କରାଚୀ,୮।୮- ବିବାଦୀୟ ପାକିସ୍ତାନ ବ୍ୟାଟ୍ସମ୍ୟାନ ଉମର ଆକମଲ ଆଉ ଏକ ମହା ଅଭିଯୋଗ ଆଣି ହଇଚଇ ସୃଷ୍ଟି କରିଛନ୍ତି। ଚଳିତ ଗ୍ଲୋବାଲ ଟି୨୦ କାନାଡ଼ାରେ ପୂର୍ବତନ ଟେଷ୍ଟ କ୍ରିକେଟର ମନସୁର ଅକ୍ତାର ଦୁର୍ନୀତିମୂଳକ ପ୍ରସ୍ତାବ ଦେଇଥିଲେ ବୋଲି ସେ ଅଭିଯୋଗ କରିଛନ୍ତି। ଏ ନେଇ ସେ ପାକିସ୍ତାନ କ୍ରିକେଟ ବୋର୍ଡ (ପିସିବି) ଆଣ୍ଟି କରପଶନ ୟୁନିଟ୍ (ଏସିୟୁ) ସମେତ ଟୁର୍ନାମେଣ୍ଟ ଆୟୋଜକଙ୍କୁ ସେ ଅବଗତ କରାଇଛନ୍ତି। ଉମର ଓ୍ବିନିଙ୍ଗ୍ ହକ୍ସ ଫ୍ରଞ୍ଚାଇଜ୍ ପାଇଁ ଏହି ଟି୨୦ ଲିଗ୍ ଖେଳୁଛନ୍ତି। ଏହି ଦଳର ମ୍ୟାନେଜମେଣ୍ଟରେ ମନସୁର ମଧ୍ୟ କାର୍ଯ୍ୟ କରୁଛନ୍ତି। ତେବେ ମନସୁର ଲିଗ୍ର କେତୋଟି ମ୍ୟାଚ୍କୁ ଫିକ୍ସି କରିବା ପାଇଁ ମୋତ ପ୍ରବର୍ତ୍ତାଇ ଥିଲେ ବୋଲି ଉମର କହିଛନ୍ତି। ୬୧ ବର୍ଷୀୟ ମନସୁର ୧୯୮୦ରୁ ୧୯୯୦ ମଧ୍ୟରେ ୧୯ଟି ଟେଷ୍ଟ ଓ ୪୧ଟି ଦିନିକିଆ ମ୍ୟାଚ୍ ଖେଳିଛନ୍ତି। ଏହି ଅଭିଯୋଗ ଆସିବା ପରେ ତାଙ୍କର ଉପସ୍ଥିତି ସମ୍ପର୍କରେ କୌଣସି ତଥ୍ୟ ମିଳିନାହିଁ। ବିଶ୍ୱକପ୍ ପାଇଁ ଦଳ ଚୟନରେ ଉମରଙ୍କୁ ଚୟନକର୍ତ୍ତାମାନେ ଅଣଦେଖା କରିଥିଲେ। ତେବେ ମାର୍ଚ୍ଚ- ଏପ୍ରିଲରେ ୟୁଏଇରେ ଅନୁଷ୍ଠିତ ହୋଇଥିବା ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜରେ ତାଙ୍କୁ ସାମିଲ କରାଯାଇଥିଲା। ବିବାଦରେ ଛନ୍ଦି ହେବା ଉମରଙ୍କୁ ଅଭ୍ୟାସ ରହିଆସିଛି। ୨୦୧୫ ବିଶ୍ୱକପ୍ ଓ ହଂକଂ ସୁପର ସିକ୍ସେସ୍ ଅବସରରେ କେତେକ ବୁକ ମେକର ତାଙ୍କୁ ମ୍ୟାଚ୍ ଫିକ୍ସ କରିବାକୁ ପ୍ରସ୍ତାବ ଦେଇଥିଲେ ବୋଲି ସେ ଗତ ବର୍ଷ ଏକ ଟେଲିଭିଜନ ସାକ୍ଷାତକାରରେ କହି ବେଶ୍ ଚର୍ଚ୍ଚିତ ହୋଇଥିଲେ।
