ଭବାନୀପାଟଣା,୩୦।୧(ଡି.ଏନ୍.ଏ.)- ଆଜିକାଲିର ସମାଜରେ ବଡ଼ଭାଗି ପଢ଼ାଗୁନା ପିଲା ଚାକ୍ରିର ପଛେ ଦଉଡୁଛନ୍। ସେନ୍ତା ଆରକେତେ ଗରିବ୍ ଘରର ପିଲା ଅଭାବ ଅନାଟନରୁ ପେଟ୍ପାଟନା ଲାଗି ଦାଦନ ଖଟିଯାଉଛନ୍। ହେଲେ କଳାହାଣ୍ଡି ଜିଲା କଲମପୁର ବ୍ଲକ ବିଜମରା ପଁଚେତ୍ ଡୁମେରମୁଣ୍ଡାର ଝନେ ଶିକ୍ଷିତ ଯୁବଚାଷୀ ଯୁବକମାନକର ଲାଗି ଉଦାହରନ୍ ସାଜିଛନ୍।
ସୂଚନା ଅନ୍ସାରେ ବିଜମରା ପଁଚେତ୍ ଡୁମେରମୁଣ୍ଡାର ଯୁବଚାଷୀ ଟଙ୍କଧର ନାଏକ(୩୧)। ସେ ଝନେ ଶିକ୍ଷିତ ଯୁବକ। ପାଠ୍ ପଢ଼ା ସଏଲା ଉତାରୁ ଚାକ୍ରି ଖୁଜ୍ବାରେ ସମିଆ ନାଇଁ ଗଡ଼େଇ କରି ଚାଷ୍ବାସ କରି ରୁଜ୍ଗାର କରବାକେ ମନ୍ ବଲେଇଛନ୍। ବଛର ୩୦ଟା ତଲେ କଳାହାଣ୍ଡି ଜିଲାରେ ଅନେକ୍ ଗରିବ୍ ଦୁଖି ମର୍ଡି, ଭୁଖମରିର ଶିକାର ହେଉଥିଲେ। ହେଲେ ଜିଲାରେ ଇନ୍ଦ୍ରାବତୀ ପ୍ରକଳ୍ପ ହେଲାଦିନୁ ଧର୍ମଗଡ଼ ଉପଖଣ୍ଡର ଚାଷୀ ଜଲସେଚନର ସୁବିଧା ପାଇଛନ୍। ଏନ୍ତାଥି ଅଂଚଲର ଅନେକ ଚାଷୀ ଦୁଇଫସଲି ଧାନଚାଷ କରି ଭଲ ଦୁଇପଏସା ରୁଜ୍ଗାର କରୁଛନ୍। ଅଂଚଲର ଅନେକ ଗରିବ୍ ଦୁଖି ବି ନିଜର ଜାଗାରେ କୁଲିମଜୁରି କରବାର ସୁଯୋଗ ପାଉଛନ୍। ଇ ସବୁକେ ଦେଖି ଟଙ୍କଧର ପାଠ୍ପଢ଼ା ସାଏଲା ଉତାରୁ ଧାନ ଚାଷ କଲେ। ହେଲେ ଧାନର ଅଭାବି ବିକ୍ରିକେ ଦେଖି ସେ ମିଶାଗୁଲା ଚାଷ୍ ଆରମ୍ କଲେ। ଟଙ୍କଧର ଏହେଦେ ନିଜର ପରିବାର ଚଲବାର ଲାଗି ଅଲପ ଜମିରେ ଧାନ ଚାଷ କରୁଥିଲାବେଲେ ୨ ଏକରରେ କଦଲି, ୨ ଏକର ପିଆଜ, କୁବି, ବାଇଗନ, ବରଗୁଡ଼ି, ବିନ୍ସ ଲେଖେଁ ପନିପରିବା ଚାଷ୍ କରିଛନ୍। ଇତାର ବାହାରେ ଏକ୍ରେ ଜମିରେ ବଁଧ୍ କୁଡ଼ି ମାଛ୍ ଚାଷ୍ ବି କରୁଛନ୍। ଟଙ୍କଧର ଇ ଚାଷବାସ ଲାଗି ବଛରକୁତା ୪ ଝନ୍ ଲୋକ୍କେ କାମ୍ ଦେଇଛନ୍। ସେନ୍ତା ଦରକାର ବେଲେ ପାଖାପାଖି ୪୦ ଝନ୍ ଲୋକ୍କେ କାମେ ଲଗଉଥିବାର ସେ କହିଛନ୍। ଚାଷୀ ଧାନ ବିକ୍ବାକେ ମଣ୍ଡିମାନକେ ମାସ ମାସ ଧରି ଶୀତ କାକର ଖାଉଛନ୍। ହେଲେ ପନିପରିବା ଚାଷ୍ କଲେ ଚାଷୀକେ କେହେନ୍ସି ମଣ୍ଡିକେ ଯିବାକେ ନାଇଁପଡ଼େ। କେତେ ବେପାରି ପନିପରିବା ନେବାକେ ଚାଷୀକର ଖେତେ ଭିଡ଼ ଜମଉଛନ୍। ସେନ୍ତା ଧାନ ଚାଷ କଲେ ଚାଷୀକେ ବଛରକ ଥରେ କି ଦୁଇ ଥର ଟଁକା ମିଲୁଥିଲାବେଲେ ପନିପରିବା ଚାଷ୍ରେ ସବୁଦିନ ଅଲ୍ପେ ବହୁତ୍ ଟଁକା ମିଲୁଥିସି। ଯେନ୍ଟା ଚାଷବାସ ଲାଗି କାହାରଠାନୁ ଧାରଉଧାର କରବାକେ ନାଇଁପଡ଼େ। ଟଙ୍କଧରକଁର କହେବାର ହେଲା ଧାନଚାଷ ବଦଲା ପନିପରିବା ଆର ମାଛ୍ ଚାଷରେ ଅଧ୍କା ଲାଭ ରହିଛେ। ଟଙ୍କଧର ଖେତ୍ ପାସେ ବିଦ୍ୟୁତ୍ର କେହେନ୍ସି ସୁବିଧା ନଁାଇଁନ। ଏନ୍ତାଥି ସେ ଡିଜେଲ ପମ୍ପ ଲଗେଇ ଚାଷ୍ କରୁଛନ୍। ହେଲେ ଖେତ୍ ପାସେ ବିଦ୍ୟୁତ୍ ସୁବିଧା ସଂଗେ ଗୁଟେ ଗଭୀର ନଲ୍ଚୁଅଁାର ବେବସ୍ତା ହେଇପାରଲେ ଟିକେ ଅଧ୍କା ଲାଭ ମିଲ୍ତା ବିଲି ସେ କହିଛନ୍।
