ବ୍ରହ୍ମପୁର ଅଫିସ,୨୦ା୯- ବ୍ରହ୍ମପୁର ମହାନଗର ନିଗମ(ବିଏମ୍ସି)ର ସ୍ବତନ୍ତ୍ର ସାଧାରଣ ବୈଠକ ଗୁରୁବାର ଅନୁଷ୍ଠିତ ହୋଇଯାଇଛି। ଜିଲାପାଳ ତଥା ନିଗମ ପ୍ରଶାସକ ବିଜୟ ଅମୃତା କୁଲାଙ୍ଗେଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ସହରର ସ୍ବଚ୍ଛତା ଉପରେ ଗୁରୁତ୍ୱ ଦିଆଯାଇଥିଲାା ଆବର୍ଜନାକୁ ବିଏମ୍ସି ଗାଡିଦ୍ୱାରା ସଂଗ୍ରହ କରିବାକୁ ‘ସଫା ଆପ’ ନାମରେ ଏକ ନୂତନ ଆପ ଡେପଲପ କରାଯିବାକୁ ନିଷ୍ପତ୍ତି ନିଆଯାଇଥିଲା। ଏହି ଆପ ଆସନ୍ତା ଏକ ମାସ ମଧ୍ୟରେ ବିଏମ୍ସି ପକ୍ଷରୁ କାର୍ଯ୍ୟକାରୀ କରାଯିବା ନେଇ ଜିଲାପାଳ ସୂଚାଇଥିଲେ। ଏହା ମାଧ୍ୟମରେ ବିଏମ୍ସି ଦ୍ୱାରା ଡୋର ଟୁ ଡୋର ଆବର୍ଜନା ସଂଗ୍ରହ ପାଇଁ ବୁଲୁଥିବା ଗାଡିକୁ ବାଦ ଦେଇ ଯେ କୌଣସି ସମୟରେ ସହରବାସୀ ଗାଡି ବୁକ୍ କରି ନିଜର ଆବର୍ଜନା ଦେଇପାରିବେ ବୋଲି କୁହାଯାଇଥିଲା। ଏହା ବ୍ୟତୀତ ଆସନ୍ତା ଦିନରୁ ଆଇସିଟି ମାଧ୍ୟମରେ ସରକାରୀ ସଫେଇ କର୍ମଚାରୀଙ୍କ ଉପସ୍ଥାନ ନିଆଯିବା ବ୍ୟବସ୍ଥା କରାଯିବାକୁ ନିଷ୍ପତ୍ତି ନିଆଯାଇଥିଲା। ଘର ମଧ୍ୟରେ ଆବର୍ଜନା କମ୍ପୋଷ୍ଟିଂ କରିବାକୁ ଚାହୁଁଥିବା ବ୍ୟକ୍ତିଙ୍କୁ ବିଏମ୍ସି ପକ୍ଷରୁ ମାସିକ ୨୫ ଟଙ୍କା ପ୍ରଦାନ କରାଯିବା ସହ ବର୍ଜ୍ୟବସ୍ତୁ ପରିଚାଳନା-୨୦୧୬ ନିୟମାନୁଯାୟୀ ଆବର୍ଜନା ସଂଗ୍ରହ ପାଇଁ ଘର ପିଛା ମାସିକ ୫୦ ଟଙ୍କାର ୟୁଜର ଫି ଲାଗୁ କରାଯିବା ନେଇ ପ୍ରସ୍ତାବ ଗୃହୀତ ହୋଇଥିଲା। ଏଥିପାଇଁ ପ୍ରତିଘରକୁ ବାରକୋଡ ପ୍ରଦାନ କରାଯିବାକୁ ସୂଚାଯାଇଥିଲା। ଚଳିତ ବର୍ଷ ସ୍ବଚ୍ଛ ସର୍ବେକ୍ଷଣ-୨୦୨୦ ପାଇଁ ଆସନ୍ତା ଅକ୍ଟୋବର ୧୫ ରୁ ପ୍ରକ୍ରିୟା ଆରମ୍ଭ ହେବ।
ଏଥିପାଇଁ ସ୍ବଚ୍ଛତା ଆପ୍ ଜରିଆରେ ଜନସାଧାରଣଙ୍କୁ ଅଭିଯୋଗ ଦାଖଲ କରିବା ଦିଗରେ ସଚେତନତ କରାଯିବା ଉପରେ ଗୁରୁ୍ତ୍ୱ ଦିଆଯାଇଥିଲାା
ତେବେ ୨୪ ଘଣ୍ଟା ମଧ୍ୟରେ ଆପ୍ ଦ୍ୱାରା ଆସିଥିବା ଅଭିଯୋଗର ସମାଧାନ କରାଯିବା ଦିଗରେ ବିଏମ୍ସି ଅସଫଳ ହେଲେ ଉକ୍ତ ଅଭିଯୋଗକାରୀଙ୍କୁ ନିଗମ ପକ୍ଷରୁ ୨୦୦ ଟଙ୍କା ପ୍ରଦାନ କରାଯିବାକୁ ନିଷ୍ପତ୍ତି ନିଆଯାଇଥିଲା। ବୈଠକରେ ଅନ୍ୟମାନଙ୍କ ମଧ୍ୟରେ ବିଏମ୍ସି କମିଶନର ଚକ୍ରବର୍ତ୍ତୀ ସିଂ ରାଠୋର, ବସ୍ତି ଉନ୍ନୟନ ଅଧିକାରୀ ଇପ୍ସିତା ପ୍ରିୟଦର୍ଶିନୀ ମିଶ୍ର, ଅତିରିକ୍ତ ସ୍ବାସ୍ଥ୍ୟ ଅଧିକାରୀ ରଞ୍ଜିତ ପାତ୍ରଙ୍କ ସମେତ ସମସ୍ତ ବିଭାଗୀୟ ଅଧିକାରୀ ଉପସ୍ଥିତ ଥିଲେ।
