ଯୋଡ଼ା, ୧୨।୩(ଡି.ଏନ.ଏ.)-କେନ୍ଦୁଝର ଜିଲା ଚମ୍ପୁଆ ରେଞ୍ଜ ଯୋଡ଼ା ବନପାଳ ଅନ୍ତର୍ଗତ ଜଜାଙ୍ଗଠାରେ ୧୮ ହାତୀ ଉପଦ୍ରବ ଚଳାଇଛନ୍ତି। ଏହି ହାତୀପଲ ୩ ଟି ଘର ଭାଙ୍ଗି ଦେଇଥିବା ଜଣାପଡିଛି। ବୁଧବାର ରାତିରେ ଏହି ହାତୀପଲ ଗୁରୁବେଡା ଜଙ୍ଗଲ ମଧ୍ୟରେ ଥିବା ପମ୍ପ ହାଉସ୍ ଭିତରେ ପଶିଥିଲେ। ପରେ ରାତିପ୍ରାୟ ୧୦ଟା ସମୟରେ ବାଲିବନ୍ଧ ଫରେଷ୍ଟ ଅନ୍ତର୍ଗତ କନକନା ଓ ଗୁଗୁଦୁରୀ ଅଭିମୁଖେ ଯାଇ ସେଠାରୁ ପୁଣି ବନ୍ଧୁଆବେଡା ଓ ଜଜାଙ୍ଗ ଅଭିମୁଖେ ଆସିଥିଲେ। ରାତି ପ୍ରାୟ ୧ଟା ସମୟରେ ହାତୀପଲ ଜଜାଙ୍ଗ ଅଞ୍ଚଳର ପୂର୍ଣ୍ଣ ନାଏକ, ଗିଡୁ ମାଝି ଓ ଟୁନିଆ ମାଝିଙ୍କ ଘର ଭାଙ୍ଗି ଦେଇଥିଲେ ଓ ଘରେ ରଖାଯାଇଥିବା ଧାନଚାଉଳକୁ ଖାଇ ଦେଇଥିବା ଜଣାପଡିଛି। ଖବର ପାଇ ଯୋଡା ବନପାଳ ପିଅନ ନାଏକ, ଫରେଷ୍ଟ ଗାର୍ଡ ପ୍ରଦୀପ କୁମାର ବେହେରା ଓ ଦୋଳ ଗୋବିନ୍ଦ ଦେଓ ଘଟଣାସ୍ଥଳକୁ ଯାଇ ଏହାର ଅନୁଧ୍ୟାନ କରିଥିଲେ। ଘରଭଙ୍ଗା ଯାଇଥିବା ଲୋକଙ୍କର ଲିଖିତ ଅଭିଯୋଗ ହେବା ପରେ ଆଇନ ଅନୁଯାୟୀ ବିଭାଗ ପକ୍ଷରୁ ସେମାନଙ୍କୁ କ୍ଷତିପୂରଣ ଦିଆଯିବ ବୋଲି ଯୋଡା ବନପାଳ ନାଏକ ଲୋକମାନଙ୍କୁ ପ୍ରତିଶ୍ରୁତି ଦେଇଛନ୍ତି। ସେହିପରି ବୈତରଣୀ ସଂରକ୍ଷିତ ଜଙ୍ଗଲରେ ୭ ଟି ହାତୀ ଓ ଚିପିଣ୍ଡା ଜଙ୍ଗଲରେ ଗୋଟିଏ ହାତୀ ବିଚରଣ କରୁଥିବା ବନବିଭାଗ ପକ୍ଷରୁ ସୂଚନା ମିଳିଛି। ଖଣି ଗୁଡିକରେ ବାରୁଦ ବିସ୍ଫୋରଣ ଏବଂ ଜଙ୍ଗଲ ମଧ୍ୟରେ ଭାରିଯାନ ଚଳାଚଳ ତତ୍ସହିତ ବିଭିନ୍ନ ବଡ ବଡ ପ୍ରକଳ୍ପରେ ଶବ୍ଦ ପ୍ରଦୂଷଣ ଓ ଉଚ୍ଚ ଶକ୍ତି ସମ୍ପନ୍ନ ଆଲୋକ ହେତୁ ହାତୀପଲ ଜଙ୍ଗଲରେ ନ ରହି ପ୍ରତିଦିନ ସନ୍ଧ୍ୟା ହେଲେ ଯୋଡା ତଥା ଆଖପାଖ ଗ୍ରାମଗୁଡିକରେ ପ୍ରବେଶ କରୁଛନ୍ତି।
