ଖଇରା,୨୭।୪(ଡି.ଏନ.ଏ.)- ୩ଦିନର ଶଟଡାଉନ ପରେ ପ୍ରଶାସନର ନିର୍ଦ୍ଦେଶକ୍ରମେ ରବିବାର ୧୦ଟା ପରଠାରୁ ଏଥିରେ ସାମାନ୍ୟ କୋହଳ କରାଯାଇ କିଛି ନିର୍ଦ୍ଦିଷ୍ଟ ଦୋକାନ ଖୋଲିବାକୁ ଅନୁମତି ଦିଆଯାଇଛି। ରବିବାର ପୂର୍ବାହ୍ନ ୧୦ଟା ବାଜିବା ପୂର୍ବରୁ ଆହୁରି କିଛି ସମୟ ବାକିଥିବା ବେଳେ ପୂର୍ବରୁ ପ୍ରତୀକ୍ଷିତ ଦୋକାନଗୁଡିକ ଖୋଲିଯାଇଥିଲା। ଜିନିଷ କିଣିବାକୁ ଗ୍ରାହକଙ୍କ ମଧ୍ୟରେ ପ୍ରତିଯୋଗିତା ଆରମ୍ଭ ହୋଇଯାଇଥିଲା। ୧ମାସ ଧରି ସାମାଜିକ ଦୂରତା ମାନି ଚଳୁଥିବା ଗ୍ରାହକ ହଠାତ୍ ବେପରୁଆ ଢଙ୍ଗରେ ଜିନିଷ କିଣାକିଣି ଆରମ୍ଭ କରିଥିଲେ। ବିଶେଷ କରି ଖଇରା ପରିବା ହାଟରେ ସାମାଜିକ ଦୂରତାର ପରିଭାଷା ବଦଳିଯାଇଥିଲା। ଗୋଟିଏ ଜାଗାରେ ଠୁଳ ହୋଇ ପରିବା କିଣିବା, ଯାତାୟାତ ବେଳେ ପରସ୍ପର ଲଗାଲଗି ହୋଇଯାଉଥିବା ପରିଲକ୍ଷିତ ହୋଇଥିଲା। ଏଭଳି ଘଟଣାର ପୁନରାବୃତ୍ତି ଘଟିଲେ କରୋନା ମୁକାବିଲା କରିବା କଷ୍ଟସାଧ୍ୟ ହୋଇପଡିବ ବୋଲି ସାଧାରଣରେ କୁହାଯାଉଛି।
