ପୁରୀ ଅଫିସ,୧୫ା୬: କରୋନା ଯୋଗୁ ରଥଯାତ୍ରା ହେବ କି ନାହିଁ ତାକୁ ନେଇ କଳ୍ପନାଜଳ୍ପନା ଲାଗିରହିଛି। କେନ୍ଦ୍ର ସରକାର ଏବଂ ହାଇକୋର୍ଟ ରଥଯାତ୍ରା ନିଷ୍ପତ୍ତି ରାଜ୍ୟ ସରକାରଙ୍କ ଉପରେ ଛାଡ଼ିଛନ୍ତି। କିନ୍ତୁ ସରକାର ଏ ପର୍ଯ୍ୟନ୍ତ କିଛି ସ୍ପଷ୍ଟ କରିନାହାନ୍ତି। ଅପରପକ୍ଷେ ରଥଯାତ୍ରା ଯେତେ ପାଖେଇ ଆସୁଛି ଶ୍ରଦ୍ଧାଳୁଙ୍କ ମଧ୍ୟରେ ସେତେ ଉତ୍କଣ୍ଠା ବଢିବାରେ ଲାଗିଛି। ଏପଟେ ରଥଖଳାରେ ତିନିରଥ ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଶ୍ରୀମନ୍ଦିର ପ୍ରଶାସନର ପ୍ରସ୍ତୁତି ଏବଂ ବିଭିନ୍ନ ନିଯୋଗ ସହ ହୋଇଥିବା ଆଲୋଚନାରୁ ରଥଯାତ୍ରାକୁ ନେଇ ସେବାୟତମାନେ ଦୃଢ ଆଶାବାଦୀ ଅଛନ୍ତି। ଏସବୁ ଭିତରେ ରଥଯାତ୍ରାକୁ ନେଇ ରୁଜୁ ଜନସ୍ବାର୍ଥ ମାମଲାର ଶୁଣାଣି କରି ରଥଟଣାରେ ମେଶିନ କିମ୍ବା ହାତୀ ନିୟୋଜନ ଭଳି ଅନ୍ୟ କୌଣସି ବିକଳ୍ପ ବ୍ୟବସ୍ଥା ସମ୍ପର୍କରେ ସରକାର ବିଚାର କରନ୍ତୁ ବୋଲି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ତେବେ ମେଶିନ ଦ୍ୱାରା ରଥଟଣା ପ୍ରସ୍ତାବକୁ ବିରୋଧ କରିଛି ଶୁଦ୍ଧସୁଆର ନିଯୋଗ।
ରବିବାର ନିଯୋଗ ସମ୍ପାଦକ ପ୍ରେମାନନ୍ଦ ଦାସମହାପାତ୍ର ଏହାକୁ ବିରୋଧ କରି ଗଣମାଧ୍ୟମକୁ କହିଛନ୍ତି, ଦଇତାପତି ଓ ଶୁଦ୍ଧସୁଆର ମିଶି ୧୭୦ ଜଣ ସେବକ। ଏମାନଙ୍କ ମଧ୍ୟରୁ ୬୦ ବର୍ଷରୁ ଊର୍ଦ୍ଧ୍ୱ ଏବଂ ୧୮ ବର୍ଷରୁ କମ୍ ପ୍ରାୟ ୩୦ ଜଣ ସେବକ ରଥ ଉପରେ ରହିବେ ଏବଂ ଅନ୍ୟମାନେ ରଥ ଟାଣିବା ଲାଗି ଆମେ ଶ୍ରୀମନ୍ଦିର ପ୍ରଶାସନକୁ ତାଲିକା ଦେଇଛୁ। ସେହିପରି ହାତୀ ରଥ ଟାଣିବା ନେଇ ହେଉଥିବା ଚର୍ଚ୍ଚା ସମ୍ପର୍କରେ ସେ କହିଥିଲେ, ପୂର୍ବରୁ ବାଲିରେ ରଥ ଦବିଗଲେ ହାତୀ ଟାଣୁଥିଲେ। ଏବେ ହାତୀ ଟାଣିଲେ କିଛି ଅସୁବିଧା ନାହିଁ, କିନ୍ତୁ ମେଶିନ ଦ୍ୱାରା ରଥ ଟଣାଯିବା ଠିକ୍ ନୁହେଁ। ପୋଲିସ, ସେବାୟତ ଏବେ ରଥ ଟାଣିବାର ବ୍ୟବସ୍ଥା କରାଯାଉ। ବର୍ତ୍ତମାନ ଯଦି ସବୁ ସେବାୟତ ରଥ ଟାଣନ୍ତି ତେବେ ହାତୀର କୌଣସି ଆବଶ୍ୟକ ପଡ଼ିବ ନାହିଁ। କାରଣ ଏବେ ଆଗ ଭଳି ଆଉ ବାଲି ନାହିଁ ବୋଲି ପ୍ରେମାନନ୍ଦ ପ୍ରକାଶ କରିଛନ୍ତି।
