ଓଡ଼ଗାଁ,୩୧ା୫(ସ୍ବ.ପ୍ର.): ନୟାଗଡ଼ ଜିଲା ଓଡ଼ଗାଁ ବନ ବିଭାଗ ରବିବାର ସକାଳୁ ବାହାଡ଼ାଝୋଲା ସେକ୍ସନ କଇଁଠପଲି ଗାଁରେ ଚଢ଼ାଉ କରି ବହୁ ମୂଲ୍ୟବାନ କାଠ ପଟା ଜବତ କରିଛି। ଜନୈକ ବ୍ୟକ୍ତିଙ୍କ ବାଡ଼ିରେ ପାଳ ଘୋଡ଼ା ହୋଇ କେତେକ ପଟା ରହିଥିବା ବିଭାଗ ସୂଚନା ପାଇ ବନଖଣ୍ଡ ଅଧିକାରୀଙ୍କୁ ଜଣାଇଥିଲା। ବନଖଣ୍ଡ ଅଧିକାରୀ ଧନରାଜ ଏଚ୍ଡିଙ୍କ ନିର୍ଦ୍ଦେଶକ୍ରମେ ରେଞ୍ଜର ରବୀନ୍ଦ୍ର ନାଥ ପଣ୍ଡା ସଦଳବଳ ଚଢ଼ାଉ କରିଥିଲେ। ଚଢ଼ାଉରେ ବନପାଳ ସରିତା ବରାଳ, ଜ୍ୟୋତିରଞ୍ଜନ ମାନସିଂହ, ଶୁଭେନ୍ଦୁ ନାୟକଙ୍କ ସମେତ ବନରକ୍ଷୀମାନେ ସାମିଲ ହୋଇଥିଲେ। ଜବତ କାଠ ପଟାର ମାପଚୁପ ଚାଲିଥିବା ବେଳେ ଆନୁମାନିକ ମୂଲ୍ୟ ୫୦ ହଜାର ଟଙ୍କା ହେବ ବୋଲି ସୂଚନା ମିଳିଛି। ହେଲେ କୌଣସି ବ୍ୟକ୍ତିଙ୍କୁ ଗିରଫ କରାଯାଇନାହ। ସେହିପରି ବନ ବିଭାଗ ସିଆରିମାଳ ହରିଜନ ସାହିରେ କାଠ କଟାଯାଉଥିବା ବେଳେ ଚଢ଼ାଉ କରି ୩ ଖଣ୍ଡ ଶାଳଗଣ୍ଡ ଏବଂ କରତ ଜବତ କରିଛି। ଜବତ କାଠ ଗଣ୍ଡିର ମୂଲ୍ୟ ୨୫ ହଜାର ଟଙ୍କା ହେବ। ହେଲେ ଘଟଣାସ୍ଥଳରୁ ସେହି ଗ୍ରାମର ମାରୁତ ନାଇକ, କାହ୍ନୁ ନାଇକ, କୁମର ନାଇକ, ଅମର ନାଇକ, କାମ୍ପ ନାଇକ ବନବିଭାଗକୁ ଚକମା ଦେଇ ଦୌଡ଼ି ପଳାଇଥିଲେ। ସେମାନଙ୍କ ବିରୋଧରେ ମାମଲା ରୁଜୁ ହୋଇଥିବା ବେଳେ ସେମାନଙ୍କୁ ଗିରଫ କରି କୋର୍ଟଚାଲାଣ କରାଯିବ ବୋଲି ରେଞ୍ଜର ପ୍ରକାଶ କରିଛନ୍ତି।
