ଭୁବନେଶ୍ୱର,୨୦।୧୨(ବ୍ୟୁରୋ): ରାଜ୍ୟରେ ଥିବା ରକ୍ତଭଣ୍ଡାରଗୁଡ଼ିକର ସୁପରିଚାଳନା ନିମନ୍ତେ ଏହାର ସମସ୍ତ କାର୍ଯ୍ୟନିର୍ବାହୀ କମିଟିର ପୁନର୍ଗଠନ କରାଯିବ। ଏନେଇ ରାଜ୍ୟ ସରକାର ନୀତିଗତ ନିଷ୍ପତ୍ତି ଗ୍ରହଣ କରି ସମସ୍ତ ଜିଲାପାଳଙ୍କୁ ଅବଗତ କରାଇଛନ୍ତି। ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ କମିଶନର ତଥା ଶାସନ ସଚିବ ଡା. ପ୍ରମୋଦ କୁମାର ମେହେର୍ଦ୍ଦା ଜାରି କରିଥିବା ମାର୍ଗଦର୍ଶିକାନୁଯାୟୀ, ପୁନର୍ଗଠିତ ଜିଲାସ୍ତରୀୟ ରକ୍ତଭଣ୍ଡାର ପରିଚାଳନା କମିଟିରେ ସମ୍ପୃକ୍ତ ଜିଲାର ଜିଲାପାଳମାନେ ଅଧ୍ୟକ୍ଷ ରହିବେ । ଉପଖଣ୍ଡସ୍ତରୀୟ ରକ୍ତଭଣ୍ଡାର ପାଇଁ ଉପଜିଲାପାଳ ଓ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରସ୍ତରୀୟ ରକ୍ତଭଣ୍ଡାର ପାଇଁ ତହସିଲଦାରମାନଙ୍କୁ ଅଧ୍ୟକ୍ଷ ଭାବେ ମନୋନୀତ କରାଯିବ।
ଜିଲାସ୍ତରାୟ ରକ୍ତଭଣ୍ଡାରର ଉପସଭାପତି ଭାବେ ଜିଲା ମୁଖ୍ୟ ଚିକିତ୍ସାଧିକାରୀ, ଉପଖଣ୍ଡସ୍ତରରେ ଉପଖଣ୍ଡଚିକିତ୍ସା ଚିକିତ୍ସା ଅଧିକାରୀ ଓ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରସ୍ତରରେ ଭାରପ୍ରାପ୍ତ ମେଡିକାଲ ଅଫିସର ଉପାଧ୍ୟକ୍ଷ ରହିବେ ଏବଂ ସମ୍ପୃକ୍ତ ରକ୍ତଭଣ୍ଡାର ଅଧିକାରୀ ଏହାର ଆବାହକ ରହିବେ। ପ୍ରତି ରକ୍ତଭଣ୍ଡାରରେ ରାଜ୍ୟ ରକ୍ତ ସଞ୍ଚାରଣ ପରିଷଦର ଜଣେ ପ୍ରତିନିଧିଙ୍କୁ ସଦସ୍ୟଭାବେ ରଖାଯିବ। ସେହିପରି ସମ୍ପୃକ୍ତ ଅଞ୍ଚଳ ପୌରସଂସ୍ଥାର ଚେୟାରମ୍ୟାନ, ନିୟମିତ ରକ୍ତଦାନ କରୁଥିବା ଜଣେ ମହିଳା ପ୍ରତିନିଧି, ଜାତୀୟ ସ୍ବାସ୍ଥ୍ୟ ମିଶନର ଡିପିଏମ୍ ମଧ୍ୟ ଏଥିରେ ସଦସ୍ୟ ରହିବେ। ଏତଦ୍ବ୍ୟତୀତ ଅଧ୍ୟକ୍ଷ ଆଉ ୫ଜଣଙ୍କୁ ମନୋନୀତ କରିବେ। ଯେଉଁମାନେ ନିୟମିତ ଭାବେ ରକ୍ତଦାନ ଶିବିର ଆୟୋଜନ କରୁଛନ୍ତି ଓ ଲୋକଙ୍କୁ ସ୍ବେଚ୍ଛାକୃତ ଭାବେ ରକ୍ତଦାନ ନିମନ୍ତେ ଉତ୍ସାହିତ କରୁଥିବେ ସେମାନଙ୍କୁ ମଧ୍ୟ ପରିଚାଳନା କମିଟିରେ ରଖାଯିବ। ରାଜ୍ୟ ସରକାର ରକ୍ତ ସଂଗ୍ରହ, ସଂରକ୍ଷଣ, ବିତରଣ ଆଦିରେ ସ୍ବଚ୍ଛତା ଉପରେ ଗୁରୁତ୍ୱାରୋପ କରୁଥିବା ପରିପ୍ରେକ୍ଷୀରେ ରକ୍ତଭଣ୍ଡାରଗୁଡିକର ନୁଆ ପରିଚାଳନା କମିଟି ବିଭିନ୍ନ ପ୍ରସଙ୍ଗ ତଦାରଖ କରିବେ ା ପ୍ରତି ବର୍ଷରେ ଅନ୍ୟୁନ ଦୁଇଥର ଏହି ପରିଚାଳନାକମିଟି ବୈଠକ ବସିବ ଏବଂ ରାଜ୍ୟ ରକ୍ତସଂଚାରଣ ପରିଷଦକୁ ପରିଚାଳନା କମିଟି ବୈଠକର ବିବରଣୀ ପଠାଇବାକୁ କୁହାଯାଇଛି। ବିଭିନ୍ନ ରକ୍ତଭଣ୍ଡାରର ଅଧିକାରୀମାନେ ଆବାହକ ଭାବେ ତୁରନ୍ତ ପୂର୍ଣ୍ଣାଙ୍ଗ ପରିଚାଳନା କମିଟି ଗଠନ ପାଇଁ ପଦକ୍ଷେପ ନେବାକୁ ସ୍ବାସ୍ଥ୍ୟ ବିଭାଗ ତରଫରୁ ନିର୍ଦ୍ଦେଶନାମା ଜାରିି କରାଯାଇଛି।
ପୂର୍ବରୁ ସରକାରୀ ଡାକ୍ତରଖାନା ଓ ମେଡିକାଲ କଲେଜକଲେଜ ଗୁଡିକରେ ଥିବା ରକ୍ତଭଣ୍ଡାରଗୁଡିକ ରେଡକ୍ରସ୍ ଦ୍ୱାରା ପରିଚାଳିତ ହେଉଥିଲା। ବର୍ତ୍ତମାନ କଟକ କେନ୍ଦ୍ରୀୟ ରକ୍ତଭଣ୍ଡାରକୁ ଛାଡିଦେଲେ ଅନ୍ୟସବୁ ସରକାରୀ ଡାକ୍ତରଖାନା ଓ ମେଡିକାଲ କଲେଜଗୁଡ଼ିକରେ ଥିବା ରକ୍ତଭଣ୍ଡାର ଗୁଡିକ ସିଧାସଳଖ ଭାବେ ରାଜ୍ୟ ସରକାରଙ୍କ ଦ୍ୱାରା ପରିଚାଳିତ ହେଉଛି।
