ପାଇଥିଲୁ।
ଖୋଲା ଆକାଶ ତଳେ ଜୀବନ
ଲକ୍ଡାଉନ୍ ଫଳରେ ଅନେକ ଲୋକ ଭୁବନେଶ୍ୱରରେ ଫସି ରହିଯାଇଛନ୍ତି। ରହିବା ପାଇଁ ବାସ ନ ଥିବାରୁ ରାଜଧାନୀର ଫୁଟଫାଥ ସେମାନଙ୍କ ପାଇଁ ଶୋଇବା ଘର ପାଲଟି ଯାଇଛି। ମଶା, ଡାଅଁାଶ କାମୁଡୁ ଥିଲେ ମଧ୍ୟ ସେମାନଙ୍କୁ କିଛି ଫରକ ପଡୁନି। ଦିନରେ ଲୋକମାନେ ଯାହା ଖାଇବାକୁ ଦିଅନ୍ତି ସେଥିରେ ସେମାନେ ବଞ୍ଚନ୍ତି ହେଲେ ରାତିରେ କେହି ଆସୁ ନ ଥିବାରୁ ଅନେକେ ଉପାସରେ ଶୋଉଥିବା କହିଛନ୍ତି। ବିଶେଷ କରି ଖଣ୍ଡଗିରି ପାଦଦେଶରେ ଥିବା ବସ୍ ଷ୍ଟାଣ୍ଡରେ ମହାରାଷ୍ଟ୍ରର ୭୦ଲୋକ ଫସି ରହିଛନ୍ତି। ସେମାନେ ବେଲୁନ୍ ଏବଂ ଅନ୍ୟ ବେପାର କରିବାକୁ ଆସିଥିଲେ। ହେଲେ ଲକ୍ଡାଉନ୍ ଯୋଗୁ କୁଆଡ଼େ ଯାଇ ନ ପାରି ଖୋଲା ଆକାଶ ତଳେ ବର୍ଷା, କାକରରେ ଶୋଉଛନ୍ତି। ସେହିପରି ମାଷ୍ଟରକ୍ୟାଣ୍ଟିନ୍ ଫୁଟଫାଥ ଏବଂ ସହରର ବିଭିନ୍ନ ଫୁଟ୍ପାଥରେ ଅନେକେ ଲୋକ ଶୋଇଥିବା ଦେଖିବାକୁ ମିଳିଛି।
ଥାନା ଗେଟ୍ରେ ତାଲା, ବାହାରେ ଡିସିଓ
ରାଜଧାନୀ ରାତିରେ ଥାନାର ଦୃଶ୍ୟ ମଧ୍ୟ କିଛି ନିଆରା ଥିଲା। କରୋନା ଭୟରେ ଏକାଧିକ ଥାନା ଗେଟରେ ତାଲା ପଡିଥିଲା। ଥାନାର ଡିସିିଓ ଥାନା ବାହାରେ ଟେବୁଲ ପକାଇ ବସିଥିବା ଦେଖିବାକୁ ମିଳିଥିଲା। ଯଦି କେହି ଥାନାକୁ ଆସୁଥିଲେ ସେମାନେ ଗେଟ ବାହାରେ ଆସିବାର କାରଣ କହିବା ପରେ ପୋଲିସ ତାଙ୍କର ସମସ୍ୟା ବୁଝୁଥିଲା। ଖଣ୍ଡଗିରି, ନୟାପଲୀ, ମହିଳା, କ୍ୟାପିଟାଲ, ଲକ୍ଷ୍ମୀସାଗର, ଖାରବେଳନଗର ଆଦି ଅନେକ ଥାନାରେ ଏଭଳି ଦୃଶ୍ୟ ଦେଖିବାକୁ ମିଳିଥଲା।
ରାତିରେ ଯେଉଁମାନେ ବୁଲୁଛନ୍ତି ସେମାନଙ୍କ ପାସ୍ ଅଛି: ସିପି
ଏନେଇ ସିପି ସୁଧାଂଶୁ ଷଡ଼ଙ୍ଗୀ କହିଛନ୍ତି ଯେ,ଯେଉଁମାନେ ରାତିରେ ବୁଲୁ୍ଛନ୍ତି ସେମାନଙ୍କ ପାସ୍ ରହିଛି। ନ ହେଲେ ସେମାନେ ବୁଲିବାକୁ ସାହସ କରିବେନି। ଦିନ ସାରା ପୋଲିସ କାର୍ଯ୍ୟ କରୁଛି, ତେଣୁ ରାତିରେ ସେମାନେ ବିଶ୍ରାମ ନେଉଛନ୍ତି। ରାତିରେ ଜଗିବା ସମ୍ଭବ ନୁହେଁ। ଲୋକେ ସତର୍କ ହେଲେଣି ସେମାନେ ରାତିରେ ବାହାରକୁ ବାହାରିବେ ନାହିଁ ବୋଲି ଷଡ଼ଙ୍ଗୀ କହିଛନ୍ତି।
ତ୍ରିନାଥ ମହାନ୍ତି
