ବାଲିଆ,୩।୮: ବିରିଡ଼ି ବ୍ଲକ ବାରେଡିଆ ପଞ୍ଚାୟତ ୪ ନଂ. ଓ୍ବାର୍ଡ ଗୋପାଳ ସାହି ବାସିନ୍ଦା ଏବେ ମଧ୍ୟ ସରକାରୀ ଯୋଜନାରୁ ବଞ୍ଚିତ ହୋଇ ରହିଛନ୍ତି। ସାହିର ନିରଞ୍ଜନ ବେହେରା, ଶ୍ରୀକାନ୍ତ ବେହେରା, ବନମାଳି ବେହେରା, ଅନୁପମା ବେହେରା, ଶ୍ରୀମତି ଦାସ, ଦୈତାରୀ ବେହେରା, ସନାତନ ବେହେରାଙ୍କ ପରିବାର ରାସ୍ତା, ବିଦ୍ୟୁତ୍, ପାନୀୟଜଳ ଭଳି ମୌଳିକ ସୁବିଧା ପାଇପାରୁନାହାନ୍ତି। ସେମାନଙ୍କ ଘର ନିକଟକୁ ସ୍ଥାୟୀ ପକ୍କା ରାସ୍ତା ଖଣ୍ଡେ ନାହିଁ। ତେଣୁ ଅଣଓସାରିଆ ହିଡ଼ ରାସ୍ତାରେ ସେମାନେ ଯାତାୟାତ କରୁଛନ୍ତି। ସରକାରଙ୍କ ପକ୍ଷରୁ ଉକ୍ତ ପଞ୍ଚାୟତରେ ପ୍ରତିବର୍ଷ ରାସ୍ତା ନିର୍ମାଣ ପାଇଁ ଲକ୍ଷାଧିକ ଟଙ୍କା ବ୍ୟୟ କରାଯାଉଛି, କିନ୍ତୁ ଉକ୍ତ ରାସ୍ତା ପ୍ରତି କେହି ଦୃଷ୍ଟି ଦେଉନାହାନ୍ତି। ଏଥିପାଇଁ ସ୍ଥାନୀୟ ଲୋକ ପ୍ରତିନିଧି ଓ ପ୍ରଶାସନକୁ ସେମାନେ ଦାୟୀ କରିଛନ୍ତି। ସେହିପରି ବିଦ୍ୟୁତ୍ ସେବା ସେମାନଙ୍କ ନିକଟରେ ପହଞ୍ଚତ୍ପାରିନାହିଁ। ଏବେ ବି ସେମାନେ ଡିବିରି ଓ ଲଣ୍ଠନ ଆଲୁଅରେ ଚଳୁଛନ୍ତି। କିଛିମାସ ତଳେ ସେମାନେ ସୌଭାଗ୍ୟ ଯୋଜନାରେ ବିଦ୍ୟୁତ୍ ସଂଯୋଗ ନିମନ୍ତେ ଆବେଦନ କରିଥିଲେ। କିନ୍ତୁ ଆଜି ହେବ କାଲି ହେବ କହି ସେସୁ ପକ୍ଷରୁ ସମୟ ଗଡ଼ା ଚାଲିଛି। ଫନି ବାତ୍ୟା ପରେ ଜଣେ ଠିକାଦାର ସୌଭାଗ୍ୟ ଯୋଜନାରେ ବିଦ୍ୟୁତ୍ ଟାଣି ଦେବାକୁ କହି ସେମାନଙ୍କଠାରୁ ଆଧାର କାର୍ଡ ଓ ଅନ୍ୟ କେତେକ ଆବଶ୍ୟକ କାଗଜପତ୍ର ସହ ୫୦୦ ଟଙ୍କା ଲେଖାଏ ନେଇଥିଲେ। ତେବେ ସମସ୍ତଙ୍କ କାନ୍ଥରେ ୨ଟି ସୁଇଜ ବୋଡ ଲଗାଇ ଦେଇ ସେ ଆଉ ଧରା ଦେଉନାହାନ୍ତି। ଏ ସମ୍ପର୍କରେ ସାହି ବାସିନ୍ଦା ବିଭାଗୀୟ ଅଧିକାରୀଙ୍କୁ ଅବଗତ କରାଇଥିଲେ ମଧ୍ୟ ସେମାନେ ନ ଶୁଣିଲା ଭଳି ରହୁଛନ୍ତି। ଗତ ୨୨ ତାରିଖରେ ବିରିଡ଼ିରେ ଅନୁଷ୍ଠିତ ଜିଲାପାଳଙ୍କ ଜନଶୁଣାଣିରେ ମଧ୍ୟ ଏନେଇ ଅଭିଯୋଗ ହୋଇଥିଲା। ସେତେବେଳେ ଜିଲାପାଳ ସଂଗ୍ରାମ କେଶରୀ ମହାପାତ୍ର ୭ ଦିନ ମଧ୍ୟରେ ଉକ୍ତ କାର୍ଯ୍ୟ ସାରିବା ନିମନ୍ତେ ସେସୁ ଜେଇଙ୍କୁ ନିର୍ଦ୍ଦେଶ ଦେଇଥିଲେ। କିନ୍ତୁ ଇତିମଧ୍ୟରେ ୧୫ ଦିନ ବିତିଥିଲେ ସୁଦ୍ଧା ବିଭାଗୀୟ ଯନ୍ତ୍ରୀ ବନୋଜ ନାୟକ କୌଣସି ପଦକ୍ଷେପ ଗ୍ରହଣ କରିନାହାନ୍ତି। ଏ ସମ୍ପର୍କରେ ଯନ୍ତ୍ରୀ ନାୟକଙ୍କ ସହ ଯୋଗାଯୋଗ ହୋଇପାରିନାହିଁ। ତେବେ ସହକାରୀ ନିର୍ବାହୀ ଯନ୍ତ୍ରୀ ବିଶ୍ୱରଞ୍ଜନ ଦେହୁରୀଙ୍କୁ ପଚାରିବାରୁ ସେ ଏ ସମ୍ପର୍କରେ ଅବଗତ ନ ଥିଲେ, ଏବେ ଜାଣିବା ପରେ ଖୁବ୍ ଶୀଘ୍ର ପଦକ୍ଷେପ ନେବେ ବୋଲି କହିଛନ୍ତି।
