ବ୍ରହ୍ମପୁର ଅଫିସ,୫ା୮-ବ୍ରହ୍ମପୁର ସହରକୁ ସ୍ବଚ୍ଛ, ସୁନ୍ଦର ଓ ବିକାଶ ପଥରେ ଆଗେଇ ନେବାକୁ ବ୍ରହ୍ମପୁର ମହାନଗର ନିଗମ(ବିଏମ୍ସି) ପକ୍ଷରୁ ବହୁ ପଦକ୍ଷେପ ଗ୍ରହଣ କରାଯାଉଛି। ବିଏମ୍ସି ଅନ୍ତର୍ଗତ ୨୨ ନଂ. ୱାର୍ଡ ବୈକୁଣ୍ଠନଗର ତୃତୀୟ ଗଳି ଓ ଏକ୍ସେଟେନଶନ ଅଞ୍ଚଳବାସୀ ଏବେ ବି ବିଭିନ୍ନ ମୌଳିକ ସୁବିଧାରୁ ବଞ୍ଚିତ ଥିବା ଅଭିଯୋଗ ହୋଇଛି। ଗଳି ଶେଷ ଭାଗରେ ସୋଲାର ଚାଳିତ ପମ୍ପଗୃହ ନିମାଣ କରାଯାଇଥିଲେ ମଧ୍ୟ ଦୀର୍ଘ ମାସ ଧରି ସେଥିରୁ ଜଳଯୋଗାଣ ସ୍ବାଭାବିକ କରାଯାଉ ନ ଥିବା ଅଞ୍ଚଳବାସୀ କହିଛନ୍ତି।
କହିବାନୁଯାୟୀ, ୧୦ ବର୍ଷ ଧରି ଏହି ଅଞ୍ଚଳରେ ପ୍ରାୟ ୫୦ ରୁ ୧୦୦ ପରିବାର ବାସ କରୁଛନ୍ତି। କିନ୍ତୁ ଏବେ ସୁଦ୍ଧା ଅଞ୍ଚଳବାସୀ ମୌଳିକ ସୁବିଧାରୁ ବଞ୍ଚିତ ରହିଛନ୍ତି । ବୈକୁଣ୍ଠନଗର ୨ ଲାଇନ ପର୍ଯ୍ୟନ୍ତ ଡ୍ରେନ୍ ନିମାଣ ହୋଇଥିବା ବେଳେ ବୈକୁଣ୍ଠନଗର ତୃତୀୟ ଗଳିରେ ଡ୍ରେନ୍ ନିମାଣ ଅଧାପନ୍ତରିଆ ହୋଇ ପଡିରହିଛି। ଯାହାଦ୍ୱାରା ବର୍ଷାଦିନେ ସାହି ରାସ୍ତା ଜଳମଗ୍ନ ହେଉଛି। କେବଳ ସେତିକି ନୁହେଁ ଜନସ୍ବାସ୍ଥ୍ୟ ବିଭାଗ ପକ୍ଷରୁ ପାନୀୟ ଜଳଯୋଗାଣ ନିମିତ୍ତ ଗଳି ଶେଷ ଭାଗରେ ଲକ୍ଷ ଲକ୍ଷ ଟଙ୍କା ବ୍ୟୟରେ ସୋଲାର ଚାଳିତ ପମ୍ପ ହାଉସ ନିର୍ମାଣ କରାଯାଇଛି। କିନ୍ତୁ ଏହାର ପରିଚାଳନା ଦାୟିତ୍ୱରେ ଥିବା ପମ୍ପହାଉସ୍ ଚାଳକ ନିୟମିତ ଆସୁ ନ ଥିବାରୁ ଏକ ବର୍ଷ ହେଲା ଜଳଯୋଗାଣରେ ଅନିୟମିତତା ହେଉଛି। ସ୍ଥାନୀୟ ଲୋକେ ଏନେଇ ଅଭିଯୋଗ କଲେ ମଧ୍ୟ ସେ ଆସୁନାହାନ୍ତି।
ଅନ୍ୟପକ୍ଷରେ ପମ୍ପହାଉସ୍ ନିଶିଦ୍ଧାଞ୍ଚଳ କରାଯାଇଥିଲେ ମଧ୍ୟ ଏଥିରେ ତାଲା ପଡୁ ନ ଥିବାରୁ ଅନେକ ଅସାମାଜିକ କାର୍ଯ୍ୟକଳାପ ବୃଦ୍ଧି ପାଉଥିବା ଅଞ୍ଚଳବାସୀ ସନ୍ତୋଷ ସାହୁ କହିଛନ୍ତି। ଫଳରେ ଏହାଦ୍ୱାରା ପ୍ରାୟ ୫୦୦ରୁ ଊର୍ଦ୍ଧ୍ୱ ଲୋକ ପ୍ରଭାବିତ ହେଉଥିବା ସେ କହିଛନ୍ତି। ସେହିପରି ଗଳିରେ ଥିବା ବିଦ୍ୟୁତ୍ ଖୁଣ୍ଟ ଓ ଟ୍ରାନ୍ସଫର୍ମରଗୁଡିକ ବିପଦ ସଙ୍କୁଳ ଅବସ୍ଥାରେ ରହିଛି। ଖୁଣ୍ଟରେ ଗଛଲତା ମାଡିି ରହିଥିବା ବେଳେ ଟ୍ରାନ୍ସଫର୍ମର ସମ୍ପୂର୍ଣ୍ଣ ବିପଦ ସଙ୍କୁଳ ଅବସ୍ଥାରେ ରହିଛି।
ବିଦ୍ୟୁତ୍ ଖୁଣ୍ଟରେ ଷ୍ଟ୍ରିଟ ଲାଇଟ ନ ଥିବାରୁ ଅଞ୍ଚଳ ଅନ୍ଧକାର ହୋଇ ରହୁଥିବା ଅଞ୍ଚଳର ଦଣ୍ଡପାଣି ପଟ୍ଟନାୟକ କହିଛନ୍ତି। ବୈକୁଣ୍ଠନଗର ଦ୍ୱିତୀୟ ଗଳି ପର୍ଯ୍ୟନ୍ତ କର୍ମଚାରୀ ସଫେଇ ପାଇଁ ଆସୁଥିବା ବେଳେ ତୃତୀୟ ଗଳି ଓ ଏହାର ଏକ୍ସେଟେନଶନକୁ ସଫେଇ ପାଇଁ କୈଣସି କର୍ମଚାରୀ ଆସୁ ନାହାନ୍ତି। ଏନେଇ ସାଉଥ୍କୋ, ବିଏମ୍ସି କର୍ତ୍ତୃପକ୍ଷଙ୍କୁ ବହୁବାର ଅଭିଯୋଗ କରାଯାଇଥିଲେ ମଧ୍ୟ କେହି ଶୁଣୁ ନ ଥିବା ପଟ୍ଟନାୟକ କହିଛନ୍ତି। ଆଗାମୀ ଦିନରେ ସମସ୍ୟାର ସମାଧାନ ଦିଗରେ ପଦକ୍ଷେପ ନ ନେଲେ ଅଞ୍ଚଳବାସୀ ଆନ୍ଦୋଳନକୁ ଓହ୍ଲାଇବେ ବୋଲି ସେ କହିଛନ୍ତି।
