ପରଜଙ୍ଗ, ୪।୩(ଡି.ଏନ.ଏ.) – ଢେଙ୍କାନାଳ ଜିଲା ପରଜଙ୍ଗ ବ୍ଲକ ପାଟରପଦା ପଞ୍ଚାୟତ ଅଧୀନ କଟାବାହାଳ ଗ୍ରାମରେ ନିର୍ମାଣାଧୀନ ପାନୀୟ ଜଳ ପ୍ରକଳ୍ପ ମଙ୍ଗଳବାର ଭୁଶୁଡ଼ି ପଡ଼ିଛି। ଘଟଣା ସ୍ଥଳରେ କାର୍ଯ୍ୟରତ ଶ୍ରମିକ ଅଳ୍ପକେ ବର୍ତ୍ତି ଯାଇଛନ୍ତି। ନିମ୍ନମାନର କାମ ଯୋଗୁ ଏପରି ଦୁର୍ଘଟଣା ଘଟିଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏହି ଟାଙ୍କି କାର୍ଯ୍ୟକ୍ଷମ ହେଲେ ୫୦୦ରୁ ଊର୍ଦ୍ଧ୍ୱ ପରିବାର ଖରାଦିନେ ଜଳକଷ୍ଟରୁ ମୁକ୍ତିପାଇବେ ବୋଲି ଆଶା ବାନ୍ଧିଥିଲେ। ହେଲେ ଟାଙ୍କି ଭୁଶୁଡ଼ିଯିବା ପରେ ସେମାନଙ୍କ ସବୁ ଆଶା ମଉଳି ଯାଇଥିବା ଅଞ୍ଚଳବାସୀ କ୍ଷୋଭର ସହ କହିଛନ୍ତି।
ସୂଚନାଯୋଗ୍ୟ, ଉକ୍ତ ପ୍ରକଳ୍ପ ଲାଗି ୧ କୋଟି ଟଙ୍କାର ଟେଣ୍ଡର ହୋଇଥିଲା। ଈଶ୍ୱର ଚନ୍ଦ୍ର ଦଣ୍ଡପାଟଙ୍କ ନାମରେ ବିଭାଗ ତରଫରୁ ଏହାର ଏଗ୍ରିମେଣ୍ଟ କରାଯାଇଛି। ହେଲେ ପେଟି କଣ୍ଟ୍ରାକ୍ଟରଙ୍କ ସହାୟତାରେ ୭ରୁ ଊର୍ଦ୍ଧ୍ୱ ଭାଗୀଦାରି ହୋଇ ଏହି କାର୍ଯ୍ୟ କରୁଥିଲେ। ଉକ୍ତ ପାଣି ଟାଙ୍କିର ବିମ୍ କାର୍ଯ୍ୟ ଶେଷ ହୋଇଥିବାବେଳେ ଛାତ ପଡୁଥିଲା। ହେଲେ ସିଣ୍ଟରିଂ ଦବି ଯିବାରୁ ପ୍ରକଳ୍ପ ଭୁଶୁଡ଼ି ପଡ଼ିଛି। ଘଟଣା ପ୍ରଘଟ ହେବା ପରେ ଏହାକୁ ଚପାଇ ଦେବାକୁ ଉଦ୍ୟମ କରାଯାଉଛି। ରାତାରାତି ଶ୍ରମିକ ଲଗାଇ ପକାଯାଇଥିବା କଂକ୍ରିଟ୍ ଢଳେଇ ଭଙ୍ଗାଯାଉଥିବା ଗ୍ରାମବାସୀ କହିଛନ୍ତି।
ଏ ନେଇ ଆର୍ଡବ୍ଲ୍ୟୁଏସ୍ଏସ୍ ଯନ୍ତ୍ରୀ-୧ ତ୍ରିଲୋଚନ ପ୍ରଧାନ କୁହନ୍ତି, ନିର୍ମାଣାଧୀନ ପାଣି ଟାଙ୍କିର ମଧ୍ୟଭାଗରେ ସିଣ୍ଟରିଂ ଦବିଯିବାରୁ ଏହାର ଛାତ ଭୁଶୁଡ଼ି ପଡ଼ିଛି। ତାଙ୍କୁ ଭଙ୍ଗାଯାଇ ପୁନର୍ବାର ନିର୍ମାଣ କରାଯିବ। ତେବେ ନିମ୍ନମାନର କାମକୁ ସେ ଅସ୍ବୀକାର କରିଛନ୍ତି। ହେଲେ ପେଟି କଣ୍ଟ୍ରାକ୍ଟରଙ୍କ ଯୋଗୁ କାମ କରିବାରେ ସମସ୍ୟା ହେଉଥିବା ସେ ସ୍ବୀକାର କରିଛନ୍ତି।
